Polisi yasabye abaturage kwimakaza umutekano mu minsi mikuru

  • Imvaho Nshya
  • Ukuboza 24, 2023
  • Hashize amezi 5
Image

Polisi y’u Rwanda yasabye abaturage kuryoherwa n’ibi bihe by’iminsi mikuru bashyira imbere umutekano kurusha ibindi byose.

Umuvugizi wa Polisi y’u Rwanda ACP Rutikanga Boniface, yashimiye ubufatanye bagaragaje mu gihe cy’umwaka wose wa 2023, abahamagarira no kugaragaza ubufatanye muri ibi bihe by’iminsi mikuru hakirindwa ibishobora guhungabanya umunezero w’Abanyarwanda.

ACP. Rutikanga, yagize: “Ibihe by’iminsi mikuru bizana n’umunezero, haba urujya n’uruza ndetse n’ingendo zo mu muhanda zikiyongera. Ibi byose bishobora gukorwa hubahirizwa amategeko, kubahiriza amabwiriza, ndetse bakubahiriza uburenganzira bw’abandi”.

Yibukije abayobozi b’ibinyabiziga kubahiriza amategeko y’umuhanda no kwirinda ibyo ari byo byose bishobora guteza impanuka zo mu muhanda.

Ati: “Abashoferi hari ubwo bakoresha umuvuduko ukabije muri ibi bihe bagashyira ubuzima bw’abagenzi batwaye mu kaga, rimwe na rimwe bikarangira hari abahaburiye ubuzima.

Nubwo Polisi izakomeza inshingano zo guharanira umutekano, abashoferi na bo barasabwa gutwara neza cyangwa bagahitamo gutwara ibinyabiziga mu buryo bushimangira umutekano w’abakorasha umuhanda bose. Gahunda ya Gerayo Amahoro ikwiye kubabera ihame”.

ACP Rutikanga yibukije abatwara ibinyabiziga cyane cyane muri ibi bihe dusatira iminsi mikuru isoza umwaka, kwirinda amakosa arimo gutwara banyoye ibisindisha, kugendera ku muvuduko urenze uwagenwe, gutwara umubare w’abantu urenze uwo ikinyabiziga cyagenewe gutwara no kutabangamira abandi basangiye umuhanda.

Yasabye kandi abatwara amagare kwirinda gufata ku makamyo, kudatwara imizigo irenze ubushobozi bw’igare, kutarenza saa kumi n’ebyiri z’umugoroba bakiri mu muhanda n’andi makosa ashobora kubateza impanuka.

Yagize ati: “Icyo abakoresha umuhanda bakenerwaho ni uko bagenda neza bakagera aho berekeje amahoro. Ibyo ntabwo byagerwaho mwese mutabigizemo uruhare ngo buri wese mu cyiciro arimo yitwararike, yirinda ikintu cyose cyahungabanya umutekano wo mu muhanda.”

Iliza Sonia, Umukozi wa SP-Rwanda ushinzwe amasoko, yashimiye Polisi y’u Rwanda kuri Gahunda ya Gerayo Amahoro, avuga ko bifuje ubufatanye mu kwibutsa abatwara ibinyabiziga kuyubahiriza mu rwego rwo kwirinda impanuka.

Ati: “Twahisemo gukorana na Polisi mu bukangurambaga bwa Gerayo Amahoro, dushingiye ko mu bihe by’iminsi mikuru usanga hari ingendo nyinshi kandi abantu baba bafite mu mitwe yabo kwihuta ngo bagere vuba aho bajya, kugira ngo dutange ubutumwa bufasha abatwara ibinyabiziga benshi batugana, kubahiriza amategeko y’umuhanda birinda impanuka zishobora no kubavutsa ubuzima bigatuma ejo cyangwa ejo bundi batagaruka.”

Buri mwaka Isi yose itakaza abantu bagera kuri miliyoni 1 n’ibihumbi 300, bazize impanuka zo mu muhanda nk’uko bitangazwa n’Umuryango Mpuzamahanga wita ku buzima (OMS).

Ubukangurambaga bwa Gerayo Amahoro bugamije gushishikariza abakoresha umuhanda kugira imyitwarire yimakaza umutekano wo mu muhanda hirindwa icyateza impanuka cyose ku bw’amahitamo kugeza bibaye umuco.

Bwatangijwe mu mwaka wa 2019, buza guhagarikwa n’icyorezo cya COVID-19, mu mwaka wa 2020 nyuma y’ibyumweru 39, bwongeye gusubukurwa mu kwezi k’Ukuboza 2022, bukaba bukomeje hose mu gihugu buri wese asabwa kumva ko umutekano wo mu muhanda uri mu nshingano ze.

  • Imvaho Nshya
  • Ukuboza 24, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE