Ruhango: Begerejwe umuyoboro w’amazi watwaye miliyoni 200 Frw basezera ibinamba

  • AKIMANA JEAN DE DIEU
  • Ugushyingo 23, 2023
  • Hashize amezi 6
Image

Abaturage bo mu Murenge wa Kinihira mu Karere ka Ruhango, basubije agatima impembero nyuma yo kwegerezwa umuyoboro w’amazi wa Nyiramuhebe – Kanzogera-Muyunzwe wuzuye utwaye amafaranga y’u Rwanda asaga miliyoni 200.  

Uyu muyoboro ufite ibilometero 11.46 ukaba ushamikiyeho amavomero 13 n’andi ane yasanwe, n’akazu k’amazi kamwe, byose bigeza amazi ku ngo zisaga 4 100.

Watangiye kubakwa muri Gicurasi urangira muri Nzeri 2023 ukaba witezweho kugeza amazi ku Ishuri Ryisumbuye rya APECAS Muyunzwe rifite abanyeshuri 674, Urwunge rw’Amashuri rwa Muyunzwe rufite abanyeshuri 770 ndetse n’Ikigo Nderabuzima cya Muyunzwe.

Abaturage bavuga ko hari hashize igihe kirekire bavoma amazi y’Umugezi wa Gisuma n’uwa Kiryango yabateraga indwara, bakishimira ko bahawe umuyoboro w’amazi meza basezera kunywa no gukoresha amazi yanduye.

Murenzi Daniel yavuze ko bahoranye umuyoboro w’amazi ukaza gupfa ari na byo byabateye kuyoboka amazi y’umugezi wa Gisuma nubwo yabateraga indwara zikomoka ku mwanda.

Yagize ati: “Twigeze guhabwa umuyoboro ariko twari tumaze igihe kirekire tutagira amazi, bituma rero tujya dushakisha amazi mu bishanga, tukavoma mu mugezi wa Gisuma, tukaba ariyo dukoresha ariko akanadutera indwara zikomoka ku mwanda harimo n’inzoka.”

Niyobuhungiro Elise we avuga ko bishimiye kongera guhabwa amazi meza agiye kubafasha kwirinda indwara zikomoka ku mwanda, ndetse n’abana bakaba batazongera gukererwa ku ishuri bagiye gushaka amazi kure.

Yagize ati: “Dushimishijwe n’uko twongeye kubona amazi meza kandi tuyitezeho ko agiye kudufasha kwirinda indwara zikomoka ku mwanda kuko twari dusanzwe tuvoma amazi mabi, ku buryo byanatinzaga abana bacu kujya ku ishuri mu gihe bagiye bagatinda kuvayo bitewe n’aho bagiye kudaha amazi.”

Abaturage bavuga ko kuvoma amazi y’ibishanga byabateraga indwara zituruka ku mwanda

Niyirora  Marie Claire avuga ko byabasabaga gukora ingendo ndende bajya gushaka amazi, ndetse mu gihe cy’imvura bakaba bararekaga amazi y’imvura akaba ari yo banywa.

Ati: “Ubusanzwe twajyaga kuvoma amazi kure ariko nko mu bihe imvura igwa ari nyinshi usanga bitugora kujya kuvoma nubwo dusanzwe tuyareka ubundi tukayayungurura kugira ngo tubashe kuyakoresha ngo twirinde ingendo twakoraga.  Ariko aya mazi baduhaye azadufasha kwirinda indwara zikomoka ku mwanda n’inzoka twajyaga turwara.”

Umuyobozi w’Akarere ka Ruhango Habarurema Valens, yashimiye abafatanyabikorwa bafasha Akarere mu kwegereza abaturage amazi meza, mu rwego rwo gushyira mu bikorwa gahunda y’ibyo bemerewe na Perezida wa Repubulika y’u Rwanda Paul Kagame, ko bagomba kwegerezwa abaturage bose  ibikorwa remezo.

Yagize ati: “Turashimira aba bafatanyabikorwa barimo Isoko y’Ubuzima yaje ikadufasha kwegereza abaturage bacu amazi meza, kandi badufasha muri gahunda y’ibikorwa yashyizweho na Perezida wa Repuburika Paul Kagame yo kwegereza abaturage bimwe mu bikorwa remezo birimo n’aya mazi agomba kubafasha kwirinda indwara zikomoka ku mwanda.”

Yongeyeho ko Umurenge wa Kinihira uri mu Mirenge ikiri inyuma y’indi kuko usanga ukiri ku kigero cyo hasi ya 65%, mu gihe Akarere ka Ruhango muri rusange kageze kuri 70% mu kwegereza amazi meza abaturage.

Umuyobozi wungirije w’Umushinga Isoko y’Ubuzima, Uwonkunda Bruce, avuga ko bakorera mu Turere 10 tw’u Rwanda mu bikorwa biteganyijwe ko bizatwara miliyari 21 z’amafaranga y’u Rwanda.

Yagize ati: “Dufite Uturere 10 turimo imishinga yacu ariko hano twegereje amazi abaturage bagera ku 4100 banywaga amazi mabi. Umushinga wacu ufite miliyari 21 zo gukoresha mu bikorwa by’imiyoborere mu bijyanye n’amazi isuku n’isukura, guteza imbere serivisi z’isuku n’isukura ku bikoresho bitandukanye.”

Akomeza asaba abaturage kurinda aya mazi kuko ni bo azagirira akamaro abasaba kudasubira kuvoma amazi mabi ashyira ubuzima bwabo mu kaga ndetse bakitabira kwimakaza  isuku ku mubiri, mu byo barya no ku myambaro bambara.

  • AKIMANA JEAN DE DIEU
  • Ugushyingo 23, 2023
  • Hashize amezi 6
TANGA IGITEKEREZO
Twagira says:
Ugushyingo 23, 2023 at 1:45 pm

Mumurenge wabweramana , Akagari ka Rubona natwe muzaduhe Amazi kukonatwe tubayehonabi

Andika igitekerezo

AMATEGEKO AGENGA IYANDIKA RY'IGITEKEREZO CYAWE