Perezida Kagame afitiye icyizere abaturage bazatora uyobora u Rwanda

  • NTAWITONDA JEAN CLAUDE
  • Gashyantare 12, 2024
  • Hashize ibyumweru 3
Image

Mu gihe amatora ya Perezida wa Repubulika n’ay’Abadepite mu Rwanda ategerejwe gutangira ku ya 15 Nyakanga 2024, Perezida Paul Kagame yongeye gushimangira icyizere afitiye Abanyarwanda mu guhitamo umuyobozi wujuje ibisabwa byose mu kubayobora.

Perezida Kagame yongeye gushimangira icyizere afitiye icyemezo cy’abaturage mu kiganiro yagiranye na Eleni Giokos, Umunyamakuru wa wa CNN, mu nama ya za Guverinoma z’Isi iteraniye i Dubai ku nshuro ya 11.

Asoza ikiganiro bagiranye, umunyamakuru yifashishije urugero rwa Perezida wa Leta Zunze Ubumwe z’Amerika uheruka kuvuga ati: “Ni njye muntu wujuje ibisabwa kurusha abandi kuri kano kazi, ndashaka kurangiza ibyo natangiye,” abaza Perezida Kagame niba na we yibona nk’umuntu wujuje ibisabwa ngo akomeze kuyobora u Rwanda.

Abajijwe niba yiteguye kongera kuyobora u Rwanda, Perezida Kagame yavuze ko amahitamo y’abaturage ari yo azashimangira ufite ubushobozi bwo gukomeza kubayobora.

Yagize ati: “Yego, amatora abereyeho gufasha abaturage guhitamo niba abo batora babereye gukomeza gukora ako kazi. Tuzareba.  Amajwi yabo afite agaciro kandi n’amateka ni uko; bityo tuzamenyera ukuri mu bizayavamo.”

Ingengabihe y’Amatora y’Umukuru w’Igihugu n’ay’Abadepite yatangajwe tariki 11 Ukuboza 2023, akaba ari ku nshuro ya mbere ayo matora agiye kubera rimwe ndetse inzego zombi zikaba zizatorerwa kuyobora manda y’imyaka itanu.

Komisiyo y’Igihugu y’Amatora yashimangiye ko nyuma yo guhuzwa hagamijwe kugabanya ikiguzi byatwaraga ngo amatora abe.

Iteka rya Perezida rivuga ko umunsi w’itora rya Perezida wa Repubulika n’itora ry’Abadepite 53 batorerwa kuri lisiti y’amazina ndakuka y’abakandida batangwa n’imitwe ya politiki cyangwa biyamamaza ku giti cyabo tariki ya 14 Nyakanga 2024 ku Banyarwanda batorera hanze y’u Rwanda.

Ni mu gihe Abadepite batorwa n’Inzego amatora yabo azaba tariki 16 Nyakanga 2024, ni ukuvuga gutora Abadepite 24 b’abagore batorwa n’inzego zihariye, babiri batorwa n’Inama y’Igihugu y’Urubyiruko; n’Umudepite umwe utorwa n’Inama y’Igihugu y’Abantu bafite Ubumuga.

Kwiyamamaza kw’abakandida mu itora rya Perezida wa Repubulika no mu itora ry’Abadepite bizatangira ku wa Gatandatu tariki ya 22 Kamena 2024 bisozwe tariki 12 Nyakanga 2024 hanze y’u Rwanda na tariki 13 Nyakanga imbere mu gihugu.

Amatora ya Perezida yaherukaga tariki 3 na 4 Kanama 2017, ubu akaba agiye kuba ku nshuro ya kane, mu gihe ay’Abadepite aheruka yabaye tariki 2 na 3 Nzeri 2018.

Mu gihe Perezida Kagame afitiye abaturage icyizere, Abanyarwanda batuye mu bice bitandukanye ku Isi na bo ntibahwema kugaragaza ko bifuza gukomeza kuyoborwa n’abayobozi bafite icyerekezo cyiza ku gihugu mu gusigasira ibyagezweho no gukomeza kubera Isi yose intangarugero.

  • NTAWITONDA JEAN CLAUDE
  • Gashyantare 12, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE