Muhanga: Gare ya Muhanga yatangiye gusanwa abayikoresha bariruhutsa

  • AKIMANA JEAN DE DIEU
  • Mutarama 12, 2024
  • Hashize amezi 2
Image

Hashize igihe Imvaho Nshya ikoze inkuru yagaragazaga ko gare ya Muhanga abayikoresha binubira ko yangiritse bikabije, yuzuyemo ibinogo birekamo ibiziba bikabangamirta abayikoresha, none kuri uyu wa Gatanu tariki ya 12 Mutarama yatangiye gukorwa bariruhutsa.

Mu ijoro ry’itariki ya 11 Mutarama 2024 ni bwo imodoka zihetse imashini zisanzwe zikora imihanda zaraye zizanywe ndetse mu gitondo tariki ya 12 Mutarama 2024 abakoresha gare ya Muhanga bose bashyizwe mu gice kimwe naho ikindi imashini zitangira kugisenya bahereye ahari ibinogo birekamo amazi.

Mu kiganiro Imvaho Nshya yagiranye n’abakoresha iyo gare bavuga ko ibyifuzo byabo byumviswe bakemeza ko nubwo bigoye kumenya aho bategera imodoka ariko nibura gare igiye gukorwa.

Murenzi Theogene avuga ko hasaga nabi kandi bikagaragarira buri wese kubera ibinogo byarekagamo amazi bikanangiza imodoka ntoya.

Yagize ati: “Turishimye cyane kuko hano hantu hasaga nabi cyane kandi bikagaragara nabi kuko umujyi wacu ugomba kugaragara neza. Iyo imvura yagwaga harekagamo amazi ukagir ango ni ibyuzi by’amafi bahaciye kandi bikanangiza imodoka ntoya”.

Umushoferi w’imodoka ntoya Rurangwa Pierre avuga ko kuba hagiye gukorwa neza bizatuma abatinyaga  kwinjira muri gare bongera kujya bahakoresha.

Ati: “Twishimiye ko hagiye gukorwa kuko nkanjye usanzwe utwara imodoka ntoya byangoraga kubera ibi binogo kuko benshi muri twebwe twafatiraga abagenzi hanze ya gare ariko tuzongera twinjiremo nibamara kuhakora”.

Umuyobozi Mukuru wa Jali Real Estate Ltd, Benoit Nsengiyumva avuga ko bihaye icyumweru kimwe aho abagenzi bategera imodoka hakaba hongeye bahakoreshwa neza

Yagize ati: “Ni byo imirimo yo gusana ikibuga cya gare ya Muhanga cyatangiye gukorwa kandi mu cyumweru kimwe ni ukuvuga iminsi nibura umunani haraba hongeye kuboneka hanatangire gukoreshwa hameze neza”.

Umuyobozi Mukuru wa Jordan Real Estate Ltd, Jean de Dieu Katabogama avuga ko bihaye iminsi 8 ahategerwa imodoka hagomba habonetse, ariko iminsi ishobora kwiyongera bitewe n’ikirere kuko iyi mirimo bazahakora yatinzwa n’imvura kuko ntabwo washyiraho godoro (Goudrons) hariho amazi bihita bipfa.

Akomeza avuga ko bagiye gupima bakamenya ubuhaname bwatuma amazi yose ajya mu miyoboro yagenwe akagenda aho kureka mu kibuga kuko ari yo yahangije.

Yagize ati: “Iki kibuga kigomba gushyirwamo kaburimbo y’ibice 2 bakunze kwita “Bicouche” kandi izaba ikomeye cyane, kuko twifuza gukemura iki kibazo burundu ntikizongere kubaho”.

Kugeza ubu imodoka zitwara abagenzi zirimo gutwara abantu mu buryo bwa rusange zirimo gukoresha igice kimwe harimo Volcano, Kivu Belt, Horzon naho Ritco iratwarira abagenzi hanze ya gare kimwe n’imodoka nto za Minibus zo zirimo gutwarira imodoka munsi ya Gare ahateganyijwe kujya Sitasiyo ya lisansi ku muhanda ugana i Huye.

  • AKIMANA JEAN DE DIEU
  • Mutarama 12, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE