Polisi yatangaje ko urugo rwa Victoire rutigeze ruzengurukwa

  • KAYITARE JEAN PAUL
  • Ukuboza 14, 2023
  • Hashize amezi 6
Image

Ku mbuga nkoranyambaga havuzwe ko urugo rwa Ingabire Victoire rwazengurutswe n’inzego z’umutekano. Ni ibintu Polisi y’u Rwanda yavuze ko ari ibihuha byo ku mbuga nkoranyambaga.

ACP Boniface Rutikanga, Umuvugizi wa Polisi, yabwiye Radio Ijwi ry’Amerika ko ibyo polisi yumvise, ari ibyo uko ngo urugo rwa Ingabire Victoire rwagoswe na polisi n’inzego zishinzwe umutekano.

Yavuze ko ibyavuzwe ku mbuga nkoranyambaga atari byo.

Ati “Ntabwo byari byo ariko ibihuha byo ku mbuga nkoranyambaga, turabimenyereye bikomeje kuba byinshi kandi ntacyo tuba twabikoraho.

Ntabwo urugo rwe rwigeze ruzengurukwa n’abashinzwe umutekano, ntawageze ku rugo rwe njye by’umwihariko sinzi aho atuye ariko birumvikana ko n’uwashaka kuhamenya ntabwo byananirana yahamenya ariko ntabwo mu by’ukuri urugo rwe ruzengurutswe nta na gahunda yo kuruzenguruka kuko nta n’impamvu yo kuruzenguruka”.

Polisi itangaza ko ikijyanye n’ibyo abandi bamaze iminsi bavuga kuri Victoire, ko ibyo ari ibyo ku mbuga nkoranyambaga.

Imbuga nkoranyambaga zatanze urubuga ku buryo buri muntu wese yisanzura akavuga icyo ashaka aho agishakiye n’igihe agishakiye, ngo ikiba gisigaye ni uguhagarara ku kuri, ubundi ubuzima bugakomeza.

ACP Rutikanga arakangurira abakoresheje imbuga nkoranyambaga bakwiza ibihuha ko ibyo bakora bitemewe.

Ati “[…] ariko uretse ko nta muntu urahamagarira undi ngo genda ukore iki, ni abavuga ibyifuzo n’ibitekerezo byabo, ikibazo cyaba igihe bashaka kubishyira mu bikorwa cyangwa hari umugambi wo gushyira mu bikorwa icyo kintu naho kuvuga bavuga buri munsi.

Uretse na Ingabire Victoire na Perezida wa Repubulika na we baramuvuga, na we baramutuka, ni ibintu mu by’ukuri ubona ko bimaze kumenyerwa ku mbuga nkoranyambaga kandi ko zatanze urubuga rwo kuvuga icyo buri wese yifuza, uko abishaka n’igihe abishakiye”.

Ku rundi ruhande ngo icyo Polisi ikurikirana, ni ukureba niba ibyo bivugwa bishyirwa mu bikorwa. Ahongaho ngo ni ho inzego zibikurikirana hakiri kare.

Agira ati “Icyenda kuba ni ho duhaguruka natwe tukagira icyo dukora cyo kurinda ubuzima bw’umuntu by’umwihariko abongabo baba bavuzwe”.

Ingabire Victoire na we ahamya ko urugo rwe rutigeze ruzengurukwa n’inzego z’umutekano kandi ko nta rwego na rumwe rwigeze rumuhamagara.

Mu kiganiro yahaye Radio Ijwi ry’Amerika yagize ati “Oya, urugo rwanjye nta muntu warugose rwose, nta muntu warugose, abantu barinjira bagasohoka nta muntu warugose nta n’urwego urwo ari rwo rwose rwaba rwamampagaye”.

  • KAYITARE JEAN PAUL
  • Ukuboza 14, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE