Nyamasheke: Barinubira metero 370 zasigaye hubakwa kaburimbo y’ibilometero 3  

  • BAHUWIYONGERA SYLVESTRE
  • Mutarama 14, 2024
  • Hashize amezi 4
Image

Mu gihe abakoresha umuhanda mushya wa kaburimbo Tyazo-Kibogora mu Karere ka Nyamasheke bashimira Perezida wa Repubulika Paul Kagame ko imvugo ye yabaye ingiro, abakomereza mu Rwunge rw’Amashuri rwa Frank Adamson rwa Kibogora (GSFAK) bahangayikishijwe na metero 370 zitakozwe babona ko zirengagijwe ku bushake.

Abanyeshuri, ababyeyi babo n’abarezi, ubwo babonaga umuhanda Tyazo-Kibogora wubakwa, bariruhukije kuko bari bazi neza ko uzagera ku ishuri ryabo bagasezerera ingorane baterwa no kugira umuhanda mubi kandi uri ahantu hacuramye.

Imirimo yo kubaka iyi kaburimbo yarakozwe ariko isozwa igarukiye neza ku Bitaro bya Kibogora biherereye muri metero 370 uturutse kuri iri shuri ryubatswe ku nkengero z’Ikiyaga cya Kivu.

Ababyeyi n’abayobozi b’iri shuri bavuga ko uwo muhanda wasigaye wuzuyemo ibinogo, ukagira ikiraro kiri mu manegeka ndetse ukaba unacuramye ku buryo iyo imvura yaguye kuwugendamo biba ingorabahizi.

Kuba uwo muhanda udakoze bituma imodoka zizanye ibitunga abana zibisiga ku Bitaro bya Kibogora, ubundi bikikorerwa ku mutwe na byo bigashyira undi mutwaro ku kigo.

Nanone kandi iyo abanyeshuri bagiye mu biruhuko, biragorana kubakurikirana kuko bazamuka bagasanga imodoka ibatwara ku Bitaro aho kaburimbo yagarukiye.

Ku babyeyi bafite imodoka basura abana babo kuri iryo shuri na bo bagorwa no gusiga imodoka muri metero 370 bakajya kureba abana babo n’amaguru.  

Rév. Past. Rusimbi Martin, umwe mu babyeyi baharerera, yagize ati: “Ni umuhanda muto ariko uteza ibibazo bikomeye cyane abana bacu n’ubuyobozi bw’ishuri, natwe bikadutera impungenge zikomeye. Ubundi hakorwa kaburimbo Tyazo- Kibogora, twatekerezaga ko na ho izahagera kuko ari agahanda gato twumvaga bitagorana kugashyiramo kaburimbo, ariko ntituzi uko byagenze ngo abawukoraga ntibahagere.”

Yakomeje avuga ko mu Nteko Rusange bagiranye n’abayobozi ba GSFAK babiganiriyeho bagasanga ubuyobozi bw’ishuri bukwiye kubibafashamo, uwo muhanda ugatunganywa.

Umuyobozi wa komite y’ababyeyi baharerera, Tuyinganyiki Donat, na we yabwiye Imvaho Nshya ko impamvu ababyeyi bawutinzeho cyane, ari wo ubababaje kuruta ibindi.

Yavuze ko bibabaje kuba iryo shuri rirera abana 1779 kandi rikaba ari rimwe mu mashuri atsindisha neza ndetse n’abana bakaba bahavoma ikinyabupfura ariko byagera ku muhanda ugasanga n’ikibazo.

Ati: “Wumvise ko ari metero 370 wabona ari muto, ariko imiterere yawo n’uburyo wangiritse cyane nta mubyeyi uharerera wabura guhangayika. Icya mbere ni kuri disipuline y’abana. Iyo batashye mu bihe by’imvura, bisaba kubaherekeza ngo bagere ku modoka. Hari abashobora gukwepa bagacika abayobozi, bashaka kwigira ahandi bigateza umutekano muke kandi si cyo twifuza.”

Yongeyeho ati: “Kugenda n’amaguru n’ibyo baba bikoreye kugera aho basanga imodoka n’izo mpungenge zo gucika, n’amafaranga  y’ubwikorezi atangwa n’ishuri ya buri gihe haje ibiribwa bikagarukira ku Bitaro bya Kibogora, yagombye gukoreshwa  ibindi bifasha abana.”

Rév. Past. Ukizebaraza Léon Emmanuel Umuyobozi w’iri shuri ry’itorero EMLR, na we yagaragarije Imvaho Nshya impungenge bawufiteho.

Yashimangiye ko ubuyobozi  bw’ishuri bwagejeje ikibazo ku buyobozi bw’Akarere mu mwaka w’amashuri ushize, bizezwa ko mu gihe hagishakwa umuti urambye bagiye kuhashyira laterite.

Ati: “Uyu muhanda ufite n’agashami kinjira muri Kaminuza ya Kibogora Polytechnic, ukanafasha abana bacu biga igiforomo kujya mu imenyerezamwuga mu Bitaro bya Kibogora. Ibibazo bwawo twabitanze ku Karere umwaka ushize, n’abayobozi batandukanye badusuye barimo na Minisitiri w’Uburezi Twagirayezu Gaspard bawunyuzemo bagera hano ntekereza ko batabuze kubona imiterere yawo.”

Yavuze ko bagitegereje kubona igisubizo kivuye ku Karere ku byo kemeye kubakorera, ati: “Turongera twibutse Akarere turebe ko hari icyakorwa, ariko icyizere cyo bari bakiduhaye.”

Umuyobozi w’Akarere ka Nyamasheke Mupenzi Narcisse, yabwiye Imvaho Nshya  ko kaburimbo yo atahita ayibizeza kuko iba igoye, ariko agiye kwicarana n’ubuyobozi bw’ishuri n’abatekinisiye babishinzwe ku Karere hakarebwa icyawukorwaho cyihuse.

Ati: “Kaburimbo yo iba igoye, isaba gutegura ariko tugiye kurebera hamwe n’ishuri n’abatekinisiye bacu ku Karere ikiba gikozwe vuba cyabikemura.”

Mu mwaka wa 2013 ni bwo Perezida Kagame yemereye abaturage b’i Nyamasheke umuhanda Tyazo-Kibogora nyuma yo kumugaragariza ko kutagira umuhanda bituma batabona serivisi zitandukanye zirimo n’ubuvuzi butangirwa ku Bitaro bya Kibogora.

Uyu muhanda ngo ukwiye kuba warakorewe rimwe n’uwundi
Iki kiraro cy’uyu muhanda winjira muri GSFAK ababyeyi bafite impungenge ko imodoka itwaye abana cyangwa ihazanye ibiribwa byabo yagwamo ikangiza byinshi
Umuyobozi wa GSFAK, Rév. Pst. Ukizebaraza Lèon Emmanuel, yabwiye ababyeyi ko amafaranga ishuri ritanga ku biribwa bizanwa ku mutwe bikuwe aho imodoka zibisiga agenda ababana menshi
Ababyeyi na bo bagaragaje impungenge baterwa n’uwo muhanda
  • BAHUWIYONGERA SYLVESTRE
  • Mutarama 14, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE