Musanze:  Imifupa y’ingurube mu isombe yababereye nk’inzaratsi

  • KAMALIZA AGNES
  • Mutarama 23, 2024
  • Hashize ukwezi 1
Image

Inyama y’ingurube abenshi bazi ku izina ry’Akabenzi iri mu zikunzwe cyane n’abatari bake mu Rwanda kubera uburyo inurira, ariko birashoboka ko abatahuye uburyohe bw’umusokoro w’imifupa y’ingurube mu isombe bakiri mbarwa.

Abatuye mu Murenge wa Musanze, Akarere ka Musanze, batahuye iryo banga aho banagereranya imifupa n’inzaratsi kuko umugabo wayiriye mu isombe atongera kurarikira ibyo mu mihana.

Abavuganye n’Imvaho Nshya mu Kagari ka Runyangwe, barirahira imifupa y’ingurube bakavuga ko ntakiryoha nkayo, ndetse ko umugabo wayiriye asigara yikomba iminwa, kandi kuyireka bitajya bimushobokera.

Bagaragaje ko guteka iyo mifupa mu isombe bidasaba kubanza kuyitogosa ukwayo cyane ko iba yoroshye, ahubwo bahita bayishyira mu isombe bakayicanirana na yo kugeza ihiye neza.

Ubusanzwe isombe kugira ngo ishye bisaba nibura kuyicanira amasaha ane, bikaba bivuze ko n’iyo mifupa iba yacaniriwe bihagije ku buryo nta ngorane ishobora guteza.

Nyuma y’ayo masaha ngo isombe iba isohora impumuro yihariye ituma n’utari ufite gahunda yo kurya yumva abishatse.  

Nzabakurikiza Sipiriyani avuga ko uwariye imifupa y’ingurube aba ameze nk’uwariye inzaratsi ndetse ko ukariye asigara yirigata imirwa.

Ati: “Twebwe abagabo iyo tuvuga ngo twariye inzaratsi dore ni kariya kabenzi nutwo dusombe! Uturiye yirya iminwa agashyiraho n’akarimi akarigata nta kibazo rwose, hano twaragikemuye kuko twari tugiye kuzarwaza bwaki”.

Yakomeje agira ati: “Akabenzi k’aha ngaha tukarya ku gasombe umuntu uvuye kugura udufupa (bita utugudi) atunoba mu gasombe kandi rwose abana baturya baba bakeye mu maso.”

Avuga ko n’iyo umugore we adahari ajya kuyihaha akayitekera, ati: “Usanga abagore ari bo bazi kugateka cyane ariko umugore n’iyo yaba adahari nakaviringura ntakibazo mfite!”

Niyonshuti Gaudence na we yirahira uburyohe bw’imifupa y’ingurube, agira ati: “Aha rwose birazwi ko ari uruganda rw’Akabenzi ariko akabenzi kararyoha kandi kaba kayaga cyereka wenda ku muntu utazi kugateka ariko ubundi kararyoha pe!”

Bongeyeho ko kuva babona busheri y’ingurube hafi yabo yakemuye ibibazo byo kubura nyama z’ingurube zibafasha mu kurwanya imbirire mibi.

Sindibona Jean Marie, Umuyobozi wa Busheri A-Z Pig Ltd, yemeje ko aba baturage baguriramo  avuga ko imifupa y’ingurube ikiro kigura amafaranga 1000 kandi iyo igiye mu isombe iryoha kurushaho kandi nawe ayiteka mu rugo rwe ntakibazo.

Imifupa y’ingurube ngo ifasha benshi kurwanya imirire mibi

Dr. Mbonigaba Jean Bosco, Umuyobozi w’Ishami rishinzwe kurwanya indwara zititaweho uko bikwiriye mu Kigo cy’Igihugu cy’Ubuzima (RBC), yasabye abaturage kwitwararika mu gihe bategura imifupa y’ingurube kugira ngo birinde kuba bakwandura inzoka ya Taenia ishobora kuboneka mu nyama z’ingurube yayanduye.

Yavuze ko imifupa na yo ishobora kwinjiramo inzoka ya Taenia kubera ko amagufwa na yo agira udutsi dutoya dutwara amaraso iyo nzoka ishobora kwarikamo.

Gusa yongeyeho ko mu gihe iyo mifupa yaba yatetswe igashya neza nta kibazo yateza abaturage, cyane ko akenshi n’ingurube zibanza gupimwa mbere yo kubagwa ku buryo iyanduye Taenia itabagwa itarabanza kuvurwa.

Ati: “Ubundi imifupa na yo igira udutsi dutoya dushobora kwarikamo inzoka ya Taenia, ariko ubu biragoye kuba habagwa ingurube yanduye kuko zibanza gupimwa. Ariko nanone mu kwirinda ibyago dushishikariza abantu gucanira inyaman y’ingurube ku buryo buhagije kugira ngo n’iyo nzoka iramutse irimo ibe yapfa.”

RBC ishimangira ko inzoka ya Taenia ishobora guterwa n’isuku nke, kandi umubare munini w’abandura iyo ndwara bayanduzwa n’ingurube.

Impuguke mu by’ubuzima zivuga ko iyo Inzoka ya Taenia irenze umuntu ishobora kugera no mu bwonko ikaba yamutera kurwara Igicuri nubwo na cyo ari indwara ishobora guterwa n’izindi mpamvu.

Inzoka zo munda zirimo na Taenia zimwe mu ndwara zititaweho uko bikwiriye (NTDs) Isi yose yahagurukiye kugira ngo zirandurwe cyane cyane mu bihugu bikennye n’ibikiri mu nzira y’amamyambere.

Aborora ingurube banavuga ko uretse kugira inyama ziryoshye zihutisha n’iterambere ry’umuryango
  • KAMALIZA AGNES
  • Mutarama 23, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE