Nyuma y’uruzinduko rwa Perezida Kagame, Polisi y’u Rwanda n’iya Dubai byiyemeje gufatanya

  • ZIGAMA THEONESTE
  • Werurwe 8, 2024
  • Hashize ukwezi 1
Image

Polisi y’u Rwanda n’iya Dubai muri Leta Zunze Ubumwe z’Abarabu (UAE), zashyize umukono ku masezerano y’ubufatanye mu kubaka ubushobozi n’ibikorwa bigamije gucunga umutekano.

Ni amasezerano aje akurikira uruzinduko Perezida wa Repubulika y’u Rwanda Paul Kagame aheruka kugirira i Dubai, aho yanyuzwe n’imikorere ya Polisi ya Dubai nyuma yo gusura  Ibirindiro Bikuru byayo akerekwa ikoranabuhanga rigezweho ikoresha n’udushya yahanze mu gucunga umutekano w’abantu n’ibyabo.

Ibikorwa byo gusura Ibirindiro Bikuru bya Polisi ya Dubai byabaye mu gihe Perezida Kagame yari yitabiriye Inama yahuje Guverinoma zo ku Isi yabereye i Dubai ku wa 12 kugeza ku ya 14 Gashyantare 2024.

Ku wa Kane tariki ya 7 Werurwe, ni bwo Polisi z’ibihugu byombi zihagarariwe n’Umuyobozi Mukuru wa Polisi y’u Rwanda (IGP) CG Felix Namuhoranye n’Umuyobozi wa Polisi ya Dubai Lt. Gen. Abdullah Khalifa Al Marri, zemeje imikoranire mu kubaka ubushobozi.

Ni mu ruzinduko rw’akazi IGP Namuhoranye n’itsinda ry’intumwa ayoboye bagiriraga muri iki gihugu, ahaberaga inteko rusange ya Polisi Mpuzamahanga n’imurikabikorwa mu gihe cy’iminsi itatu, mu kigo Mpuzamahanga cy’Ubucuruzi mu Mujyi wa Dubai, yasojwe kuri uyu wa Kane tariki ya 7 Werurwe.

Aya masezerano akubiyemo ubufatanye bw’inzego zombi za Polisi mu bijyanye n’amahugurwa no gusangira ubunararibonye; kungurana ubumenyi mu bijyanye no gucunga umutekano n’ituze rusange, kurwanya ibyaha byambukiranya imipaka n’iterabwoba, uburyo bwo kugenza ibyaha, gushakisha ibimenyetso bya siyansi byifashishwa mu butabera, ikoranabuhanga, gukoresha imbwa zifashishwa mu gusaka, gucunga umutekano wo mu muhanda n’ibindi.

Mu biganiro byahuje inzego zombi, abayobozi ba Polisi bashimye ubufatanye busanzweho biyemeza kwihutisha gushyira mu bikorwa ibikubiye mu masezerano yashyizweho umukono.

Intumwa z’u Rwanda kandi zasuye ibigo bya Polisi ya Dubai bitandukanye birimo; Ikigo cy’ikoranabuhanga mu kugenzura no gucunga umutekano, Sitasiyo ya Polisi ikora mu buryo bw’ikoranabuhanga, Ikigo gitangirwamo amahugurwa yo gukoresha intwaro na tekiniki n’ibindi.

Inteko rusange ya Polisi Mpuzamahanga y’iminsi itatu yahurijwe hamwe n’imurikabikorwa, yitabiriwe n’abayobozi ba Polisi n’abandi bayobozi baturutse mu bihugu birenga 65, barimo n’abamurikabikorwa.

Ku nsanganyamatsiko igira iti: “Guhuza inzego za Polisi hagamijwe kubaka ejo hazaza hatekanye”.

Ni Inteko rusange yibanze ku iterambere n’imbogamizi zikigaragara ku mutekano, uburyo bwo gukemura ibibazo bibangamira ibikorwa byo kurwanya ibyaha no gucunga umutekano binyuze mu guteza imbere ubufatanye no guhanahana amakuru hagati y’inzego za Polisi ku rwego mpuzamahanga.

  • ZIGAMA THEONESTE
  • Werurwe 8, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE