Nyamasheke: Icyayi cyomoye uwabyariye indahekana uwamubeshye ko ari umusore

  • BAHUWIYONGERA SYLVESTRE
  • Mutarama 21, 2024
  • Hashize amezi 4
Image

Ubuhinzi bw’icyayi bwabereye icyomoro Yamfashije Marceline w’imyaka 38 y’amavuko, wagowe n’ubuzima kuva akivuka kugeza ageze igihe cyo kubaka urugo, umugabo ufite urugo akamubyaraho abana babiri b’indahekana amubeshya ko akiri umusore, amukuye no mu ishuri.

Yamfashije atuye mu Mudugudu wa Kibingo, Akagari ka Kagarama, Umurenge wa Karambi, Akarere ka Nyamasheke. Avuga ko afite ishimwe rikomeye ku buyobozi bw’u Rwanda burangajwe imbere na Perezida wa Repubulika Paul Kagame, bwimakaje ubuhinzi bw’icyayi cy’u Rwanda.

Mu kiganiro yagiranye n’Imvaho Nshya, Yamfashije yagarutse ku buzima bushaririye yanyuzemo ariko akabona icyizere cyo kubaho mu buhinzi bw’icyayi.

Kuri ubu afite abana batatu yabyariwe n’abagabo babiri batandukanye, ariko ubuzima bwe bwahinduwe bubi by’umwihariko n’umugabo wa mbere babyaranye abana babiri b’indahekana amubeshya ko akiri umusore.

Yavuze ko icyo gihe yatewe inda y’imfura ye akiri mu mwaka wa 5 w’amashuri yisumbuye, ati: “Nari ngikeneye kurerwa no kwiga nkarangiza amashuri ariko byambereye bibi cyane, iwacu byabananiye kubyakira.”

Yahisemo gusanga umugabo wamuteye inda, amukodeshereza inzu iciriritse, iby’amashuri ye birangirira aho.  

Avuga ko inda ya mbere yayitewe mu mwaka wa 2008 afite imyaka 22 indi ayiterwa muri 2009, umugabo amubeshya ko ari umusore, ariko amaze kumubyaraho abana babiri ni bwo yamweruriye ko afite undi mugore.

Mu mwaka wa 2011 ari muri iyo mihangayiko umugabo amaze kumuta, ni bwo yagiye gusaba akazi muri Koperative y’Abahinzi b’icyayi, atangira gukorera imbuto, kuzitera no gukora isuku mu buhumbikiro bwazo.

Yahembwaga amafaranga 700 ku munsi, kandi ngo icyo gihe yumvaga ari menshi kuko mbere atabashaga no kurenza amafaranga 500 ku kiraka yabonaga mu baturanyi basanzwe.  

Amahirwe yaje kumusekera mu 2012, ubwo na we yahabwaga umurima  ungana na kimwe cya kabiri cya hegitari ahingamo icyayi nk’uko n’abandi bayibahaga.

Umurima yahawe wari usanzwe uhingwa, uko awutunganya hakeramo n’indi myaka ya cyimeza nk’ibirayi n’ibindi akabitungisha abana be.

Nyuma y’aho yagize andi mahirwe yo kubona inguzanyo y’amafaranga y’u Rwanda 140,000 yatangwaga na Banki y’u Rwanda y’Amajyambere (BRD) mu guteza imbere ubuhinzi bw’icyayi.

Ati: “Na yo  yambereye umugisha cyane kuko nahise nguramo imashini idoda y’amafaranga 80,000 nubwo ntari nzi kudoda, ariko negeraga ababizi icyo mbakuyeho nkajya kugikora kugeza ubwo mbimenye. Nkomeza kudoda ntunga abana kugeza icyayi cyeze. Bwa mbere nasaruye ibilo 20 gusa sinagurisha menshi kuko twari tutarabona uruganda.”

Yamfashije Marceline yishimira ko ubu arimo kwiyubaka akabasha kurera abana be abarinda igwingira

Ubuhinzi bw’icyayi bwatumye abasha kubona umusore waje amusaba ko babana mu mwaka wa 2015, bitewe n’uko yari atangiye gusa neza.

Yamuteye inda ya gatatu na we ntibababana ariko umwana wa gatatu we yamubyaye abasha kumwitaho hamwe na bakuru be.

Impinduka z’ubuzima bwe zajyanaga n’iterambere ry’ubuhinzi bw’icyayi, kuko mu mwaka wa 2018 bungutse uruganda rw’icyayi rubegereye ntibongera kugemura ku ruganda rwa Gisovu.

Ati: “Nari ngeze ku musaruro w’ibilo birenga 400 n’amafaranga yiyongera, kuva ubwo ibintu bigenda neza, niyubakira inzu yanjye mva mu bukode, ngura n’ikindi kibanza imbere yayo ku buryo ubu ntabura miliyoni ebyiri n’igice ngurishije,  n’icyayi cyanjye nkigurishije sinabura miliyoni enye 4.”

Akomeza agira ati: “N’imashini yanjye ndacyayifite, irinjiza, abana banjye bose bariga nkababonera ibyo bakenera byose, bameze neza cyane. N’iyo barwaye simpangayika cyangwa ngo nirirwe ntesha umutwe ba se batagize icyo babamarira na mbere.”

By’umwihariko ashimira Perezida Kagame wabahaye amahirwe yo guhinga icyayi none uyu munsi kikaba cyarabahinduriye ubuzima.

Avuga ko ubu akataje, intego ye ikaba kugura ikibanza muri santeri y’ubucuruzi akubakamo inzu akoreramo, ikindi gice akakibamo n’aho afite hahari, akanongera ubuso agihingaho ku buryo nta mwana we wazakurana ibibazo nk’ibyo yakuriyemo.

Agira inama abakobwa bagira ibyago byo kubyarira iwabo kutiheba cyangwa ngo babe bakwifuza kwica cyangwa gufata nabi abo babyaye kubera ko uwihanganye ubuzima bushobora guhinduka mu gihe yihaye intego yo gukora akiteza imbere.

Yamfashije anatekereza kuzasubira kurangiza amashuri n’iyo dipolome akayibona.

Umuyobozi w’Akarere ka Nyamasheke Mupenzi Narcisse, asaba abagize amahirwe yo guhabwa imirima y’ icyayi kugifata neza bakakibyaza umusaruro bikura mu bukene.

  • BAHUWIYONGERA SYLVESTRE
  • Mutarama 21, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE