Perezida Kagame yakiriye abayobozi bitabiriye Inama ihuza UK n’u Rwanda

  • NTAWITONDA JEAN CLAUDE
  • Mutarama 30, 2024
  • Hashize amezi 4
Image

Ku gicamunsi cyo ku wa Mbere, Perezida wa Repubulika Paul Kagame yahuye n’Intumwa ya Minisitiri w’Intebe w’u Bwongereza mu Bucuruzi Lord Popat na Komiseri ushinzwe Ubucuruzi n’Afurika John Humphrey, bitabiriye Inama y’Ubucuruzi ihuza u Rwanda n’u Bwongereza (UK).

Iyo nama ibera i Kigali irahuriza hamwe abayobozi b’inzego z’ubucuruzi mu Rwanda no mu Bwami bw’u Bwongereza, abashoramari, abahagarariye Guverinoma ndetse n’impuguke mu bucuruzi. 

Abo bayobozi baraganira ku mahirwe atandukanye y’ubucuruzi n’ishoramari n’ubufatanye bw’ibihugu byombi bugamije kwihutisha iterambere mu nyungu z’abaturage babyo. 

Ku mugoroba wo ku wa Mbere, Guverinoma y’u Rwanda yakiriye ku meza  abo bayobozi basangiye banaganira, ku munsi wa mbere w’iyo nama izasoza kuri uyu wa Gatatu tariki ya 31 Mutarama 2024.

Ni ibiganiro byitabiriwe n’abo bayobozi bakiriwe na Perezida Kagame, Ambasaderi w’u Bwongereza mu Rwanda Omar Daair n’Umuyobozi Mukuru ushinzwe Ubukerarugendo mu Rwego rw’Igihugu rushinzwe Iterambere (RDB) Michelle Rugwizangoga.

Abo bayobozi bose bahamagariye abitabiriye inama y’ubucuruzi ihuza UK n’u Rwanda kurushaho gusuzuma amahirwe y’ishoramari arangwa mu bukungu bw’u Rwanda bushingiye ku kubungabunga ibidukikije, mu mabuye y’agaciro, ubuhinzi, ibikorwa remezo. Inganda, urwego rw’imari ndetse na serivisi.

Amb. Omar Daair yagize ati: “Twishimiye kwitabira Inama ihuza u Rwanda na UK iduha amahirwe yo kurushaho gusobanukirwa amahirwe y’ubucuruzi ari mu Rwanda mu nzego zirimo ubuhinzi, ibikorwa remezo, imari n’ikoranabuhanga.”

Rugwizangoga na we yabwiye abitabiriye  ati: “Muri iyi minsi ibiri, muzarushaho gusobanukirwa amahirwe y’ishoramari ari mu Rwanda, muzumva ubuhamya bw’abashoramari b’Abongereza bahiriwe n’isoko ry’u Rwanda ndetse munasobanukirwe uko gushora imari mu Rwanda byungura, bitekanye kandi biramba.”

Uretse abayobozi bakiriwe na Perezida Kagame, iyi nama iranitabirwa na Dr. Alastair Mcphail, Intumwa y’u Bwongereza mu Nama ihuza UK n’Afurika ya 2024, na Nicola Watkinson, Umuyobozi Mukuru wa International TheCityUK. 

  • NTAWITONDA JEAN CLAUDE
  • Mutarama 30, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE