Perezida Kagame yanenze abanyabubasha buhambaye batabukoresha neza

  • NTAWITONDA JEAN CLAUDE
  • Gashyantare 12, 2024
  • Hashize amezi 3
Image

Uko imyaka ishira indi igataha, mu bice binyuranye by’Isi, ishyano rishimburwa n’irindi, intambara zigasimburwa n’izindi rimwe na rimwe zikomeye kurusha izabanje, ariko icyo abantu basigarana ni imvugo z’uko bigeye ku hahise ariko bikaba bitagaragara mu bikorwa byabo.

Perezida wa Repubulika y’u Rwanda Paul Kagame, yanenze  bihugu by’ibihangange n’abayobozi bafite ubuhasha buhambaye ku Isi batigira ku mateka y’ahahise ngo bakoreshe ubwo bubasha n’imbaraga bafite mu gukumira no guhagarika amakimbirane n’intambara bikomeje kuba akarande mu bice bitandukanye by’Isi.

Umukuru w’Igihugu cy’u Rwanda yabigarutseho mu gitondo cyo kuri uyu wa Mbere tariki ya 12 Gashyantare 2024, mu kiganiro yagiranye n’umunyamakuru wa CNN Eleni Giokos, mu nama ya za Guverinoma z’Isi iteraniye i Dubai ku nshuro ya 11.

Iyo nama izasoza ku wa 14 Mutarama 2024, igamije gushimangira uruhare rw’ibihugu bitandukanye ku Isi mu gusubiza ibibazo byugarije abayituye.

Umunyamakuru Giokos yabajije Perezida Kagame ibibazo byibanze ku masomo abatuye Isi bakabaye bigira ku byabaye mu Rwanda n’ahandi ku Isi bakiga guhagarika amakimbirane.

Perezida Kagame yagaragaje ko abatuye Isi bavugisha umunwa ko hari amasomo bakura mu byabaye ariko ibikomeza kuba bikagaragaza ko nta kintu bize.

Yagize ati: “Amasomo yizwe buri gihe avugwaho, ariko sinjya mbona benshi biga amasomo dukwiye kuba twigira ku mateka, ku bintu byinshi byabaye mu bihe bitandukanye.”

Yakomoje ku buryo mu myaka 30 ishize u Rwanda rwanyuze mu bihe byijimye kurusha ibindi mu kinyejana cya 20 ubwo habaga Jenoside yakorewe Abatutsi yahitanye abasaga miliyoni imwe mu minsi 100, ariko bisa nk’aho amasomo yasigaye hari benshi batabyize kuko intandaro y’ibyabaye ikizenguruka no mu bindi bihugu. 

Yagize ati: “Ku birebana n’u Rwanda, ibyo wavuze byabaye, twagize ibihe byijimye by’ikinyejana kandi ntabwo higeze habaho ubukangurambaga buhagije kugira ngo ibyabaga bihagarare, ntabwo byakumiriwe. Ariko nibura twasigaranye amahirwe yo kubyigiraho. Ubwacu twarize, Isi yari ikeneye kwiga, ariko iyo urebye ibintu byinshi birimo kuba ku Isi, wibaza niba mu by’ukuri amasomo yarizwe.”

Yavuze ko amakimbirane, intambara, za kudeta n’akandi karengane kugarije Isi katakabaye kabaho iyaba abanyembaraga n’abakomeye ku Isi bakoresha ububasha bwabo mu kubikumira no kubihagarika mu maguru mashya.

Ati: “Bivuze ko ububasha, n’ubutware ibihugu bimwe na bimwe bifite mu maboko yabyo budakoreshwa neza. Ni yo mpamvu tukibona amakimbirane, umutekano muke, kubura ubuzima ku rwego tubibonamo buri munsi.  Ibihugu, Uturere, imiryango mpuzamahanga, byakabaye byarahabaye na mbere hose mu guharanira ko hari ubushobozi bwo gukumira ibi bintu bitwara ubuzima bw’abantu nk’aho nta gaciro ubuzima bufite. Hari ukubikumira cyangwa se kubihagarika mu maguru mashya aho byaba bibaye hose. Ariko ibyo ntitubona biba, bityo harimo ikibazo gikomeye ku bantu bafite ububasha buhambaye mu biganza byabo, bafite ushobozi bwose bushoboka bakoresha ngo ibyo bishoboke, ariko ntibiba.”

Yakomeje ashimangira ko umuti wa mbere ari ugusubira ku isoko maze abantu bagaha agaciro iby’ibanze nko kwimakaza uburinganire, kurwanya ivangura n’amacakubiri no kwima umwanya abayobozi bashyira imbere Politiki y’ivangura n’amacakubiri mu bice bitandukanye by’Isi.

Kuba hakiri intambara, inzangano n’ivangura ku Isi, Perezida Kagame yavuze ko ari ikimenyetso cy’uko Isi itigira bihagije ku biyibaho, n’ibyayibayeho mu gukumira ko byakongera kuba. 

Hari aho bigera ukimenya, isomo u Rwanda rwize

Nubwo amahanga yaba atarabonye isomo rihagije by’umwihariko ku byabaye mu Rwanda mu myaka 30, Perezida Kagame yashimangiye ko u Rwanda rwabikuyemo amasomo menshi.

Irya mbere muri ayo masomo ni uko rudakwiye gutezuka ku kubaka ubushobozi kuko iteka habaho igihe umuntu cyangwa igihugu kiba kigomba kwimenya, kikirwanaho, mu gihe abandi barebera cyangwa bazarira mu gufata ibyemezo mu bihe by’amage. Yavuze ko hashingiwe ku byabaye mu mateka, Afurika idashobora gutera imbere mu gihe hari abakiyibona nk’aho ibereyeho gufatirwa ibyemezo, ikagendera ku murongo washyizweho n’abandi.

Guha Afurika umwanya wayo ku meza y’ibiganiro biharanira iterambere ry’Isi yose, ni ikintu Perezida Kagame ashimangira ko cyatinze gukorwa kuko ari umugabane ukungahaye kurusha iyindi kandi ufite n’abaturage bafite imbaraga Isi yose ikeneye muri iki kinyejana.

Yasabye Abanyafuriuka kwishyira ku murongo bagafatanya, bakagira ijwi rimwe kandi rikomeye, kugira ngo babashe kubyaza umusaruro ubutunzi busaze bafite.

Ati: “Kubera iki tutabubyaza umusaruro ku buryo Isi yose itubonamo inyungu zo gukorana na twe mu buryo bwumvikanyweho aho kubwira abantu ngo babakurikire. Ikindi, ububasha bufitwe n’ibihugu byinshi muri iyi Si bukwiye na bwo kuba bukoreshwa mu buryo bwumvikana kandi bwiza.

Kandi bakumva ko Afurika ari ingenzi cyane nk’uko na bo ari ingenzi.  Afurika ntiriho gusa kugira ngo itegekwe ibyo ikora, cyangwa ihitirwemo aho iherera hashingiwe ku mirongo bashyizeho. Ibyo bintu bibiri bikwiye gukemuka.”

Kudeta n’ikizitera, amasomo yirengagizwa Perezida Kagame yashimangiye ko ku birebana na kudeta, usanga byorohera abantu kuzamagana aho zabaye bavuga ko ari ibintu bidakwiriye, ariko bakirengagiza impamvu shingiro zizitera kuko batigiye ku masomo y’ahahise.

Ati: “Ariko nanone dukwiye kwibaza. Twumva ko izo kudeta zikomeza kuba, bivuze ko hari ikintu kibura. Ibyo bidutera gusubira ku nkomoko yabyo. Akenshi biterwa n’impamvu ebyiri. Iya mbere, urabona abantu bavuga ku buyobozi n’ibindi, ubuyobozi bukwiye kurebwa mu buremere abari mu buyobozi babuha mu guharanira gukora mu nyungu z’abaturage no ku iterambere ryabo.”

Impamvu ya kabiri, Perezida Kagame yavuze ko ishingiye ku miyoborere yaba bayobozi basabwa gushyira imbere inyungu z’abo bayobora kurusha izabo bwite.

Yavuze ko ntawukwiriye kurebera kudeta mu ndorerwamo z’abasirikare bambura ubutegetsi ubuyobozi bwa gisivili, ahubwo bikwiye kureberwa ku kibura cyatumye bigera aho.

Perezida Kagame yanagarutse ku gaciro ko kuba Afurika igomba kwihutisha iterambere ry’inganda kubera ko imaze igihe kinini yaratinze gutangira urwo rugendo, ari na yo mpamvu ikungahaye ariko akaba ari wo mugabane ukennye kurusha iyindi.

Yavuze kandi ko Afurika ikwiye gufatwa mu bubasha ifite kugira ngo Abanyafurika bakore ibyabo bibagirira umumaro kandi binafashe Isi yose muri rusange, kuko nta kintu na kimwe uyu mugabane ubura ku buryo utakwifatira ibyemezo.

  • NTAWITONDA JEAN CLAUDE
  • Gashyantare 12, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE