Ngoma: Abahinzi banze kwakira toni 40 z’umuceri zavuye mu ruganda zidatonoye

  • NSHIMIYIMANA FAUSTIN
  • Gashyantare 27, 2024
  • Hashize amezi 2
Image

Abahinzi b’umuceri mu gishanga cya Kibaya- Cyunuzi bo mu Murenge wa Rukira mu Karere ka Ngoma  banze kwakira toni zirenga 40.8 z’umuceri bahawe ngo ni uwo kurya kandi udatonoye neza. 

Abo bahinzi bo muri Zone ya Nyaruvumu 1 ibarizwa muri Koperative COOPRIKI, ntibumva uburyo uwo muceri udatonoye kandi wavuye mu ruganda rwa Kirehe Rice Company Ltd. 

Bari bagiye kuri Koperative bizeye gutahana umuceri utunganyijwe ario bahageze basanga uwo muceri udatonoye, bataha bimyiza imoso. 

Bamwe mu bahinzi b’umuceri baganiriye n’Imvaho Nshya bavuze ko ubwo bajyaga gufata umuceri wo kurya mu masaha y’igicamunsi, none tariki ya 26 Gashyantare 2024. 

Udatonoye neza ubwo bari bamaze kugezwaho toni 20 hasigaye kuzana undi ungana na toni 20.8 bahita basaba ko imodoka zareka kujya kuzana undi nuwo bagejejejweho batari butahane.

Umwe mu bahinzi yagize ati: “Nafashe umuceri ibiro 125 ariko ndebye mu mufaka wa mbere nsanga ntutonoye neza, nagize ngo n’ikibazo kuri uwo ariko mfunduye nsanga n’indi nuko ine niko bimeze. 

Natekereje ko bazanye umuceri warangije igihe ariko mbona n’abagenzi banjye duhuje ikibazo. Umuceri nawihoreye kuko nkugejeje mu muryango ntacyo twawukoresha.”

Umwe mu bayobozi ba zone yagize ati: “Dutunguwe n’uko uruganda ruduhaye umuceri utameze neza kandi bakawuha abahinzi basanzwe bakorana. Iki kibazo kirakomeye kuko toni zirenga 40 n’ibiro 850 zidatunganyije neza twagomabaga kwakira zadushyira mu bihombo. Twifuza ko umuceri wasubira ku ruganda ugatunganywa neza kuko ntitwawutwara rwose.”

Perezida wa Koperative COOPRIKI Harerimana Evariste, yavuze ko iki kibazo cyabatunguye ndetse bataramenya impamvu bahawe umuceri udatunganyije neza.

Yagize ati: “Uko zone zipakije ni ko zibona umuceri, koperative yacu yatonorewe umuceri ku wa 5 ariko bitewe n’uko dufite abanyamuryango benshi batwongeza umunsi wok u wa 6 gusa ariko bitewe n’umuganda wabaye. 

Byabaye ngombwa ko bawutonora mu masaha y’ikigoroba. Rero ntituzi niba ari iyo mpamvu kuko niyo zone ya mbere yarihawe umuceri wo kurya muri zone 17 zigize koperative.”

Umuyobozi w’uruganda rwa Kirehe Rice Ltd, Nsengiyumva Jean Damascene yavuze ko bohereje itsinda ry’abatekenisiye bagiye gukurikirana iki kibazo ariko ko no mu busanzwe umuceri w’iyi koperative uri gusohoka mu ruganda ariko umeze.

Yagize ati: “Twoherejeyo itsinda rigiye gukurikirana ikibazo ariko no mu busanzwe umuceri w’iyi Koperative ni ko uri gusohoka mu ruganda usa bishobora kuba umuceri wavuye muri amwe mu mazone agize iyi koperative ushobora kuba utarafashwe neza bitewe nuko toni 450 za koperative zifite ikibazo cyo kudasa neza nubwo abatekenisiye batabibabwiye muri iyi weekend.”

Yakomeje agira ati: “Sinabyemeza neza ariko nidusanga ikosa ari iryacu, tuzawusubiza mu ruganda utunganywe neza usubirwemo ariko ikosa niriba iryabo wenda barawuzanye utumye neza nta kindi tuzarenzaho bazawugumana uko umeze.”

Umuyobozi w’Akarere ka Ngoma, Niyonagira Natalie, yavuze ko Akarere katari kazi iki kibazo kuko nta nzego zirakigaragariza Akarere.

Yagize ati: “Iki kibazo ntitwakimenye kuko nta rwego rurakitugezaho. Bafite inzego za Koperative zishinzwe kubikurikirana, ubwo ariko natwe tugiye gukurikirana.”

Umuyobozi w’Uruganda rwa Kirehe Rice Ltd, Nsengiyumva Jean Damascene, yavuze ko umuceri basanze udatonowe neza ndetse bemera kuwusubiza mu ruganda ngo utunganywe neza, uzahabwe abahinzi umeze neza.

Yagize ati: “Twemeye ko umuceri usubira ku ruganda gutunganywa kuko twasanze ari cyo gisubizo cyiza nk’abahinzi dukorana umunsi ku wundi. Uburyo bwo gukemura iki kibazo twasanze ari ngombwa ko uruganda ari rwo ruwusubiramo kandi tukabikosora hatabaye ikindi kibazo kugira ngo dukomeze dukorane neza.”

Zone ya Nyaruvumu 1 igizwe n’abahinzi b’umuceri 286 babarizwa muri Koperative COOPRIKI ihinga ku buso bwa hegitari 490 mu gishanga cya Kibaya-Cyunuzi. 

Koperative COOPRIKI ifite zone 17 zigizwe n’abahinzi 3,458 bakaba bakorana n’uruganda rwa Kirehe Rice Company Ltd kuva mu mwaka wa 2013.

  • NSHIMIYIMANA FAUSTIN
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE