RDF yakiriye 30 bahagarariye inyungu za gisirikare mu Rwanda 

  • NTAWITONDA JEAN CLAUDE
  • Werurwe 27, 2024
  • Hashize ibyumweru 4
Image

Ubuyobozi bw’Ingabo z’u Rwanda (RDF) bwakiriye abahagarariye inyungu z’ibihugu byabo mu bya gisirikare, ababungirije ndetse n’intumwa z’Imiryango Mpuzamahanga bose hamwe bagera kuri 30. 

Kuri uyu wa Gatatu tariki ya 27 Werurwe 2024, ni bwo bakiriwe ku Birindiro Bikuru bya RDF hakaba no kuri Minisiteri y’Ingabo ku Kimihurura mu Karere ka Gasabo, aho bagejejweho imiterere y’umutekano w’u Rwanda n’uw’Akarere mu gihembwe cya mbere cy’uyu mwaka. 

Abakiriwe ni abahagarariye inyungu z’ibihugu 24 mu Rwanda bitimo Algeria, u Bubiligi, Canada, u Bushinwa, Repubulika ya Czech, Denmark, Misiri, u Bufaransa, u Budage n’u Buyapani. 

Nanone kandi hitabiriye Intumwa zihagarariye Ubwami bwa Yorodaniya, Kenya, Namibia, u Buholandi, Polonye, Repubulika ya Korea, u Burusiya, Suwede, Türkiye, Uganda, Ubwami bw’u Bwongereza, Leta Zunze Ubumwe z’Amerika (USA), Zambia, na Zimbabwe. 

Hanitabiriye kandi abahagarariye Komisiyo y’Umuryango w’Ubumwe bw’u Burayi (EU Commission), abahagarariye Umuryango Mpuzamahanga Utabara Imbabare (ICRC), ndetse n’abahagarariye Ingabo z’Umuryango w’Afurika y’Iburasirazuba zishinzwe gutabara aho rukomeye (EASF). 

Izo ntumwa zakiriwe n’Umuyobozi Mukuru w’Ishami rishinzwe Ubutwererane Mpuzamahanga mu Ngabo z’u Rwanda, Brig Gen Patrick Karuretwa.

Mu ijambo ryo kubaha ikaze, Brig. Gen. Karuretwa yabashimiye ko bakomeje gutanga umusanzu wabo mu butwererane bw’ibihugu byabo n’u Rwanda mu bya gisirikare. 

Yashimangiye kandi akamaro ko kubahezaho ishusho y’uko umutekano uhagaze mu kurushaho kwimakaza ubutwererane n’ubwumvikane mu bya gisirikare. 

Izo ntumwa zasobanuriwe impinduka nshya zakozwe mu mategeko agenga Ingabo z’u Rwanda ndetse n’izabaye mu buyobozi, imiterere y’umutekano mu gihugu no hanze yacyo hamwe n’ibikorwa bya RDF muri Mozambique no muri Repubulika ya Santarafurika. 

Abitabiriye bahawe umwanya uhagije wo kubaza ibibazo no gusobanuza, cyane cyane bibanda ku birebana n’umutekano wo mu Karere u Rwanda ruherereyemo. 

  • NTAWITONDA JEAN CLAUDE
  • Werurwe 27, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE