Perezida Kagame yashimye ubwitange bw’abayoboye amavugurura ya AU

  • NTAWITONDA JEAN CLAUDE
  • Gashyantare 8, 2024
  • Hashize amezi 4
Image

Perezida wa Repubulika y’u Rwanda Paul Kagame, yashimye intambwe yatewe mu myaka umunani ishize n’Urwego rushinzwe amavugurura mu Muryango w’Afurika Yunze Ubumwe (AU), abereye Umuyobozi.

Yagaragaje ko urwo rwego rwashyizweho AU itakigira n’urwara rwo kwishima, ariko ubu Ikigega cy’Amahoro cy’Afurika kirimo hafi miliyoni 400 z’Amadolari y’Amerika ndetse ibihugu hafi ya byose bikomeje kwishyura inkunga byiyemeje yari itaratangwa.

Perezida Kagame yabigarutseho kuri uyu wa Kane tariki ya 8 Mutarama 2024, ubwo yafatanyaga n’Umuyobozi wa Komisiyo y’Umuryango w’Afurika Yunze Ubumwe (AUC) Moussa Faki Mahamat, kuyobora ibiganiro byahuje itsinda ry’urweo rwegpo rwashyiriweho gukora amavugurura mu mikorere ya AU.

Perezida Kagame yagize ati: “Mbere ya byose mbahaye ikaze kandi mbashimira cyane kuba mudahwema gutanga umusanzu muri urwo rugendo rwo kuvugurura AU. Icy’ingenzi kandi, ndifuza kubashimira ukwiyemeza kwanyu kudasanzwe mwagaragaje mu myaka 8 ishize. Umurimo wacu wagaragaje impinduka nziza, ni ko nibwira.”

Yakomoje ku buryo urugendo rw’amavugurura ubwo rwatangizwaga nta cyizere cy’uko ayo mavugurura yashoboraga kuzana impinduka cyari gihari, urebye uburyo hari n’ibindi byinshi byageragejwe bikanga.  

Yahishuye ko kugeza ubu imyanzuro myinshi yafashwe mu mavugurura yashyizwe mu bikorwa, nubwo hakiri imyanzuro imwe n’imwe igikomeye kuyishyira mu bikorwa.

Muri iyo myanzuro harimo kuvugurura inzego no gusangira imirimo n’Imiryango y’ubukungu ya buri Karere.

Yakomeje agira ati: “Ariko hari intambwe imaze guterwa, kandi dutegerezanyije amatsiko amakuru mashya ya Komisiyo ku birimo gukorwa ubu. Amavugurura no kunoza Umuryango w’Afurika Yunze Ubumwe ni urugendo rukomeza. Ntibitangira cyangwa ngo bisozwe n’umurimo wacu.”

Yavuze ko urebye intambwe imaze guterwa, ubu hari icyizere cyo gufata ingamba zirushijeho kuba nziza kandi zitanga umusaruro, ari na yo mpamvu asanga igihe kigeze ngo Urwego rwashyiriweho gukurikirana amavugurura rusubize inshingano inzego za AU zizakomeza gufatanya n’ibihugu bihuriye muri uyu Muryango.  

Iyo nama y’uyu munsi yakozwe hifashishijwe ikoranabuhanga, aho Perezida Kagame na Moussa Faki bari i Kigali, bavugana n’abagize urwo rwego rushinzwe amavugurura bari mu bice bitandukanye.

Ni inama mu gihe hategurwa indi isanzwe ya 37 ihuza Abakuru b’Ibihugu na Guverinoma izaba mu cyumweru gitaha ku ya 17 n’iya 18 Gashyantare 2024, iteganyijwe kubera imbonankubone i Addis Ababa muri Ethiopia.

Perezida Kagame ni we wahawe inshingano n’Abakuru b’Ibihugu by’Afurika zo kuyobora amavugurura y’Umuryango w’Afurika Yunze Ubumwe (AU).

Inama yayoboye uyu munsi yasuzumye ishyirwa mu bikorwa ry’amavugurura ndetse baganira ku kamaro k’iterambere rirambye riganisha ku Muryango w’Afurika Yunze Ubumwe ukora neza kandi uharanira kubaka ubukungu burambye.

Inama y’Abakuru b’Ibihugu na Guverinoma iteganyijwe mu cyumweru gitaha, izabanzirizwa n’Inama ya 44 y’Abaminisitiri izaba ku ya 14-15 Gashyantare na yo izaba ikurikiye iya ba Ambasaderi yabaye ku ya 15-26 Mutarama uyu mwaka.

Isanganyamatsiko y’uyu mwaka izibanda ku burezi nk’umusingi w’amajyambere arambye, ariko hazanagarukwa no ku zindi ngingo zirimo umutekano muke n’amakimbirane yabaye akarande mu bice bitandukanye by’Afurika, hazanagarukwa ku rugendo rwatewe mu mavugurura y’inzego ndetse n’ay’ubukungu, hamwe n’urugendo rw’ishyirwa mu bikorwa ry’Isoko Rusange ry’Afurika (AfCFTA).

Amafoto: Village Urugwiro

  • NTAWITONDA JEAN CLAUDE
  • Gashyantare 8, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE