Musanze: Abakoraga urugendo rw’amasaha 4 bajya kwivuza begerejwe ivuriro

  • NGABOYABAHIZI PROTAIS
  • Mata 4, 2024
  • Hashize ibyumweru 2
Image

Abagana ikigo Nderabuzima cya Gacaca gihereye mu Murenge wa Gacaca, Akarere ka Musanze, barashimira imiyoborere myiza irangajwe imbere na Perezida wa Repubulika Paul Kagame yabakuye mu bwigunge ibegereza serivisi z’ubuvuzi zabaruhuye amasaha ane bamaraga mu ngendo.

Ikigo Nderabuzima cya Gacaca cyafunguye imiryango yacyo ku wa 2 Mutarama 2024, kikaba cyaratangiranye abaforomo icyenda.

Cyuzuye gitwaye amafaranga y’u Rwanda asaga miliyoni 648 aho biteganyijwe ko kizajya gitanga na serivisi z’indwara zp mu kanwa.    

Abatangiye kuryoherwa no kubonera serivisi hafi yabo muri uyu Murenge wari usigaye wonyine utagira ikigo nderabuzima, bavuga ko indwara zoroheje zitakibazaba kugana mu Mujyi wa Musanze aho bakoreshaga nibura amasaha ane kugira ngo babone serivisi z’ubuvuzi.

Ikigo Nderabuzima cya Gacaca giherereye ku  bisaga 20, uvuye ku muhanda munini wa Musanze Cyanika,  kikaba mu misozi Miremire hafi ku nkengero z’ikiyaga cya Ruhondo.

Bamwe mu baturage bakigana ubu mu gihe cy’amezi abiri gitangiye, bavuga ko cyabaruhuye kubyarira mu ngo ndetse no kunywa ibiti by’imiravumba bivura indwara zinyuranye.

Banyangiriki Beatrice w’imyaka 48 y’amavuko wo mu Kagari ka Kabirizi, avuga ko mu myaka yamaze kubera imiterere y’aho bari batuye cyane ko ari mu misozi miremire kwivuza ngo byarabagoraga.

Yagize ati: “Natwe kera kabaye tubonye ikigo nderabuzima cyo kwivurizaho, ababyeyi tukabyarira hafi. Iki kigo nderabuzima dukesha imiyoborere ya Paul Kagame kije kuturuhura ingendo twakoraga turi mu mujishi tugiye kubyarareba iyi misozi na we, abagabo bajyaga bayimanuka bahetse umubyeyi cyangwa se umurwayi, hari abagore babyariraga mu ngo bakahasiga ubuzima cyangwa se abana bagahita bapfa kubera kubura ababitaho uko bikwiye, twishimiye ibyo ubuyobozi bwacu bugenda butugezaho.”

Ndibwami Martin, Umujyanama w’Ubuzima mu Murenge wa Gacaca, avuga ko bajyaga bakora ingendo ndende bajya kwivuza ibintu byabagoraga.

Yagize ati: “Hari ubwo twajyaga kwivuza mu yindi Mirenge nka Karwasa, za Muhoza mu Bitaro bya Ruhengeri abandi bakajya ku Bitaro bya Nemba nabwo bakubise amaguru, hari n’ababonaga urugendo ari rurerure bagahitamo kwivura magendu.”

Uyu Mujyanama w’Ubuzima Ndibwami, akomeza avuga ko ngo kuba barabonye ikigo nderabuzima hafi byagabanyije amakimbirane ku bijyanye n’abahetsi.

Yagize ati: “Ubundi tugira gahunda y’ingobyi iyo uri umugabo mu Isibo ntuze guheka umurwayi icyo gihe tuguca amande ukishyura abiriwe bahetse; Ushobora gutanga umusururu (ikigage) cyangwa se bakaguca amafaranga atari munsi y’ibihumbi 10. Ubu rero ivuriro ryaratwegereye urafatwa ukijyana kandi nta n’uwakwinubira guheka umurwayi mu gijhe ivuriro riri hafi. Ikindi ni uko imbangukiragutabara  isigaye itugeraho.”

Yongeraho ko kugeza ubu bubakiwe n’umuhanda ugera ku Kigo Nderabuzima, n’ibindi bikorwa remezo birimo amazi, amatara.

Avuga kandi ko izo mpinduka zatumye na bo bavugurura imiturire kubera ko ibikorwa by’iterambere byabegerejwe hafi.  Ati: “Ibi kandi byatumhye twubaka inzu nziza tubyaza umusaruro nka resitora, amacumbi n’izindi nyubako zibyazwa umusaruro.”

Umuyobozi w’Ikigo Nderabuzima cya Gacaca Nirere Leopold, na we ashimangira ko iki kigo nderabuzima cyari gikenewe kugira ngo abaturage bakomeze kubona serivisi nziza zo kwivuza.

Yagize ati: “Bitabaye imiyobirere myiza irangajwe imbere na Nyakubahwa Paul Kagame aha hantu ntabwo hari kubakwa ivuriro, nawe urabona ko ari ibintu bigoye kubaka kuri iyi misozi. Ubu rero abaturage bafite umudendezo kuko begerejwe serivisi z’ububyaza n’izindi.”

Ikigo Nderabuzima cya Gacaca kizatanga serivisi  zo gususuma indwara, gupima ibizamini by’indwara zinyuranye, kwita ku mubyeyi n’umwana harimo no gupima inda z’ababyeyi kimwe no gutanga inkingo

Nanone kandi kizatanga serivisi zo kuboneza urubyaro, kunoza imirire n’ibindi. Abaturage basabwe gusigasira ibyagezweho no kuyoboka serivisi zitangirwa kuri iryo vuriro.

Ikigo Nderabuzima cya Gacaca kizajya gitanga serivisi ku baturage 30 902 bo mu Murenge wa Gacaca n’indi iwukikije .

Mu karere ka Musanze, Umurenge wa Gacaca ni wo utagiraga Ikigo Nderabuzima, aha akaba ari ho bahera bashimira ubuyobozi, kuba mu myaka 30 u Rwanda rwibohoye ingoyi y’igitugu n’ivangura bahawe ikigo nderabuzima.

  • NGABOYABAHIZI PROTAIS
  • Mata 4, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE