Rusizi: Abijejwe kwishyurwa imyaka yaranduwe ahubakwa kaburimbo barategereje baraheba

  • BAHUWIYONGERA SYLVESTRE
  • Gashyantare 22, 2024
  • Hashize amezi 2
Image

Imiryango 209 yaranduriwe imyaka hakorwa umuhanda Pindura- Bweyeye mu Karere ka Rusizi mu mpera z’umwaka ushize, bararira ayo kwarika nyuma y’uko bamaze amezi arenga ane bategereje ingurane bari bijejwe guhabwa mu kwezi kumwe gusa.

Iyo miryango itabaza ni ituye mu Tugari twa Gikungu na Nyamuzi, mu Murenge wa Bweyeye, Akarere ka Rusizi, ivuga ko irembejwe n’inzara nyuma yo kurandurirwa imyaka.

Bauvga ko imyaka yabo yaranduwe mu Gushyingo 2023 babwirwa ko bagiye gushyirirwa kaburimbo mu muhanda wabo ushamikiye ku wa Pindura-Bweyeye bizezwa kwishyurwa bitarenze tariki 25 Ukuboza 2023

Bavuga ko baterwa agahinda n’uko ubuyobozi bw’Akarere ka Rusizi n’abari bahagarariye Ikigo cy’Igihugu gishinzwe iterambere rya Taransiporo mu Rwanda (RTA) babijeje ibitangaza banababwira ko iryorwa ry’uwo muhanda ryihutirwa

Bababwiraga ko uretse iinzu batuyemo bazavamo umuhanda waruzuye, imyaka yo yagombaga kurandurwa hakanyuzwa umuhanda ku bw’inyungu rusange.

Icyo goihe kandi ngo babizezaga ko nta nzara bazahura na yo kuko bazaba bahawe ingurane mbere y’minsi mikuru ya Noheli n’Ubunani.

Aba baturage batifuje ko Imvaho Nshya itangaza amazina yabo, bavuga ko icyabababaje cyane kurushaho ari uko nyuma yo kurandurirwa imyaka yose bagasigara iheruheru, bategereje amafaranga bagaheba.

Kugeza ubu ngo nta  mukozi wa RTDA cyangwa Umuyobozi n’umwe ku Karere ka Rusizi bongeye guca iryera, uretse ushinzwe iby’ingurane ku Karere.

Umwe muri abo baturage yagize ati: “Icyatubabaje cyane ni uko ubwo Guverineri w’Intara y’Iburengerazuba Dushimimana Lambert, yadusuraga muri Mutarama twese ni cyo twari twiteguye kumubaza ngo atubwire icyo abana bacu bazarya mu gihe baturanduriye imyaka ngo bagiye kuduha ingurane.”

Icyo gihe ngo ntibyashoboye kubera ko umukozi ushinzwe ingurane ngo yaje mbere ya Guverineri abasaba ko mu byo babaza icyo kibazo bakireka abizeza ko gihita gikemuka, none amezi abiri agiye gushira.

Bavuga ko abakora uwo muhanda bamaze kuwusiza neza hasigaye kaburimbo gusa, bakavuga ko iyo babareka ntibabarandurire imyaka ubu baba barayisaruye nta kibazo bafite none n’irindi hinga rije batayarabona.

Abaturage bishimiye ko bagiye koherezwa umuhanda ariko bakababazwa n’uko uzasanga nta rwara rwo kwishima bafite

Uwabariwe arenga miliyoni 2 z’amafaranga y’u Rwanda, yagize ati: “Turibaza niba Perezida Kagame azi aka karengane turi gukorerwa. Ntacyo atadukorera rwose hano mu Bweyeye, ariko bamwe mu bamureberera ni bo batuzambya. Nk’ubu mfite abana babiri biga ayisumbuye, nta n’umwe ndarihira bari kubirukana ngo baze batware amafaranga y’ishuri. Nta n’icyo ngaburira abasigaye mu rugo kuko icyitwa umwaka cyose cyaranduwe.”

Avuga ko iyo abona ayo mafaranga yari kuguramo inka z’ibimasa zari kumuha inyungu ifatika mu mezi abiri.  

Umugore ufite abana 6, barimo abiga ayisumbuye, na we ati: “Bandanduriye ibishyimbo, ibigori, n’amateke, byose byari bigeze ibagara. Bambwiraga ko nta kibazo kuko nibayampa mu kwa 12 nzahaha ku bazaba bejeje nkagaburira abana.”

Avuga ko kuba nta muyobozi uranabageraho ngo abababwire aho byapfiriye, ati: “Turifuza ko Perezida Kagame amenya iki kibazo kuko abandi tubona umusonga wacu utababuza gusinzira. Iyo Njyanama itarenganura abaturageyo itumariye iki?…”

Inama Njyanama y’Akarere ka Rusizi yateranye ku wa 18 Gashyantare, yari yitezweho guha iki kibazo umurongo, ivuga ko byari byashyikirijwe RTDA irayibigarurira ngo ibanze ibyemeze nk’uko abaturage babivuga.

Inama Njyanama ni yo yasanze imiryango 209 ari yo igomba kwishyurwa amafaranga y’u Rwanda asaga miliyoni 233 ikanayemeza.

Umuyobozi wa Njyanama y’Akarere ka Rusizi, Uwumikiza Béatrice, yavuze ko akarengane k’abaturage baranduriwe imyaka na bo kabateye inkeke, ariko avuga ko icyo basabwaga Nkanjyanama bakirangije bigiye gusubizwa muri RTDA.

Ati: “Urutonde rwabo rurahari, nka Njyanama twemeje ko bagomba kwishyurwa nk’uko babyemererwa n’amategeko, bigiye gushyiikirizwa RTDA nk’abafitanye ayo masezerano n’Akarere. Ibyo ayo masezerano avuga bigiye guhita bishyirwa mu bikorwa bidatinze, amafaranga yabo bazayabona vuba.”

Abaturage barasaba abarebwa n’iki kibazo bose kucyihutisha bidasabye ko Umukuru w’Igihugu acyigiramo, cyangwa Akarere kakabaha icyo baba bagaburira abana igihe bayategereje.

  • BAHUWIYONGERA SYLVESTRE
  • Gashyantare 22, 2024
  • Hashize amezi 2
TANGA IGITEKEREZO
inezamjoseph@gmail.com says:
Gashyantare 22, 2024 at 6:58 pm

Ese ahantu umuhanda utwara kuri buri muturage hari hateye imyaka ingana ite yabateza inzara ikanabarembya? Nkeka ko bakabaye basaba kwishyurwa kuko ari uburenganzira bwabo kdi bakaba baranabeshywe ariko badakabije ngo inzara yabarembeje. Niba yarabarembeje kdi hashakwe uburyo bwo kongera umusaruro kuko ntabwo inzara yarembya abantu biturutse kuri 6m cg zirengaho gato zaranduweho imyaka. Mwibaze ngo ari ibigori byaba ari ibiro bingahe ari imyumbati yaba ari amabimba angahe. Nibishyurwe birakwiye.

Andika igitekerezo

AMATEGEKO AGENGA IYANDIKA RY'IGITEKEREZO CYAWE