Muhanga: Nyabikenke barashimira Perezida Kagame wabahaye ibitaro

  • AKIMANA JEAN DE DIEU
  • Gashyantare 2, 2024
  • Hashize amezi 4
Image

Bamwe mu babyeyi bafashijwe n’inzu y’Ababyeyi mu bitaro bya Nyabikenke barashimira Perezida wa Repubulika Paul Kagame wabahaye ibitaro bigezweho byabarinze ingendo zo kujyanwa ku bitaro bikuru bya Kabgayi ndetse no ku bitaro bya Ruli biri mu Ntara y’Amajyaruguru mu Karere ka Gakenke.

Mu Kiganiro bahaye Imvaho Nshya bavuga ko hatarazanwa inzu y’ababyeyi bajyanwaga ku bitaro bya Kabgayi byanashoboraga kuba byakwambura ubuzima umwana n’umubyeyi.

Umutoni Sarah avuga ko yaje kubyara yasenze asaba Imana kubyara neza ariko akavuga ko abyara bwa mbere yajyanywe i Kabgayi ariko noneho ajya hafi.

Yagize ati: “Njyewe njya kuza hano kubyara nasabaga Imana ko yamfasha nkabyara neza, kuko mbere najyanywe ku bitaro bya Kabgayi ngenda mfite ubwoba, arko ubu byagenze neza kuko urugendo rujya i Kabgayi utwite ruravuna cyane kubera iyi mihanda yerekeza i Muhanga”.

Mugabekazi Josephine avuga ko kwegerezwa ibi bitaro byabafashije kuko umubyeyi udafashijwe n’ikigo Nderabuzima cya Nyabikenke ahita yihutanwa ku bitaro by’Akarere bya Nyabikenke agahita afashwa adakoze urugendo rurerure.

Ati: “Muzanshimire Perezida wa Repubulika wacu Paul Kagame waduhaye ibi bitaro kuko mbere iyo utafashwaga n’Ikigo Nderabuzima cya Nyabikenke wahitaga ujyanwa i Kabgayi rimwe na rimwe imodoka ikabura ukaba wahapfira ariko iyo bakunaniwe uhita uzamukanwa ku bitaro bikuru twahawe ugafashwa bidatinze”.

Abaherekeza ababyeyi baje ku bitaro bya Nyabikenke na bo bashimira Perezida Paul Kagame kuba yarabahaye biriya bitaro.

Mukamana Epiphanie avuga ko ashimira Perezida wa Repuburika wabahaye ibi bitaro akavuga ko ababyeyi baruhutse ingendo zo mu ngobyi y’abarwayi ikagenda imucekagura ku buryo yanapfana nuwo atwite.

Ati: “Turashimira Perezida wacu Paul Kagame waduhaye ibi bitaro kuko twebwe nk’ababyeyi twakoraga ingendo ndende bakoraga bajyanywe ku bitaro bikuru bya Kabgayi imodoka igenda imucekagura mu migunguzi y’iyi mihanda bikaba byanakurura urupfu ku mubyeyi n’uwo atwite”.

Mugemana Paul avuga ko umugore we yabyaye ku nshuro ya 2 ariko umwana wa Mbere yamubyariye i Kabgayi akavuga ko icyo gihe yamubonye agarutse atabashije kumusura ku bitaro.

Yagize ati: “Njyewe ndishimye kuko baduhaye ibi bitaro kuko umugore wanjye abyara bwa mbere yajyanywe i Kabgayi arinda agaruka mu mujyi ntamusuye nohereza ingemu ariko ubu byaroroshye kuko nazaga mu gitondo na nimugoroba nkareba nuko akana kameze muzadushimire Perezida wacu wabonye ko dukeneye igikorwa nk’iki cyo kudufashiriza iwacu”.

Umuyobozi Mukuru w’Ibitaro bya Nyabikenke, Dr Nkikabahizi Fulgence avuga ko mu gihe cy’ukwezi n’igice batangiye gutanga serivisi bamaze kwakira ababyeyi baje kubyara kandi aba bose iyo hataza ibi bitaro byasabaga ko bose boherezwa i Kabgayi.

Yagize ati: “Ni byo tumaze ukwezi kurenga dutanga serivisi ku babyeyi n’abana bavuka batujuje igihe cyangwa bakeneye guhabwa serivisi zihabwa impinga bivuze ko uwashoboraga kuvukira ku kigonderabuzima agomba guhabwa iyi serivisi yashoboraga no kuhaburira ubuzima ndetse n’ababyeyi byananiranye bakoherezwa i Kabgayi”.

Akomeza avuga ko mu kwezi kurengaho bamaze kwakira ababyeyi 166 barimo ababyaye neza 61, ababazwe 31 havuka abana 95 mu gihe ababyeyi bivuje izindi nwara z’ababyeyi ari 66, abana bafashirijwe muri serivisi z’abana ni 23 (neonatology).

Mu rugendo aherutse kugirira muri ibi bitaro Minisitiri w’Ubuzima, Dr Sabin Nsanzimana yashimiye ibi bitaro uburyo birimo gufasha abakoraga ingendo bajya gushaka ubuvuzi akongeraho ko nta mubyeyi uzongera kurembera mu rugo kuko Perezida wa Repuburika yabegereje ibitaro by’ikitegererezo.

Ibitaro bya Nyabikenke byitezweho kugabanya umubare w’abaturage bo mu Karere ka Muhanga bambuka bajya kwivuriza mu Karere ka Gakenke ku bitaro bya Ruli bambutse umugezi wa Nyabarongo.

  • AKIMANA JEAN DE DIEU
  • Gashyantare 2, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE