Musanze: Miliyoni 15 z’abagize Koperative y’aba DJ ‘Ubumwe ni Imbaraga’ zaburiwe irengero

  • NGABOYABAHIZI PROTAIS
  • Werurwe 2, 2024
  • Hashize amezi 2
Image

Abibumbiye muri Koperative ‘Ubumwe ni Imbaraga’ bavuga ko batazi irengero ry’umutungo wabo ungana na miliyoni 15, yanyerejwe na bamwe mu bayobozi babo, ku buryo n’ugerageje kubaza ikibazo cye nk’umunyamuryango yirukanwa atanahawe imigabane ye.

Ni koperative y’urubyiruko rwo mu mujyi wa Musanze rushinzwe gukwirakwiza indirimbo n’ibihangano na filime, bazwi ku izina ry’abadije.

Bamwe mu banyamuryango b’iyi Koperative ‘Ubumwe ni Imbaraga’ bavuga ko kuva mu 2018, yashingwa nta nyungu bigeze babona; nk’uko inyandiko zigaragaza ko kuri konti kugeza ubu habarurwa amafaranga atarenga ibumbi 129 muri miliyoni 15 zari zimaze gukusanywa, hakiyongeraho amafaranga ibihumbi 2000 batanga buri munsi y’ubwizigame mu gihe umugabane shingiro ari ibihumbi 60.

Umwe mu banyamuryango yagize ati: “Ni gute umuntu aba amaze gutanga umugabane muri koperative azi ko aziteza imbere ariko nyuma yaho akaza kuyabura, nk’ubu umugabane shingiro w’ibihumbi 60, nkaba nta nyungu mbonamo, ibi rero birimo kutugiraho ingaruka twarashobewe turasaba ko ubuyobozi budufasha gukemura iki kibazo, kuko tumaze imyaka igera kuri 4 dutakamba, ikibabaje ni uko iyo uvuze bahita bagukura ku rutonde rw’abanyamuryango”.

Uyu munyamuryango akomeza avuga ko iyi koperative ifite imiyoborere mibi aho imigabane shingiro ikoreshwa n’abayobozi babo mu buryo butazwi, kandi bakaba bayobowe mu buryo bw’igitugu kuko ngo ntawe uvuga, kandi ko amafaranga yabo yanyerejwe n’abayoboye koperative yabo kuva mu 2018 kugeza 2021.

Yagize ati: “Tuyobojwe inkoni y’icyuma ni ukuri tekereza kuba ndimo kuvugana nawe nkaba ntatinyuka kuvuga izina ryanjye ni ubwoba batubitsemo yaba uwo bahagaritse (Umuyobozi) wayoboraga iyi koperative ndetse n’uriho ubu ntiwapfa kuvuga ukuri bahita baguhambiriza.

Umunyamuryango ugize icyo abaza arafungishwa

Yavuze kandi ko ushatse kugira icyo abaza ku micungire y’amafaranga ya koperative, abayobozi bamuhimbira ibyaha agafungishwa.

Yongeyeho ati: “Abayobozi bacu rero mu myaka 4 ishize amafaranga yacu barayamaze, bara amafaranga 2000 dutanga buri munsi, kandi ubwo sinongeye kuvuga wa mugabane shingiro kugira ngo winjiremo hari bagenzi bacu babiguyemo barafungwa abandi bagatotezwa ku buryo byabasabaga no kwimuka cyangwa se kwihishahisha kuko baburaga uko bakwikiza, bakaguhimbira ibyo utakoze”.

Umuyobozi w’agateganyo wa koperative ‘Ubumwe ni Imbaraga’, Tuyishime Evariste na we ashimangira koko ko Koperative yabo yaranzwe n’imiyoborere mibi ndetse n’uburiganya, ngo akaba ari yo mpamvu bahisemo mu gihe cy’inama rusange guhagarika iyo komite yaranzwe no kunyereza umutungo wabo.

Yagize ati: “Ikibazo cy’inyerezwa ry’umutungo wacu ndakemeranyaho n’abanyamuryango kuko ayo mafaranga yaburiwe irengero, ikibabaje twaracukumbuye dusanga kuva ku wari Perezida wa Koperative Pacifique Byiringiro kugera ku mubitsi buri wese yaragiye yiguriza, andi aburirwa irengero. Twebwe tuyoboye inzibacyuho, mu nteko rusange rero hahagaritswe abantu umunani kugira ngo tuzabakurikirane batakiyoboye”.

Nyamara n’ubwo bivugwa ko amafaranga yabo yaburiwe irengero ngo bagerageza gutumira inteko rusange ihuriwemo n’inzego zo ku Karere ngo zize kubafasha gukemura icyo kibazo ariko nta n’umwe uza kumva ibyabo.

Kuri iyi ngingo Umuyobozi w’ishami rishinzwe iterambere ry’ubucuruzi ribarizwamo n’amakoperative mu Karere ka Musanze, Iyamuremye Jean Dmascene avuga ko inama rusange zagiye zisubikwa, ariko kuri ubu ngo bamenyesheje RCA mu minsi iri imbere kizakurikiranwa.

Yagize ati: “Inama ya mbere yarasubitswe kubera ko 2/3 by’abagize inteko rusange itari yuzuye ubu rero twamenyesheje inzego bireba, RCA yiyemeje kubyinjiramo ku buryo n’uwaba yaranyereje iby’abandi yazakurikiranwa”.

Imvaho Nshya yahamagaye uwahoze ayobora koperative, ari we Pacifique Byiringiro, ntiyitaba telefone kugeza ubwo inkuru isohotse.

Koperative ‘Ubumwe ni Imbaraga’ igizwe n’urubyiruko rugera ku 130 rwo mu mujyi wa Musanze rushinzwe gukwirakwiza indirimbo n’ibihangano na filime, ni bamwe bazwi ku izina ry’abadije.

  • NGABOYABAHIZI PROTAIS
  • Werurwe 2, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE