Nyamagabe: Kaduha hakenewe miliyoni 130 Frw zo gusana inzu z’abarokotse Jenoside  

  • AKIMANA JEAN DE DIEU
  • Gashyantare 2, 2024
  • Hashize amezi 4
Image

Ubuyobozi bw’Akarere ka Nyamagabe buratangaza ko hakenewe amafaranga y’u Rwanda miliyoni 130 kugira ngo hasanwe cyangwa hanubakwe inzu zatujwemo imiryango 33 y’abarokotse Jenoside yakorewe Abatutsi mu 1994.

Izo nzu ziherereye Murenge wa Kaduha, Akagari ka Kavumu, mu Mudugudu wa Gahama uyarebye ubona ko yangiritse cyane kuko amaze imyaka isaga 28 yubatswe ubwo igihugu kitabaraga kugirango kibone aho abarokotse Jenoside batuzwa nyuma yo kwicirwa abagize imiryango yabo, bakanyagwa inka zabo ndetse n’inzu zigasenywa izindi zigatwikwa.

Mu kiganiro Imvaho Nshya yagiranye n’umuyobozi w’Akarere ka Nyamabagabe, Niyomwungeri Hildebrand yabwiye Imvaho Nshya ko iki kibazo kizwi ndetse bakomeje gushakashaka uko haboneka amafaranga yo kuzisana no kubaka bundi bushya izizagaragara ko zishaje.

Yagize ati: “Ni byo iki kibazo turakizi kandi turi gushakisha ubushobozi kuko twasanze izo nzu zisaba ingengo y’imari ya miliyoni 130 kugira ngo zibashe gusanwa ndetse twanabona ko hari izigomba kubakwa bundi bushya zikaba zakubakwa neza”.

Akomeza avuga ko ibiganiro bigeze kure na Minisiteri y’Ubumwe bw’Abanyarwanda kugira ngo iki kibazo cy’abarokotse Jenoside bafite inzu zishaje kirusheho guhabwa isumbwe, gishakirwe umuti urambye hatabarwa ubuzima bw’abazitujwemo kuko zirashaje cyane kuko zubatswe mu gihe hari abantu benshi batari bafite aho kwikinga.

Yongeyeho ati: “Mu gihe cya vuba turabona amafaranga dutangire gusana izo nzu kugira ngo ubuzima bw’abazibamo bube bwiza kuko ntabwo twakwishimira ko abaturage bacu baba habi hashobora no kubatwara ubuzima bwabo.

Bamwe mu baturage batuye muri izo nzu bemeza ko hashize igihe izo nzu zimeze gutyo, bakavuga ko zishobora kuzabambura ubuzima mu gihe hatagira igikorwa vuba.

Mukamusoni Dativa avuga ko bamwe mu bo baturanye hari abatagikozwa kurara muri izo nzu bakajya gucumbika mu baturanyi kubera ko batinya ko zabagwaho.

Ati: “Dufite impungenge ko mu bihe bizaza twese tuzaba twarazivuyemo kuko hari benshi batinya gukomeza kuzibamo bitewe nuko zimeze ahubwo bakajya gucumbika mu zindi nzu”.

Mugabekazi Astherie avuga ko bijejwe gusanirwa igihe kikaba kibaye kirekire batarabasha kubafasha kandi dutinya ko zatugwira pe.

Yagize ati: “Twebwe tubaye muri uyu Mudugudu igihe kirekire twizezwa ko bagiye kuzisana ariko zidutera ubwoba bw’uko zatugwira”

Niragire Marie Gorethi avuga ko iyo imvura iguye bagira ibibazo by’ubwoba ko izo nzu zazabagwaho igihe imvura yabaye nyinshi cyane kubera ko zishaje ndetse n’amabati yapfumumaguritse cyane.

Ati: “Iyo imvura iguye tugira ubwoba kuko izi nzu murabona aya mabati yarangiritse cyane arava ku buryo tunyagirwa”.

Uyu mudugudu w’abatishoboye wubatse i Gahama ahagana mu 1996 ukaba urimo inzu 33 agaragaza ko ashaje ku buryo akwiye gusanwa.

Mu yandi makuru ni uko mu ngengo y’imari y’uyu mwaka hateganyijwe kubakwa inzu 33 z’abatishoboye barokotse Jenoside yakorewe Abatutsi ariko mu Karere kose hari inzu zisaga 1000 z’abatishoboye barokotse Jenoside yakorewe Abatutsi mu 1994 zikeneye gusanwa.

  • AKIMANA JEAN DE DIEU
  • Gashyantare 2, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE