Nyamasheke: Aborozi bakabonye litiro 15 z’amata ku munsi ntibarenza 3

  • BAHUWIYONGERA SYLVESTRE
  • Werurwe 7, 2024
  • Hashize amezi 2
Image

Bamwe mu borozi b’inka bo mu Murenge wa Rangiro, Akarere ka Nyamasheke, bavuga ko bafite ikibazo gikomeye cyane cy’umukamo muke, inka y’imvange yakabaye ikamwa litiro nibura 15 ku munsi itarenza litiro 3.

Ni ikibazo kigaragazwa na bamwe mu borozi, bavuga ko inka y’imvange, mu gihe ahandi iba ikamwa litiro zirenga 15 ku munsi, bo ngo izirenza litiro 3 ari nke cyane, bikaba bibahombya cyane kuko ukurikije ibigenda ku nka ikamwa n’amafaranga baba bayiguze n’icyo bakuramo bavuga ko baba basa n’abakorera mu gihombo.

Nzamwita Sylvère wo mu Kagari ka Jurwe, ati: “Noroye inka itanga umukamo, niguriye. Nkunda inka z’umukamo cyane kuko iyo uyifashe neza mu myaka 3 uba uyikuyeho izindi 2 ukaba wunguka. Ariko ikigiye kuzinshaho ni umukamo wazo muke.”

Yongeyeho ari: “Nk’ubu iyo mfite ntirenza litiro 3 ku munsi kandi ni imvange, n’izo litiro mu mezi 2 cyangwa 3 ikamwa ziba zitakiboneka. Nkibaza impamvu gukamwa bihagarara mu gihe gito cyane. Nareba ibyo nyitangaho n’uburyo imvuna nkumva nareka ubu bworozi nanjye nkagana ubw’ibimasa nka benshi bo muri iyi Mirenge yacu.”

Ntezahorigwa Samson we avuga ko yabonye ahomba ahagarika ubworozi bw’inka zikamwa.

Ati: “Nabonye mpomba ndabireka kuko sinigeze ndenza litiro 3 ku munsi. Ndebye ayo mpa umushumba uzitaho, ubwatsi n’ibindi bizigendaho, mpitamo kubyihorera ngo bitazansaza, ariko ni ikibazo gihangayikishije cyane dufite ino.”

Ikindi aborozi bavuga cyaba gituma inka zidatanga umukamo utubutse bakeka amarozi, abajya mu byumba by’amasengesho gusengera icyo kibazo, abandi bagakeka ikirere cyaho bavuga ko kitaberanye n’ubworozi bw’inka zitanga umukamo.

Umuyobozi w’Ishami ry’Ubuhinzi, Ubworozi n’Umutungo Kamere mu Karere ka Nyamasheke Sengambi Albert, avuga ko umukamo muke uterwa no kuzifata nabi, cyane cyane kutazigaburira neza.

Ati: “Niharebwe n’uburyo zifatwa. Niba zitagaburirwa neza, zitagirirwa isuku, zitozwa, zikamara ibyumweru mu bisogororo byazo, ntiziterwe umuti wica uburondwe, ntizinavurwe izindi ndwara zazifata, n’ibindi zikenera, zakamwa neza gute?

Niba inka imara icyumweru cyose igaburirwa imitumba y’insina n’urubingo gusa, ntihabwe n’ibinyamisogwe biyifasha, kandi uko inka ikamwa hari byinshi itakaza yagombye kugaruriza mu mirire myiza, baragira ngo umukamo uve he handi?”

Ku kibazo cy’ikirere kitaberanye n’ubworozi bw’inka z’imvange, avuga ko ntaho bihuriye n’umukamo muke.

Yagize ati: “Nta kibazo cyihariye kiri muri aka Karere cyatera inka umukamo muke nk’uko bamwe mu borozi babivuga. Nta kibazo kiri mu bworozi bw’inka mu Karere ka Nyamasheke kose, umukamo muke n’ibyo bindi batekereza cyangwa bazikorera biterwa n’ubujiji.

Sengambi anavuga ko kuba inka ari imvage bidasobanura ko itanga umukamo mwinshi binaterwa n’amaraso y’ayo zikomokaho.

Ati: “Kuba inka ari imvange gusa ntibihagije ngo itange umukamo utubutse, binaterwa n’amaraso yayo bitewe n’izo ikomokaho, kuko imvange nziza, nk’izitangwa muri gahunda ya Girinka, ifashwe neza ishobora gutanga litiro ziri hejuru ya 13 ku munsi.”

  • BAHUWIYONGERA SYLVESTRE
  • Werurwe 7, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE