Rayon Sports yatsinze AS Kigali ikomeza gushimangira kuba ku mwanya wa mbere

Rayon Sports yatsinze AS Kigali ibitego 3-1 mu mukino w’umunsi wa 13 wa Shampiyona ikomeza gushimangira umwanya wa mbere ku rutonde rwa shampiyona.

Uyu mukino wabaye ku mugoroba wo kuri uyu wa Gatandatu tariki 14 Ukuboza 2024, Kuri Kigali Pele stadium.

Muri uyu mukino Rayon Sports yatangiye isatira izamu rya AS Kigali harimo uburyo bwabonetse ku munota wa 5 ku mupira Elanga yazamukanye ku ruhande rw’ibumoso, ashobora kuwugeza mu rubuga rw’amahina, usanga Fall Ngagne ari wenyine ashyizeho umutwe umupira ujya hanze y’izamu.

Ku munota wa 8, Rutahizamu wa AS Kigali Hussein Tchabalala yabonye uburyo imbere y’izamu ku mupira yatereye mu kibuga hagati ariko ujya kure cyane.

Ku munota wa 21, Rayon sports yahushije uburyo bw’igitego kuri Coup franc yatewe na Muhire Kevin, umupira usanga Diagne mu rubuga rw’amahina ashyizeho umutwe umupira ujya hanze.

Kugeza ku munota wa 30, amakipe yombi yakomeje gukinira umupira mu kibuga nubwo Rayon Sports arı yo yarmeye uburyo bwinshi bwo gutsinda igitego.

Ku munota wa 42, Rayon Sports yahushije kuri Coup franc yatewe na Adama Bagayogo acisha umupira hasi mu bakinnyi, Adolphe awukuramo ariko ujya ku bakinnyi ba Rayon Sports, Fall Ngagne asubijemo n’umutwe ariko ukubita umutambiko w’izamu ujya hanze.

Igice cya mbere cyarangiye amakipe yombi anganyije ubusa ku busa.

Mu gice cya kabiri, Rayon Sports yatangiranye impinduka Bassane Aziz yahawe umwanya asimbura Elenga Jr.

Ku munota wa 49,  Rayon Sports yafunguye amazamu ku gitego cyatsinzwe na Adama Bagayogo ku mupira wazamukanywe na Fall Ngagne mu kibuga hagati, awugeza kwa Serumogo Ally, nawe  uwuha Adama Bagayogo ahita ashyira mu nshundura.

Nyuma y’umunota umwe gusa Rayon Sports yatsinze igitego cya kabiri Fall Ngagne ku mupira watakajwe na Buregeya Prince, usanga Aziz Bassane wawuzamukanye, awugeza kwa Fall Ngagne ahita awushyira mu izamu.

Ku munota wa 58, AS Kigali yakoze impinduka Nkubana Marc na Ghislain Armel bahaye umwanya Ishimwe Saleh na Didier

Ku munota wa 63, AS Kigali yashoboraga kubona igitego cyo kwishyura ku mupira muremure Franklin Onyeabor yateye, awugeza kwa Iyabivuze Osee wari mu rubuga rw’amahina, ateye umupira n’umutwe ujya hanze.

Ku munota wa 77, AS Kigali yabonye Penaliti ku ikosa Akayezu yakorewe mu rubuga rw’amahina na Youssou Diagne.

Iyi Penaliti yatewe neza Iyabivuze Osee

Mbere y’uko umukino urangira Umusifuzi wa kane yashyizeho iminota itanu y’inyongera

Ku munota wa 90+5 Rayon Sports yatsinze igitego cya gatatu cyatsinzwe na Fall Ngagne n’umutwe ku mupira wavuye kuri Coup franc yatewe na Rukundo Abdulrahim ashyira umupira mu izamu.

Umukino warangiye Rayon Sports Itsinze AS Kigali ibitego 3-1, ikomeza gushimangira umwanya wa mbere ku rutonde rwa shampiyona n’amanota 33, ikurikiwe na APR FC ya kabiri n’amanota 25 mu mikino 12, AS Kigali ni iya gatatu n’amanota 23.

Ku cyumweru tariki 15 Ukuboza 2024 shampiyona izakomeza Gorilla FC izakira Kiyovu Sports saa cyenda z’amanywa kuri Kigali Pele Stadium.

Abakinnyi babanje mu kibuga ku mpande zombi

AS Kigali

Hakizimana Adolphe, Nkubana Marc, Akayezu Jean Bosco, Buregeya Prince, Franklin Onyeabor, Nshimiyimana Tharcisse, Rucogoza Elias, Ntirushwa Aimee, Ghislain Armel, Iyabivuze Osee na Shabani Hussein

Rayon Sports

Khadime Ndiaye (GK), Serumogo Ali, Bugingo Hakim, Nsabimana Aimable, Diagne Youssou, Ndayishimiye Richard, Kanamugire Roger, Muhire Kevin(C), Fall Ngagne, Adama Bagayogo na Elenga Kanga Jr.