Rusizi: Ababyeyi b’Intwaza bashima ko babyibushye nyuma yo gukurwa ahabi

Intwaza zo mu rugo Impinganzima mu Karere ka Rusizi mu Ntara y’Iburengerazuba ziratangaza ko Leta mbi yagize nabi ikabamaraho urubyaro ariko Leta nziza ikaba urubyaro.

Abacekuru n’abasaza bahekuwe na Jenoside yakorewe Abatutsi bitwa ‘Intwaza’, bagiye batuzwa hamwe kugira ngo bashobore kwitabwaho mu masaziro.

Ababyeyi b’Intwaza ba Rusizi bashimira Ubuyobozi bukuru bw’igihugu bubitaho bukaba bukomeje kubafasha gutwaza no guhobera ubuzima.

Byagarutsweho kuri uyu wa Mbere tariki 18 Ukuboza 2023 mu busabane ngarukamwaka bwo kubifuriza Noheli Nziza n’Umwaka mushya wa 2024 bitegurwa n’Umuryango Unity Club Intwararumuri.

Abagize itsinda rya Unity Club Intwararumuri bari bayobowe na Mukantabana Seraphine. Intwaza zahawe impano zinyuranye, zishimira Madamu Jeanette Kagame uburyo adahwema kubitaho.

Mukarubibi Valerie, Umukecuru w’imyaka 70 utuye mu rugo rw’Impinganzima mu Karere ka Rusizi, yatumye Unity Club Intwararumuri kumubwirira Perezida wa Repubulika Paul Kagame na Madamu we ko bameze neza.

Yagize ati “Mumutubwirire muti barabyibushye, bameze neza, Intwaza zanyu zarashishe uti mwabakuye ahabi mubashyira aheza koko!

Muti mwabahaye abana, mwabahaye byose, muti barabishimye, rwose Imana ibahe umugisha, ibongerere, bahorane amata ku ruhimbi”.

Mukarubibi avuga ko uyu ari umwaka wa gatanu ushize atangiranye n’urugo rw’Intwaza, akagaragaza ko mu mibereho ye hari byinshi bimaze guhinduka.

Akomeza agira ati: “Narahindutse rwose nabaye mushyashya, sinakubeshya nari agakecuru, ubu uku ureba nari agakecuru none ubu naragaramye nabaye mushyashya.

Ndaryama neza, nkisiga nkaberwa, nkakaraba, abana bakampa amazi ashyushye, icyo batarankorera ni ukuhagirwa, byo ndabyishoboreye ariko amazi ashyushye buri gihe mu gitondo, abatetsi bakaba bahishije igikoma n’umugati tukarya.

Imana izabampere umugisha, ishya n’ihirwe bizahore mu rugo rwabo”.

Umuyobozi w’Akarere ka Rusizi wungirije ushinzwe imibereho myiza y’Abaturage, Dukuzumuremyi Anne Marie, yashimiye Unity Club Intwararumuri.

Ahamya ko Akarere ka Rusizi nako kateguye igikorwa cyo kwifuriza ababyeyi b’Intwaza Noheli n’Umwaka mushya muhire wa 2024.

Agira ati “Ibyishimo burya ni ikintu gikomeye, kubiremera abantu ku munsi nk’uyu nk’ubuyobozi bw’Akarere ka Rusizi turabibashimiye”.

Ubuyobozi bw’Akarere ka Rusizi buvuga ko urugo rw’Intwaza buruba hafi mu bishoboka byose, haba mu byishimo baba bari kumwe ndetse no mu bibazo baba bari kumwe.

Ati: “Tubaremera ibitaramo bitandukanye kugira ngo bakomeze kugira icyizere cy’ubuzima kandi bakomeze banezerwe”.

Madame Jeannette Kagame yakomeje kuba ku isonga mu gukora ubuvugizi kuri izi Ntwaza.

Muri Nyakanga 2018, ubwo hatahagwa ku mugaragaro urugo rw’Impinganzima mu Karere ka Bugesera mu Ntara y’Iburasirazuba, yavuze ko bikwiye ko hajyaho uburyo bwo gucunga imitungo y’Intwaza.