Musanze: Batewe impungenge n’ikiraro kibamugaza n’abana bagatinya kujya ku ishuri

  • NGABOYABAHIZI PROTAIS
  • Ukuboza 14, 2023
  • Hashize amezi 3
Image

Abaturage bo mu Murenge wa Musanze, bavuga ko babangamiwe n’ikiraro gihuza Imirenge ya Cyuve na Musanze, kubera ko kimaze kugira bamwe na bamwe bahanukaho bikabatera ubumuga, ndetse n’abana babo mu bihe by’imvura bagatinya kujya ku ishuri.

Icyo kiraro gitambitseho imbaho gifite ubujyakuzimu buri hagati ya metero 8 na 9 abakinyuraho n’abagituriye bavuga ko bidakurikiranwe ngo kibe cyafatirwa ingamba hari ubwo hari abaturage bazahatakariza ubuzima cyane ko hari n’abantu bakuru bahavunikiye.

Bunane Epimaque wo mu Murenge wa Musanze, Akagari ka Cyabagarura, ni umwe mu baturage bakoresha iki kiraro cyane, avuga ko yigeze kukivunikiraho akivuza kugera no mu bitaro bikuru bya CHUK.

Yagize ati: “Iki kiraro uko ukibona kigenda cyaguka buri munsi haba mu mpande ndetse n’ibujyakuzimu bitewe n’amazi ava mu birunga, nigeze kukigwamo hano mu bitaro bya Ruhengeri barananirwa bampa transiferi byatumye bambagira mu bitaro bya CHUK ubu mfite ibyuma (tige) mu kuguru urabona ko namugaye twifuza ko nibura badukorera ikiraro cyo mu kirere”.

Mukamugema Annonciata wo mu Murenge wa Cyuve we avuga ko atewe impungenge n’iki kiraro cyane cyane ku bana babo nk’abajya ku ishuri cyane ko hari uwigeze kugwamo bakamukuramo.

Yagize ati: “Iki kiraro kizaduhekura ni ukuri nko mu bihe by’imvura hari ubwo bisaba ko duherekeza abana tukabambutsa kugira ngo batagwamo, na nimugoroba tugenda dusimburana hano kugira ngo hatagira abana bagwamo, ibi twabitewe nuko hari uwigeze kugwamo tukamujaburamo yajandamye, dufite ikibazo gikomeye kuko umutima uhora uhagaze mu gihe abana batari bajya mu kiruhuko”.

Uyu mubyeyi akomeza avuga ko kuba bashyiraho ibiti nta nkuta zisigasira umukingo urambitseho ibiti ntacyo byamara, ahubwo agasaba ubuyobozi kureba uburyo bwabonera umuti urambye iki kibazo.

Mu gushaka kumenya icyakorwa kugira ngo nibura abaturage babe babona inzira nyabagendwa harimo ikiraro bafitiye icyizere Imvaho Nshya yaganiriye n’Umunyamabanga Nshingwabikorwa w’Umurenge wa Musanze Edouard Twagirimana, maze avuga ko iki kibazo kimaze igihe bakora ubuvugizi ariko ngo barakomeza kubyibutsa inzego bireba.

Yagize ati: “Kiriya kiraro giteye impungenge nanjye kintera ubwoba; niba umuntu umwe aguyemo undi akagwamo urumva ko biba ari ikibazo, twakiganiriyeho n’inzego ndetse biri muri gahunda twandikiye akarere tugasaba uburenganzira bwo gutema ibiti mu ishyamba rya Leta kugira ngo gisanwe, ubwo turakomeza kubyitaho.”

Amazi ava mu birunga akenshi ni yo akunze gutera impanuka ku buryo yuzura agasabagira no mu ngo z’abaturage, ibi biraro by’ibiti na byo rero mu bihe by’imvura bigenda bitengagurika kubera imikingo biba biryamyeho, icyo gihe rero hari ubwo abagenzi bakigera hejuru kiba cyamanuka kikagwa mu muferege, abaturage rero bifuza ko Leta yakomeza ya gahunda yo kubaka ibiraro byo mu kirere, mu gihe igihangana n’imyuzi yo mu birunga.

  • NGABOYABAHIZI PROTAIS
  • Ukuboza 14, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE