Nyabihu: Abashombabyuma bazengereje abaturage biba insinga z’amashanyarazi

  • NGABOYABAHIZI PROTAIS
  • Gashyantare 8, 2024
  • Hashize amezi 4
Image

Bamwe mu baturage bo mu Murenge wa Mukamira, Akarere ka Nyabihu bavuga ko kubera iyibwa ry’insinga z’amashanyarazi rikorwa n’Abashombabyuma; bamaze icyumweru bari mu icuraburindi, ndetse n’umutekano wabo bakaba batawizeye kuko ngo usibye n’abo biba izo nsinga hari n’abitwikira ijoro bakabatwara utwabo.

Umwe mu baturage witwa Nsanzubuhoro Phocas avuga ko kuba insinga z’amashanyarazi abiswe abashombabyuma  barazimaze baziba bibangamiye imyigire y’abana babo no guhora batanga amafaranga yo gusimbura izishaje.

Yagize ati: “Hano hari itsinda ry’abashombyi ritumazeho ikitwa icyuma ariko noneho ikibabaje ni uko batangiye no kugera ku nsinga z’amashanyarazi na zo basigaye bajya kuzigurisha mu byuma bishaje. Ubu rero twe twiberaho mu icuraburindi mu mwijima ukaze, nta radiyo tucyumva, nta gucaginga telefone tumaze ibyumweru bibiri, turasaba gusanirwa no gukurikirana abo bashombyi”.

Izi nsinga zatumye igice kimwe cyo mu Kagari ka Jali, Umudugudu wa Hesha, gihera mu icuraburindi ngo ubujura nk’ubu burahasanzwe kuko iyi ari inshuro ya kane bakuyeho ziriya nsinga nk’uko  Sibomana Innocent  abivuga.

Yagize ati: “Ikibazo cy’abatwibira insinga kiradukomereye   kandi kirarambiranye, ubundi byatangiye abantu b’ino bagura ibyuma bishaje abo bantu bitwa abashombyi ni bo baza kubigura mu ngo nk’amasafuriya ashaje n’ibindi none bageze ku nsinga, ibi rero byatumye tugaruka mu buzima bubi butagira iterambere, nk’ubu dufite n’ikibazo cya bamwe mu basore batagira uburere bwiza badufunga kaci kubera ko tuba mu kizima”.

Sibomana akomeza avuga ko n’impamvu byorohera abashombyi kubibira insinga ni uko ibiti by’amashanyarazi biba byaraboze bikorohera abaza kuziba ari bo bashombabyuma, akaba asaba ko nibura REG yabazanira ibiti bikomeye ndetse hagashyirwaho n’ingamba zo guhashya abashombabyuma, kuko kwibwa insinga bibagiraho ingaruka no mu nsengero ziri hafi aho.

Umuyobozi w’ishami rya REG mu Karere ka Nyabihu Mutsindashyaka Martin, ashimangira ko iki kibazo bakizi kimaze igihe baziba, ariko bakaba basaba abaturage gukomeza kugira amarondo ahoraho barinda ibyabo.

Yagize ati: “Ikibazo cy’abatwara insinga kirazwi ariko abaturage bakwiye gufata ingamba zo kubungabunga ibyabo, kuko iyo tumuhaye umuriro w’amashanyarazi ntitwabona uburyo dukurikirana n’ibikoresho bye dufite abakiliya benshi banyuranye urabizi, gusa niba ari umuyoboro mugari bibyeho izo nsinga tugiye kubireba tube twahasana, ikijyanye n’ibiti bishaje na cyo kuri ubu kirimo kurebwaho ibishaje bibe byasimbuzwa”.

Ubujura bw’insinga z’amashanyarazi muri Nyabihu kandi abaturage bavuga ko no mu Mirenge ya Jenda, Mukamira no mu bice byo mu Murenge wa Bigogwe, aho ngo abashombabyuma bakunze kwibasira insinga z’amashanyarazi.

Abaturage bavuga ko abashombabyuma babibira insinga babateza ubukene
  • NGABOYABAHIZI PROTAIS
  • Gashyantare 8, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE