Musanze: Abamaze umwaka babitse mudasobwa bishimiye guhugurirwa kuzikoresha

  • NGABOYABAHIZI PROTAIS
  • Werurwe 1, 2024
  • Hashize amezi 2
Image

Abanyamuryango ba Koperative Dukomezubuzima Mudende ikorera mu Murenge wa Shingiro, Akarere ka Musanze bishimiye amahugurwa bahawe agiye kubafgasha gutangira gukoresha mudasobwa bari bamaze umwaka babitse kuva bazigura.

Ni Koperative igizwe n’abafite ubumuga ihuriwemo n’abanyamuryango 20, bavuga ko amahugurwa bahawe n’umushinga Feed Future the Rwanda Hanga Akazi, agiye kubafasha kubika inyandiko zabo no koroshya ingendo bakoraga bazijyanira abandi ngo baziboherereze ku ikoranabuhanga.

Mukeshimana Clementine, Umunyamabanga wa Koperative Dukomezubuzima Mudende, yabanje gushimira Leta y’u Rwanda ikomeza gufasha abafite ubumuga kwisanga mu nzego zose z’iterambere ry’Igihugu.

Yagize ati: “Aya mahugurwa twahawe mu gihe cy’ukwezi yatumye twumva ko natwe turi abantu b’agaciro, ibi rero bije gukura ho ibira rya hato na hato ry’impapuro twajyaga twandikaho, nta nyandiko yacu izongera kubura.”

Mukeshimana akomeza avuga ko kubika urutonde rw’abanyamuryango na za raporo byajyaga bifata umwanya munini.

Na none kandi hari ubwo baburaga uko bigenzura ku birebana n’amakuru y’umutungo none ubu bigiye kuborohera ndetse ngo bizagabanya ibyago byo kugabanya umutungo.

Yagize ati: “Twahawe ikunga y’imashini eshatu, izo zose zigomba kujya zibika inyandiko zacu. Bivuze rero ko nta faranga ryacu rizongera kunyerezwa binyuze mu munwa w’ikaramu kuko inyandiko zizaba ziri ahantu hanyuranye kandi noneho byakozwe n’abanyamuryango uretse bamwe bajya bakoresha abatari abanyamuryango bakora ibyo bishakiye.”

Nkurikiyimana Emmanuel we avuga ko batari bazi akamaro n’imikorere ya mudasobwa, kandi ngo baterwaga ipfunwe no gukomeza kurebera izo mashini kandi hafi ya bose bazi gusoma no kwandika.

Yagize ati: “Tekereza ko tumaranye imashini umwaka ziparitse ariko kubera ko tutari tuzi kuzikoresha zari zigiye kuzagwa umugese none twamenye akamaro kazo.    Kubera imiyoborere myiza natwe abafite ubumuga tugiye kujya twikorera ibyacu mu gihe hari abatubonagamo abantu batagira icyo bamaze.

Ikindi ni uko tuzaomeza kwigishanya natwe uburyo bw’ikoranabuhanga, kandi tugiye gutangiza gahunda y’irembo kuri santeri y’ubucuruzi dukoreraho.”

Come Ndemezo, Umukozi w’umushinga Feed the Future Rwanda Hanga Akazi uterwa inkunga na USAD witwa, avuga ko bafite umushunga wo kwita ku banyamamuryango ba Koperative ariko bibanda ku rubyiruko ndetse n’abagore ariko cyane cyane abafite ubumuga.

Yagize ati: “Usanga abafite ubumuga bafite ibikorwa binyuranye yemwe n’ubushobozi, ariko uburyo bwo kumenyekanisha ndetse no kubyaza umusaruro ibyo bakora, haba ari ukubicunga neza mu buryo bw’ikoranabuhanga, usanga baragiye basigara inyuma cyane.”

Yavuze ko iyo koperative bayifashije muri byinshi bakomeje kugerageza uburyo bwose bushoboka kugira ngo ibyo bize batangire kubibyaza umusaruro.

Akomeza avuga ko uyu mushinga ufite igihe cy’imyaka 5, bakaba bizeye ko n’izindi koperative zinyuranye zizagerwaho.

Arasaba abahuguwe gushyira mungiro amasomo bahawe, bakamenyekanisha ibyo bakora no gukomeza kwigisha bagenzi babo ikoranabuhanga.

Yabijeje ko bazakomeza kubakurikirana babafasha no kumenya kwita kuri biriya bikoresho by’ikoranabuhanga.

Kayiranga Theobald, Umuyobozi wungirije w’Akarere ka Musanze ushinzwe imibereho myiza y’abaturage, avuga ko  amahugurwa nk’ariya  ari muri gahunda ya Leta  aho buri wese agomba kugendana n’ikoranabuhanga.

Yemeje ko umuntu agomba kubika ibintu bye nk’inyandiko binyuze mu ikoranabuhanga, agasaba abo bose bahuguwe kubyaza umusaruro ubumenyi bahawe no kubusakaza ku bandi.

Yagize ati: “Ibyo bize babigeze ku bandi babike neza inyandiko zabo, kandi ibyo bakoraga barusheho kubiteza imbere ndetse babibyaze umusaruro kandi abafite ubumuga na bo bumve bashoboye.”

Yasabye ababyeyi bababyaye cyangwa barera abana bavukanye ubumuga kutabahisha mu gikari kuko hanze hari amahirwe menshi abategereje kandi na bon go barashoboye.

Ati: “Byagaragaye ko ufite ubumuga na we iyo ahawe uburenganzira bwe akigishwa umwuga atanga umusaruro”.

Koperative Dukomezubuzima kugeza ubu ifite abanyamuryango bagera kuri 300, bakaba bakora ubuhinzi bw’ibirayi, kuri ubu bakaba bafite umutungo ukabakaba muri miliyoni 40 harimo inyubako amasambu n’inzu.

Come Ndemezo, Umukozi w’umushinga Feed the Future Rwanda Hanga Akazi
  • NGABOYABAHIZI PROTAIS
  • Werurwe 1, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE