Rhénanie-Palatinat igiye guhugura urubyiruko rw’u Rwanda mu bumenyi bw’ibinyabuzima

  • NTAWITONDA JEAN CLAUDE
  • Mata 4, 2024
  • Hashize icyumweru 1
Image

Intara ya Rhénanie-Palatinat igiye gutangira gahunda nshya yo guhugura urubyiruko rw’u Rwanda mu birebana n’ubumenyi bw’ibinyabuzima (Bio Sciences), nk’igihugu cyateye imbere mu ikoranabuhanga riugezweho mu kwimakaza ubwo bumenyi.

Iyo gahunda nshya y’ubufatanye bw’u Rwanda n’iyo Ntara y’u Budage ni yo yabaye izingiro ry’ibiganiro Perezida wa Repubulika y’u Rwanda Paul Kagame yagiranye n’Umuyobozi w’Intara ya Rhénanie Palatinat Malu Dreyer, n’itsinda bazanye mu ruzinduko mu Rwanda kuri uyu wa Kane.

Ni uruzinduko rubaye mu gihe izo ntumwa zitabiriye umuhango wo kwibuka ku nshuro ya 30 Jenoside yakorewe Abatutsi mu 1994 uteganyijwe kuba ku Cyumweru tariki ya 7 Mata 2024 ahazatangizwa icyumweru cy’Icyunamo n’iminsi 100 yo kwibuka.

Gahunda y’ubufatanye bushya bw’Intara ya Rhénanie-Palatinat n’u Rwanda ibaye mu gihe uruganda rw’inkingo rufite icyicero muri iyo Ntara BioNTech rwubatse uruganda rw”inkingo n’imiti i Kigali mu Rwanda ryshingiye kuri iryo koranabuhanga rigezweho.

Mu gihe cy’icyorezo cya COVID-19, ikoranabuhanga rigezweho mu bumenyi bw’ibinyabuzima (bitotechnology) rya Rhénanie-Palatinat ryagaruye icyizere gikomeye mu batuye Isi kuko ryatanze igisubizo cyihuse cy’inkingo zetegerezwaga ko zashoboraga kuboneka mu myaka irenga 10.

Inkingo zakozwe na BioNTech ndetse na Mainz zatunguye Isi yose kuko zabonetse mu gihe gito cyane, ukaba ari umusaruro w’ubushakashatsi bwakozwe n’abahanga mu bya siyansi bo muri iyi Ntara ifitanye umubano ukomeye n’u Rwanda umaze imyaka 42.

Guverinoma y’u Budage igamije guteza imbere Intara ya Rhénanie-Palatinat nk’agace kaza imbere ku Isi mu kwimakaza ikoranabuhanga rigezweho mu bumenyi bw’ibinyabuzima.

Kugira ngo iyo ntego igereho, igishyizwe imbere ni ukwimakaza ubushakashatsi bw’ibanze nk’umusingi wo guhanga udushya tuzajya turushaho kwagurwa uko bukeye n’uko bwije.

Muri Gicurasi 2022, ubwo yifatanyaga n’abayobozi b’Intara ya Rhénanie-Palatinat n’abandi banyacyubahiro mu Budage mu kwizihiza isabukuru y’imyaka 40 y’ubucuti n’ubutwererane (Jumelage) n’u

Perezida Kagame yatangiye ashimira abaturage ba Rhénanie-Palatinat uruhare bagize mu iterambere ry’u Rwanda mu myaka 40 ishize bakorana n’Uturere dutandukanye tw’Igihugu mu buryo bwa Jumelage.

Yagize ati: “Uwo mubano wongererwa imbaraga n’ubufatanye bwiza mu iterambere u Rwanda rwishimira ko rufitanye n’u Budage muri rusange.”

U Rwanda rwishimira ko by’umwihariko ubwo bufatanye bwatanze umusaruro ufatika mu myaka 30 ishize hahagaritswe Jenoside yakorewe Abatutsi, cyane ko byabaye ngombwa ko Abanyarwanda bagira imyumvire itandukanye n’iyarangwaga mu Rwanda rwa mbere ya Jenoside no mu gihe yakorwaga.

Umubano w’u Rwanda n’Intara ya Rhenanie Palatina watangiye mu mwaka wa 1982 mu rwego rwo guharanira iterambere rishingiye ku muturage. Kugeza ubu mu buryo bw’ubufatanye bw’inzego z’ibanze, abayobozi 40 bo mu Ntara ya Rhenanie-Palatinat bakorana n’imirenge 160 yo mu Rwanda.

Mu birebana n’uburezi, amashuri 180 yo muri iyo ntara yahujwe n’ayo mu Rwanda aho bikorana bya hafi guhera mu mwaka wa 2020, kandi hari na kaminuza n’amashuri ya tekiniki 6 bikorana hafi na Kaminuza zo mu Rwanda.

Mu birebana n’ubuzima, ibitaro bya Kaminuza bya Mainz bifitanye imikoranire ya bugufi na bimwe mu bitaro byo mu Rwanda birimo n’ibya Kaminuza bya Butare.

Muri ubwo bufatanye, iyo ntara imaze gukorera mu Rwanda imishinga irenga 2300 mu byiciro bitandukanye kubera uguhanga udushya kw’abantu banyuranye babigizemo uruhare.

  • NTAWITONDA JEAN CLAUDE
  • Mata 4, 2024
  • Hashize icyumweru 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE