Nyabihu: Batunguwe n’uruganda rwaranduye icyayi rugahinga inturusu

  • NGABOYABAHIZI PROTAIS
  • Werurwe 7, 2024
  • Hashize ukwezi 1
Image

Abaturage bo mu Murenge wa Kintobo, Akarere ka Nyabihu, batunguwe no kubona Uruganda rw’Icyayi rwa Nyabihu rwari rwatangije umushinga wo gutera icyayi nyuam y’igihe gito kikarandurwa hagaterwamo inturusu.

Abo baturage byarabarenze kuko bari batangiye kugira icyizere cy’uburyo bagiye kubona akazi mu gukorera icyo cyayi cyagombaga no kwinjiriza u Rwanda amadovize.

Abo baturage babona guhinga inturusu bidafite umumaro nk’uw’icyayi, bakaba batiyumvisha ukuntu uruganda rugitunganya ari rwo rwafata uwo mwanzuro.

Nsengiyumva Justin wo mu Kagari ka Nyamugari, Umurenge wa Kintobo, we avuga ko bahuye n’igihombo gikabije nyuma yo kurandura icyayi mu gace kabo nk’igihingwa ngengabukugu.

Yagize ati: “Ubundi ahageze icyayi haba hageze iterambere, kuko twari twatangiye kwiboneramo akazi, ari ukugikorera ndetse no kugisoroma byari baratumye ubushomeri bugenda, ariko twagiye kubona nyuma y’umwaka tubona icyayi bagikuyeho, ibi bintu byaradutunguye cyane.”

Ndarifite Augistin w’imyaka 67 wavukiye hafi aho iki cyayi cyari gihinze, avuga ko byabatunguye cyane kubona batera icyayi bakongera bakakirandura nyamara mbere ya Jenoside yakorewe abatutsi mu 1994 cyari gihari.

Yagize ati: “Ahantu mbere hari icyayi ariko kubera ko hari urugamba rwo kubohora u Rwanda no guhagarika Jenoside yakorerwaga Abatutsi mu 1994, urumva nticyongeye gukorerwa bituma gicika.”

Uyu musaza akomeza avuga ko kuba ubuhinzi bw’icyayi bwarakuwe kuri iriya misozi byateye igihombo ku mpande zinyuranye.

Yagize ati: “Kurandura icyayi hano byahombeje abari bafitemo akazi, abafite inzu z’amacumbi hano, za resitora n’ibindi, n’igihugu cyahahombye amadovize. Gusa muzatubarize impamvu iki cyayi bahisemo kugisimbuza inturusu, ikindi kandi ni nde wakoze iriya nyigo kugera ubwo icyayi kirandurwa?”

Umuyobozi w’Uruganda rwa Nyabihu (Nyabihu Tea Factory) Munwakuzwe Yves, avuga ko ngo basanze muri iriya misozi batabasha guhangana n’isuri ndetse ko n’abaturage bajyaga bacyangiza.

Yagize ati: “Ni byo koko kugeza ubu hari aho twari twatangiye guhinga icyayi mu Murenge wa Kintobo mu misozi ya Gitwa, tuza gusanga bitatworoheye. Byaratunaniye kubera isuri y’amazi ava ku misozi, kimwe n’abaturage batagihaga umutekano, duhitamo hose kuhatera inturusu. Ngira ngo nawe wabyiboneye ko no mu gishanga isuri yuzuyemo bitewe n’amazi ava kuri iyo misozi agahura n’umugezi wa Kinoni bikatwangiriza.”

Akomeza avuga ko kuri ubu hari inyigo kugira ngo harebwe uburyo na kiriya cyayi cyo mu gishanga cyavugururwa, agasaba abaturage gukomeza kujya barinda ibikorwa by’iterambere bibegerezwa kuko kubyangiza bishonora gutuma byimukira aho bikenewe.

Ahari hatangiye guhingwa icyayi cyo mu misozi ya Gitwa ho muri Kintobo ni ubuso bwa hegitari zigegera kuri 88. Kuri ubu hamaze kwangirika hegitari 11 zari ziteweho icyayi bitewe n’amazi y’ivura ava mu misozi agahura n’ay’umugezi wa Kinoni.

  • NGABOYABAHIZI PROTAIS
  • Werurwe 7, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE