Rusizi: Abazamu 4 bafungiwe kwiba hafi toni ebyiri z’umuceri

  • BAHUWIYONGERA SYLVESTRE
  • Gashyantare 27, 2024
  • Hashize amezi 2
Image

Abantu bane bakora izamu ku bubiko bwa Koperative y’abahinzi b’umuceri ya COPRORIKI ikorera mu Murenge wa Gikundamvura, Akarere ka Rusizi, batawe muri yombi bakekwaho kwiba toni 1 n’ibilo 958 by’umuceri bifite agaciro ka miliyoni 1.1 z’amafaranga y’u Rwanda.

Abo bazamu bafungiwe kuri Sitasiyo y’Urwego rw’Igihugu rw’Ubugenzacyaha (RIB) ya Muganza, ni Ingabire Lucie w’imyaka 26 wari umuzamu w’amanywa, Masengesho Potier w’imyaka 40, Ntakirutimana Leopold w’imyaka 32 na Bizimana Dominique w’imyaka 32 bari ab’ijoro.

Uwo muceri wari waguzwe n’uruganda rutunganya umuceri rwa COTICORI ruwusiga muri ubwo bubiko, ubuyobozi bw’urwo ruganda bugarutse kuwureba busanga toni 38 zaguzwe ziraburaho imifuka irindwi n’indi myinshi yagiye igerurwa.

Bivugwa ko umwe muri abo barinzi witwa Bizimana yasanganywe urufunguzo rw’ingufuri y’ubu bubiko, biba urujijo kuko basanze atari urucurano, kandi imfunguzo zisanzwe z’iyi ngufuri zihari.

Baziki Yusufu, Umunyamabanga Nshingwabikorwa w’Umurenge wa Gikundamvura, yabwiye Imvaho Nshya ko abafashwe bemera ko ari bo bibye uwo muceri.

Ati: “Abafashwe bemera ko ari bo bawibye ariko ntibabisobanure neza kuko nta rugi rwaciwe, nta n’aho batoboye, ntibanavuge aho bawushyize. Icyakora umwe mu bazamu b’ububiko bwawo bw’ijoro yasanganywe urufunguzo rw’ingufuri yaho, yanga kugira byinshi avuga tukizera ko azabisobanurira ubutabera.”

Avuga ko bafashwe ku wa Gatanu tariki ya 23 Gashyantare, agakeka ko baciye mu cyuho cy’ibyo itegeko rivuga ko uruganda ruguze umuceri iyo rutawutwaye rwishakira abazamu bawurinda.

Nikekwa ko abarindaga ubwo bubiko bumvikanye kuwiba kuko bumvaga batazawubazwa nk’abagombaga kuwucunga kuko utari ukiri mu maboko yabo, nubwo bari bazi neza ko ukiri mu bubiko hamwe n’undi w’abahinzi bigaragara ko utigeze ukorwaho.

Nyuma y’iyibwa ry’uyu muceri, Imvaho Nshya yavuganye n’Umuyobozi wa koperative ya COPRORIKI Hamenyimana Oscar na nyir’uruganda rwa COTICORI Hahirumukiza Alphonse.

Umuyobozi wa COPRORIKI Hamenyimana Oscar, avuga ko uyu muceri wibwe ku burangare bw’uruganda n’ushinzwe ububiko bwawo, kuko hakurikijwe amategeko avuga ko iyo uruganda ruguze umuceri uva mu bitabo bya Koperative no mu bubiko bwayo, ukajyanwa n’uruganda rwawishyuye nta kindi kiba gisigaye.

Uru ruganda ngo rwarawishyuye nk’uko bisanzwe, ruza kuwupimura ntirwawutwara ntirwanabimumenyesha nk’umuyobozi.

Nyuma nibwo yaje kubwirwa ko  wibwe umaze iminsi 3 mu bubiko bwa koperative atabizi.

Ati: “Twasanze haribwe toni n’ibilo 958. Uruganda rwagombaga gutwara toni 38 zirengaho gato, harimo toni 32 zarwo n’izindi 6 z’abaturage rwagombaga kubatonorera. Uruganda rwapimuye umuceri rwari rwishyuye. Iyo uguze umuceri ntuwutware ukora imenyekanisha ku buyobozi bwa Koperative, ukanazana abazamu barinda umuceri wawe, kuko abazamu ba Koperative baba batakirebwa n’ibyawo.

Uba wamaze kuva mu maboko ya koperative wagiye mu y’umushoramari.”

Umuceri wari wamaze kugurwa ugasigara mu bubiko wibweho imifuka yuzuye indi na yo iragerurwa

Avuga ko uruganda rwaje kuwupimura ku wa Gatanu tariki 16 Gashyantare, agira ngo bawutwaye naho atazi ibyo bivuganiye n’ushinzwe gucunga izamu ku maywa.

Akibaza impamvu bavuze ko bazinduka baza kuwureba, bakamara iminsi 3 yose bataraza, akumva ahubwo uwo wabemereye kuwubabikira amubwira ngo ni abamubwirire baze kuwutwara.

Uyu muyobozi avuga ko yahamagaye ku ruganda, bakamubwira ko bazawutwara ku wa Kabiri tariki 20 Gashyantare.

Bahageze saa yine z’igitondo, bamuhamagara bamubwira ko ushobora kuba waribweho kuko babuze imifuka 7 n’undi bagiye bafungura imifuka bagakuraho muke muke.

Imvaho Nshya imubajije aho ahagaze nk’Umuyobozi wa koperative, ati: “Twumva nta kitureba kuko umuceri twari twawutanze. Bakurikirane ababibye, icyakora twabafasha mu rwego rw’imikoranire dusanganywe. Uruganda ruratubwira kubakurikirana abo bawibye. Ariko se twe turabakurkiranaho iki ko uw’abahinzi dushinzwe uhari? Twaba twivanze mu bitatureba.”

Nyir’uruganda Hahirumukiza Alphonse, avuga ko bagiye  kuwupima  koperative izi neza ko batari buwutware kuko umuhanda bawunyuzamo wari umeze nabi, ari na yo mpamvu batari kuzana abazamu mu bandi.  

Anavuga ko iby’itegeko bavuga,  biyishyurira abazamu iyo koperative itabatije ububiko, nk’iyo ifitemo mwinshi. Icyo gihe bawujyana hanze yabwo bakawushyiraho amashitingi akaba ari bwo bawushakira abazamu.

Ati: Twagiye kuwupimura tutari buwutware kubera umuhanda wari umeze nabi, Umuyobozi wa koperative yari abizi. Mu gihe twari dutegereje umucyo ngo tuwupakire, ari yo mpamvu byamaze iriya minsi yose, twabwiye uwushinzwe ngo bawuturebere, tubaha n’ingufuri yacu barayanga ngo ntibayizeye, tugiye kuwureba dusanga waribwe. Ntitwari gushyiraho abazamu hari ababo, banarinze uw’abahinzi byari kumwe mu bubiko.”

Yunzemo ati: “Tumaze kumenya ko twibwe twabibwiye Umuyobozi aduha abagenzuzi kandi ntiyari kubaduha atemera ko wababuriyeho.  Abazamu babo barafashwe ariko twe ntidushobora kubarega kuko si abacu. Turi kuvugana na Koperative uburyo yazawutwishyura kuko ufite agaciro ka miliyoni n’ibihumbi 100. Nitatwishyura ni yo tuzarega kuko ni yo twasigiye umuceri wacu. Gusa nk’abantu tumaranye imyaka 5 dukorana numva bizakemuka bitaragera aho hose.”

Hahirumukiza Alphonse, yizeza abaturage bari batanze umuceri wabo ngo utunganywe ko ntakizabababuza  kuwubona cyane ko abakekwa bafashwe.

Yasabye Koperative kutigurutsa iki kibazo kuko umuceri waburiye mu bubiko bwabo kandi bikagaragara ko abawibye atari abavuye hanze y’iyo Koperative.

  • BAHUWIYONGERA SYLVESTRE
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE