Abaturiye Umudugudu w’icyitegererezo wa Kinigi barasaba guhabwa ingurane bakimuka

  • NGABOYABAHIZI PROTAIS
  • Mutarama 5, 2024
  • Hashize amezi 5
Image

Bamwe mu baturage bo mu Murenge wa Kinigi, Akarere ka Musanze, bavuga ko babangamiwe n’umunuko uva mu byobo bifata umwanda uva mu bwiherero bwo mu mudugudu w’ikitegererezo wa Kinigi, bakaba bifuza ko bahabwa ingurane  bakimuka.

Harerimana Doroteya wo muri Cyabagarura, Umudugu wa Gikeri avuga ko iki kibazo bakigejeje ku bayobozi babo ariko nta gisubizo bahabwa.

Yagize ati: “Ibi byobo biratubangamiye cyane hano buri gihe haba hari umunuko, mu gitondo, nimugoroba mbese hano byaratuyobeye natwe ntekereza ko tumaze kunuka ni uko tutajya tubasha kumenya ko hari umwe unukira undi, ubu ntawagira ngo arire hanze igihe cyose, amasazi aba ava kuri ibi byobo ndetse n’imibu ya nijoro rwose nibadutabare”.

Hategekimana Daniel we avuga ko byaba byiza babaguriye bakabona ingurane bakimuka.

Yagize ati: “Turambiwe no kurya dukoma amasazi ava mu Mudugudu haruguru aha, tekereza ko tubayeho gutya imyanda idutera indwara ubuyobozi burebera, reba dutuye impande n’impande, uriya wo hepfo we hari ubwo iyo byuzuye bitembera mu mbuga ye, ubu abana bacu bashobora kuzagwamo.

Ikindi ibi bintu bizadutera indwara zikomoka ku mwanda ndetse n’ubuhumekero kuko duhumeka umwuka mubi cyane, rwose Perezida yarakoze kuduha uriya mu Mudugudu kuko yatabaye bagenzi bacu ariko natwe abubatse ibi bifose amenye ko babyubatse mu buryo butubangamiye”.

Mukandinda we avuga ko batinya kubyuka mu gitondo cya kare kubera umunuko.

Yagize ati: “Iyi myanda iva mu Mudugudu wa Kinigi muri ariya magorofa azatuma turwara amacinya na kolera hari indwara zandurira mu mwuka ikindi ni uko duhumeka umwuka mubi turasaba ko Leta yatwimura hano nta munyarwanda ukwiye kubaho muri ubu buryo”.

Ibyo byobo birarangaye bigaragarira amaso ko umwanda uhari ushobora gukurura ibibazo, ndetse n’abana bashobora gukinira hafi aho bakaba bagwamo, biri kuri metero 200 uvuye mu Mudugudu w’icyitegererezo wa Kinigi kandi abaturage bafite ikibazo cyane ni abo mu Kagari ka Cyabagarura, kuko amatiyo ayobora iyo myanda yambukiranyije umuhanda ava mu mudugudu w’ikitegererezo uri mu Murenge wa Kinigi.

Umuyobozi w’Akarere ka Musanze Nsengimana Claudien avuga ko iki kibazo bagiye kugikurikirana.

Yagize ati: “Iki kibazo ntabwo nari nkizi gusa ubu tugiye kubikurikirana mbaze nanone abashinzwe imyubakire, kandi birumvikana kuko niba ibyo byobo bidapfundikiye byakururira abaturage ingorane zituruka ku isuku nkeya, ntibyaba ari byo rwose kuyobora imyanda mu baturage ngo ibateze umwanda”.

Umudugudu w’Icyitegererezo wa Kinigi watangiye kubakwa mu mpera za 2020, urimo ibikorwa remezo byose abawutuye bakeneye, wuzuye utwaye miliyari zisaga 20 z’amafaranga y’u Rwanda. Utuwe n’imiryango 144 yari ituye nabi n’indi itishoboye yatujwe muri uyu Mudugudu uherereye mu Murenge wa Kinigi mu Karere ka Musanze.

  • NGABOYABAHIZI PROTAIS
  • Mutarama 5, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE