Rwamagana: Barishimira ko ahahoze ibihuru hari imihanda ya kaburimbo

  • NSHIMIYIMANA FAUSTIN
  • Gashyantare 1, 2024
  • Hashize amezi 4
Image

Mu gihe u Rwanda rwizihiza Umunsi w’Intwari z’Igihugu ku nshuro ya 30, bamwe mu baturage batuye mu mujyi wa Rwamagana bavuga ko mbere ya Jenoside yakorewe Abatutsi mu 1994; hahoze ibihuru n’ibigunda, gutandukanya umuhanda n’inzira zo mu makaritsiye bidashoboka, ariko ubu bishimira ko hubatswe imihanda ya kaburimbo.

Abaturage bahatuye barishimira ko mu myaka 30 ishize Ingabo za RPA zihagaritse Jenoside yakorewe Abatutsi mu 1994, umujyi warushijeho kwaguka no kugira isura nziza bitewe n’ibikorwa remezo by’imihanda byubatswe ubu inzira zikaba ari nyabagendwa.

Twagirimana Samuel atuye muri Rwamagana kuva 1960 ari umwana muto yemeza ko aho umujyi ugeza ubu yabibonesheje amaso ye kandi hari impinduka zigaragara n’amajyambere begerejwe ndetse bikaba bibatera ishyaka ko igihugu kibakunda.

Yagize ati: Nakuriye muri Rwamagana nta bikorwa remezo bihari kuko hari imihengeri n’ibihuru. Impinduka n’iterambere ry’umujyi ryaje muri iyi myaka 30 ishize kuko ni bwo Leta yatwegereje ibikorwa remezo birimo amasoko, amabanki, ibitaro n’amavuriro, amashuri menshi hano mu mujyi kuko mbere hahoze amashuri yisumbuye atarenze atatu ariko ubu ahari arenze 10.

Muri karitsiye hubatswe imihanda ya kaburimbo yoroshya ingendo, inahindura isura y’umujyi

Imihanda ya kaburimbo yazanye impinduka kuko ni bwo inyubako zigezweho n’imiturire byubatswe, ku buryo serivisi abaturage dukeneye tuzibona hafi kandi dusa neza kuko tuba twanyuze mu mihanda myiza ya kaburimbo.”

Muvunyi John atuye mu kagari ka Cyanya mu Murenge wa Kigabiro, yavuze ko atuye muri Rwamagana kuva mu 1994, ariko  ko byari bigoye gutandukanya umujyi n’icyaro.

Yagize ati: Mu 1994 ntiwasobanukirwaga ko uyu ari umujyi cyangwa ari icyaro bitewe nuko nta mihanda y’imigenderano yabaga mu makaritse nubwo hanyuraga umuhanda wa Kaburimbo wa Kigali- Kayonza. Hari higanje imiyenzi n’ibihuru ku mihanda bitogoshe ndetse tukanyura mu nzira zangiritse.

Yongeyeho ati: “Uyu munsi wa none imihanda ya kaburimbo ikorerwamo siporo mu ijoro no mu gitondo cya kare. Iyi mihanda yatumye n’ibindi bikorwa by’iterambere bitwegera kuko hari Ishami rya Banki Nkuru, banki zitandukanye, amahoteli, ibiro by’Intara y’Iburasirazuba n’Akarere, Imirenge n’ibindi. Ibi byose twishimira turabikesha ubuyobozi bwiza.”

Umuyobozi w’Akarere ka Rwamagana, Mbonyumuvunyi Radjab yavuze ko ku munsi w’Intwari z’Igihugu bishimira ibikorwa remezo by’imihanda itandutu yubatswe mu mujyi wa Rwamagana bifite icyo bivuze ku iterambere ry’abaturage n’Akarere kandi bivuze byinshi ku butwari bw’Abanyarwanda.

Yagize ati: Ibikorwa remezo byubatswe by’umwihariko imihanda ya kaburimbo bifite icyo bimaze ku buzima bw’abaturage nimibereho ya buri munsi. Iyi mihanda iri mu mujyi rwagati iriho n’amatara  yahinduye ubuzima bw’abaturage ku buryo bagenda batanyerera kandi ku manywa na nijoro, siporo zikorwa mu ijoro na mu gitondo ariko mbere ntibyashobokaga, abacuruzi bacuruza amasaha menshi n’abagenda bakagenda amasaha menshi kandi igihe bashakiye nta nkomyi.”

Yakomeje agira ati: Imihanda ya kaburimbo yubatswe mu mujyi wa Rwamagana yerekana gukorera hamwe n’ubushake bw’igihugu, icyerekezo cy’igihugu kuko nabyo biri mu byerekana ubutwari bw’Abanyarwanda.

Kuri ubu muri Rwamagana imihanda ya kaburimbo iragaragaza iterambere ry’igihugu, ubutwari no kwibohora kuko ibyo byose nta munyamahanga wabikoze ahubwo byakozwe na Leta nziza y’Ubumwe bw’Abanyarwanda.

Ubuyobozi bw’Akarere ka Rwamagana butangaza ko mu mwaka w’ingengo y’imari ya 2023/2024 bumaze kuzuza imihanda itandatu ya kaburimbo ireshya na kilometero enye n’igice (4.5Km), yiyongera ku yindi isanzwe.

Abanyeshuri bari bitabiriye ibirori byo kwizihiza Umunsi w’Intwari z’Igihugu
  • NSHIMIYIMANA FAUSTIN
  • Gashyantare 1, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE