Nyarugenge: 10% ntibarakemurirwa ibibazo by’ubutaka

  • KAMALIZA AGNES
  • Werurwe 2, 2024
  • Hashize amezi 2
Image

Abagera ku 10 % bo mu Karere ka Nyarugenge mu Mujyi wa Kigali ntibarakemurirwa ibibazo bijyanye n’ubutaka birimo kububaruza ndetse n’ihererekanya ryabwo.

Ni ukuvuga 629 muri 746 bangana na 90%, ni bo bakemuriwe ibibazo by’ubutaka mu cyumweru cyahariwe ubutaka mu Karere ka Nyarugenge cyasojwe kuri uyu wa 01 Werurwe.

Umuyobozi Mukuru w’Ikigo cy’Igihugu gishinzwe Imicungire y’Ubutaka Nishimwe Marie Grace yagize ati: “N’ikintu cyose ugiye gukora, jya ubanza urebe amakuru y’ubwo butaka, ubutaka ni umutungo kamere w’igihugu kandi ni n’umusingi w’iterambere. Nkuko imibare ibigaragaza mu bantu barenga  700  basabye serivise abagera kuri 90% muri bo barayihawe, rero n’abandi batarayibona ntabwo gutanga serivise z’ubutaka birangiye murakomeza mwegere ababafasha bikomeze kubarinda kujya mu makimbirane.”

Bamwe mu baturage bakemuriwe ibibazo by’ubutaka bavuga ko bari babangamiwe no kuba bimwe mu bibazo bari bafite birimo n’ubutaka  butabaruye byakemutse, bagashishikakariza bagenzi babo batarakemurirwa ibibazo gukomeza kwegera inzego zibishinzwe.

Bavuga ko hari amakuru menshi batari basobanukiwe ajyanye n’ubutaka bafite icyo bwagenewe gukorerwaho ariko ubu bakaba bamaze gusobanukirwa.

Habarugira Schadrack ni umwe mu bari baraguze ubutaka akamara umwaka atarabwiyandikishaho, ibi bikaba byaramuteraga igihombo kuko ntacyo yashoboraga kuba yabukoreraho.

Ati: “Kutandikwaho ubutaka naguze byatuma ntacyo nabukoreraho ndetse nta nubwo nari kubutangaho ingwate ngo mbone inguzanyo muri banki.”

Habarugira avuga ko mu gihe cy’umwaka wose yamaze ntacyo ubu butaka bwigeze bumumarira kuko nta cyangombwa cyabwo yagiraga, gusa ubu akaba agiye kububyaza umusaruro.

Kayitesi Marry nawe avuga ko hari abashakaga kumuriganya ubutaka bwe bitewe n’ibyangombwa byabwo atari afite. Ariko ubu yemeza ko ntawamunyanganya uko yiboneye kandi ubu yemerewe no kubugurisha.

Ati: “Umutungo wanjye uranditse ntawanyiba kandi nemerewe kugurisha nta nkomyi”.

Yongeyeho ko yasobanukiwe aho ubutaka bwe buri niba haragenewe imiturire, amashyamba cyangwa ari aho guhingwa.

Umuyobozi Mukuru w’Ikigo cy’Igihugu gishinzwe Imicungire y’Ubutaka (NLA) Nishimwe Marie Grace, avuga ko bikwiye ko abantu bagira amakuru ku butaka haba ubwabo bwite ndetse nubwo bagiye kugura, kuko bibarinda kugwa mu bihombo n’amakimbirane.

Ati: “Ubutaka burahinduka n’imiterere yabwo irahinduka bitewe na serivise zibukorerwaho zitandukanye, hari ababutangaho impano, kugurishwa n’ibindi. Icyo ugomba kumenya ni amakuru ajyanye n’ubutaka ushaka kugura, ukamenya n’igishushanyo mbonera cy’ubwo butaka bikurinda kungwa mu bihombo.”

Mu gihugu hose habaruye ubutaka bungana na 11 500 000 mu gihe 1 400 000 butari bufitiwe amakuru ya ba nyirabwo, 120 000 muri bwo bumaze kubarurwa.

  • KAMALIZA AGNES
  • Werurwe 2, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE