Nduhungirehe na Minisitiri w’Intebe w’u Bwongereza mu barebye umukino wa Arsenal

Minisitiri w’Ububanyi n’Amahanga n’Ubutwererane, Amb Olivier Nduhungirehe ari kumwe na Minisitiri w’Intebe w’u Bwongereza, Sir Keir Starmer, bari mu bakurikiye umukino Arsenal yatsinzemo Manchester United ibitego 2-0.

Uyu mukino w’umunsi wa 14 wa shampiyona y’u Bwongereza ‘’ Premier League’’ wabaye mu ijoro ryo ku wa Gatatu, tariki ya 4 Ukuboza 2024, ubera ku kibuga kuri Emirates Stadium.

Ambasaderi w’u Rwanda mu Bwongereza, Busingye Johnston, wari kumwe na bo, yashimiye Arsenal ku bwo kubona amanota yanakinnye umukino mwiza.

Bari kumwe kandi n’umunyabigwi mu mupira w’amaguru akaba yaranabaye rutahizamu wa Arsenal mu myaka 20 ishize ari we Umunya Nigeria Nwankwo Kanu.

Arsenal FC ni imwe mu makipe afitanye imikoranire na Leta y’u Rwanda binyuze muri Gahunda ya ‘Visit Rwanda’, aho iyi kipe yamamaza ubukerarugendo bwarwo ndetse yambara ‘Visit Rwanda’ ku kuboko kw’ibumoso haba mu ikipe nkuru, iy’abatarengeje imyaka 23 no mu ikipe y’abagore.