Nyamasheke: Ahaherutse kuboneka umubiri bakora amaterasi habonetse indi ibiri

  • BAHUWIYONGERA SYLVESTRE
  • Mutarama 12, 2024
  • Hashize ukwezi 1
Image

Ubwo abaturage bakoreraga amaterasi ku musozi wa Kizenga, Akagari ka Nyagatare, Umurenge wa Mahembe mu Karere ka Nyamasheke ku wa Kane tariki ya 11 Mutarama, mu isambu babonyemo indi mibiri 2 nyuma y’uko bari bahabonye undi mubiri 1 ku wa Kabiri tariki ya 9 Mutarama 2024 hakekwa ko ari uw’uwishwe muri Jenoside yakorewe Abatutsi mu 1994.

Amakuru Imvaho Nshya yahawe n’umwe mu bari bahari iyo mibiri ibonwa, avuga ko yabonetse saa tatu n’igice z’igitondo, nk’uko byagenze ku mubiri wa mbere, ariko yo iboneka mu cyobo kimwe, ari uw’umuntu mukuru n’uw’umwana, bikekwa ko ari umubyeyi wicanywe n’umwana we, bakabajugunyamo. Gusa iyi yo nta myenda yari ifite n’ibice bimwe byayo byarangiritse cyane kubera igihe gishize ihashyizwe.

At: “Dukurikije n’amateka tuhazi y’ibyahabereye muri Jenoside yakorewe Abatutsi n’uburyo hariya hantu hatigeze hahingwa cyangwa ngo habeho igihe gihagije cyo kuhazenguruka harebwa niba hari imibiri yahajugunywe, ntidushidikanya ko iriya yose uko ari 3 ari iy’abishwe icyo gihe”.

Yongeyeho ati: “Ubuyobozi bwa Ibuka, ubw’Umurenge n’inzego z’umutekano, bahageze na bo bamaze kugenzura neza barabyemeza, iyo mibiri 2 isangishwa uwa mbere mu Biro by’Akagari ngo itunganywe neza, izashyingurwe mu cyubahiro mu rwibutso rwa Jenoside yakorewe Abatutsi rwa Rwamatamu ruri mu Murenge wa Gihombo, twibuka ku nshuro ya 30 Jenoside yakorewe Abatutsi mu 1994”.

Uyu muturage avuga ko bakeka ko haba hari n’indi mibiri ihari, ko hakwiye uburyo bwo gukurikirana neza, hifashishijwe abagize uruhare mu kwica Abatutsi barenga 15 000 bari bahungiye kuri uriya musozi muremure wa Kizenga, hakarokoka mbarwa.

Iyahakuwe bikaba byarakorwaga mu buryo bwihuse, ntihahingwe ntihanabeho uburyo rusange bwitondewe bwo kuyishakisha, abireze bakemera icyaha, n’abatarahigwaga bari bahatuye, bakaba bafasha mu gutanga ayo makuru.

Uhagarariye Ibuka mu Karere ka Nyamasheke, Gasasira Marcel, ashimangira ibivugwa n’aba baturage, akavuga ko Ibuka igiye kuganira nm’izindi nzego hagashyirwaho uburyo  bwo gushakisha bakareba ko nta yindi mibiri  igihari.

Ati: “Kuba habonetse indi mibiri nyuma y’uwari wabonetse, mu isambu imwe mu minsi isa n’ikurikiranye, bigaragara ko uriya musozi urimo n’indi irenze iyo. Numva habaho uburyo bwo kuyishakisha burenze guca amaterasi gusa, ahubwo tugafatanya n’Ubuyobozi bw’Akarere n’izindi nzego, nk’uko byagenze iMibilizi muri Rusizi, umwaka ushize”.

Yongeyeho ati: “Ababigizemo uruhare n’abatarahigwaga bari bahatuye bakadufasha, ntekereza ko twayibonamo. Tugiye kubiganiraho n’ubuyobozi bw’akarere, dufatire umwanzuro hamwe, nidusanga nta yindi ihari, ubwabyo bizaba ari igisubizo, aho kugira ngo uwaburiye uwe hariya akomeze guketereza ko yaba ari ho ari”.

Gasasira avuga ko kiriya cyaba n’ikimenyetso simusiga ko hashobora kuba hari n’indi mibiri ikiri mu yindi misozi kuko kariya gace k’icyari Komini Rwamatamu, ari ak’imisozi myinshi miremire Abatutsi bahungiragaho cyane kuko nta bundi buryo bari bafite, bakahicirwa.

  • BAHUWIYONGERA SYLVESTRE
  • Mutarama 12, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE