Dr. Nsanzimana yerekanye isano yo kwicara cyane n’indwara zitandura

  • KAYITARE JEAN PAUL
  • Gashyantare 6, 2024
  • Hashize amezi 4
Image

Minisiteri y’Ubuzima (MINISANTE) yatangaje ko kwicara umwanya munini bigira ingaruka ku buzima bw’umuntu aho bishobora kumuviramo kurwara indwara zitandura.

Minisitiri w’Ubuzima Dr Sabin Nsanzimana yabigarutseho mu kiganiro yagiranye na Televiziyo y’u Rwanda.

Yavuze ko mu mwaka wa 2014-2015 hari ikintu kitari cyakabayeho aho abantu bicwa n’indwara zandura zirimo Malariya n’izindi bahise baba bake kurusha abicwa n’indwara zitandura (Indwara z’umutima, Diyabeti na Kanseri).

Minisitiri Dr Nsanzimana yakomeje ku ngaruka zo kwicara umwanya munini.

Yavuze ko ubushakashatsi bwerekanye ko umuntu ushobora kumara amasaha 11 yicaye ashobora guhura n’ingorane.

Ati: “Ubushakashasti butwereka yuko umuntu adakwiye kuba arenza amasaha 7 ikibuno kiri ku ntebe wicaye ku munsi, iyo uyarengeje uba uri mu Mutuku.

Za ndwara uba wamaze kuzitangira, uko ubitindamo ni ko bigenda byiyongera ntabwo ushobora gucika izo ndwara wicara amasaha angana gutyo”.

Minisiteri y’Ubuzima yerekanye uko umuntu ashobora kumara amasaha 11 yicaye. Icyakoze ngo umuntu aramutse yicaye ayo masaha ntashobora kumara imyaka ibiri indwara zitandura zitarigaragaza.

Dr Sabin yagize ati: “Urabyutse ikintu cya mbere uhita ukora ni ukwicara ku ntebe ugafata amafunguro ya mu gitondo nk’iminota 30, icyo uhitiraho ni ukujya gutega imodoka niba udafite iyawe cyangwa gutega moto ubwo uhise wicara, ugera ku kazi icyo uhitiraho ni uguhita wicara.

Ntabwo wakwira amasaha 11 ngo umare umwaka, imyaka 2 za ndwara zitaratangira kuza. Ikibazo cyo kwicara amasaha menshi kiri kugaragara cyane nk’ikintu gifitanye isano ya hafi n’indwara zitandura”.

Minisante ivuga ko indwara zitandura zirimo guturuka ku mibereho ijyanye n’uko ubuzima buteye, ibyo abantu basigaye barya n’ibyo basigaye banywa.

Ku rundi ruhande hari ibijyanye n’imiterere y’akazi cyane cyane no nko mu Mujyi wa Kigali aho abantu bicara umwanya munini aho ibiro birimo kwiyongera, abantu bakarya ibiryo bibyibushya birimo amasukari n’umunyu, ibi byose ngo ni bimwe mu bituma abantu bakomeza kurwara indwara zitandura.

  • KAYITARE JEAN PAUL
  • Gashyantare 6, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE