Rubavu: Basabwe kubyaza umusaruro ibikorwa remezo byatwaye miliyari 60 Frw

  • NTAWITONDA JEAN CLAUDE
  • Werurwe 18, 2024
  • Hashize ibyumweru 4
Image

Minisitiri w’Ibikorwa Remezo Dr Gasore Jimmy, yasabye abaturage bo mu Karere ka Rubavu kubyaza umusaruro ibikorwa remezo bubakiwe na Leta y’u Rwanda ku bufatanye na Banki y’Isi byatwaye miliyoni zisaga 47 z’amadolari y’Amerika, ni ukuvuga miliyari zirenga 60 z’amafaranga y’u Rwanda.

Yabigarutseho mu mpera z’icyumweru gishize ubwo yari mu Karere ka Rubavu muri gahunda yo gutaha no kumurika ku mugaragaro ibikorwa remezo birimo imihanda ya kaburimbo, amatara yo ku mihanda na ruhurura zubatswe mu buryo bujyanye n’igihe kandi zibasha guhangana n’ingaruka z’imihindagurikire y’ibihe.

Imihanda yatashwe yubatswe ku bilometero 43 n’amatara, ndetse na ruhurura zubatswe ku bilometero bitatu, mu masezerano y’icyiciro cya mbere cy’umushinga wari ugamijwe kongerera ibikorwa remezo Umujyi wa Kigali n’imiji yose yunganira Kigali mu kwihutisha iterambere.

Minisitiri Dr Gasore ashishikariza abaturage n’abashoramari kubyaza umusaruro ibyagezweho, anashima uruhare rwa buri wese kugira ngo bigerweho.

Yagize ati: “Ibi bikorwa remezo byaziye igihe birafasha mu kwihutisha iterambere ry’abaturage, urujya n’uruza rwarorohejwe. Ibikorwa remezo byongereye imishinga y’iterambere kuko biraborohereza.”

Yakomeza agira ati:”Iyi mihanda ndasaba ko ifatwa neza abaturage bayirinde umwanda, ahanyura amazi ntabwo hagomba gushyirwamo imyanda kuko bihagarika amazi akagaruka asenya imihanda. Ikindi amatara araka ubucuruzi bwongerwe, abahanga udushya ni umwanya mwiza turasabwa kubyaza umusaruro ibyo tugezeho.”

Guverineri w’Intara y’Iburengerazuba Dushimimana Lambert, yemeje ko ibikorwa remezo bimaze kugerwaho mu gice cya mbere cy’umushinga Leta y’u Rwanda ifatanyijemo na Banki y’Isi byafashije mu guhanga imirimo, guhangana n’ibiza n’ibindi bitandukanye bigamije kwihutisha iterambere.

Yashimye abikorera bafata neza ibikorwa remezo abasaba guhanga byinshi bakabyaza umusaruro bakomeje kubakirwa.

Yagize ati: “Imihanda yubatswe yarushijeho kuryoshya imijyi yacu, byaduhaye gutekereza kure kuko ni amahirwe twagize, ahantu hose harasa neza birimo birakurura abashoramari, birahanga imirimo myinshi urubyiruko cyane ruva mu bushomeri ndetse biratanga akazi n’amafaranga icyo dusabwa ni ukibibyaza umusaruro.”

Yemeje ko ibigiye gukomeza gukorwa bizazana izindi mpinduka ndetse bigasubiza n’ibindi bigikenewe n’abaturage.

Nyiraneza Everyne umwe mu baturage batuye mu Murenge wa Rugerero, ashima Leta y’u Rwanda ikomeje kubegereza iterambere binyuze mu bikorwa remezo ndetse ngo byatumye atangira ubucuruzi bumuteza imbere.

Aragira ati: “Imihanda twegerejwe yatumye iwacu hasa neza cyane. Nkimara kubona kaburimbo iriho amatara yaka byanteye gutangiza ubucuruzi ku muhanda, dukora na nijoro dufite umutekano, nta kwikanga abajura n’ibindi. Turashima ubuyobozi bwacu bwiza butugezaho ibyiza natwe tubwizeza kubibyuze umusaruro.”

Minisiteri y’Ibikorwa Remezo (MININFRA) yemeza ko ibikorwa byari mu gice cya mbere cy’umushinga Rwanda Urbanisation for  Development Prohect I byasojwe ndetse hagiye gukurikiraho icyiciro cya kabiri aho Akarere ka Rubavu kubatswemo kaburimbo inacaniye ku bilometero 10.

  • NTAWITONDA JEAN CLAUDE
  • Werurwe 18, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE