Muhanga: Abasoje Urugerero 370 bisabiye kwinjizwa muri FPR Inkotanyi

  • AKIMANA JEAN DE DIEU
  • Ukuboza 19, 2023
  • Hashize amezi 2
Image

Abagera kuri 370 basoje Urugerero rw’Inkomezabigwi icyiciro cya 11, mu Murenge wa Nyamabuye, Akarere ka Muhanga, bisabiye ko bakwinjizwa mu Muryango FPR Inkotanyi, bemeza ko biteguye gufatanya n’abandi banyamuryango mu gukorera u Rwanda no gusigasira ibyagezweho.

Bamwe mu bisabiye kwinjira mu Muryango FPR Inkotanyi baravuga ko nyuma y’amateka bigishijwe Igihugu cyanyuzemo bifuza gukomeza gufatanya na Perezida wa Repuburika Paul Kagame, akaba Chairman w’uyu Muryango gukomeza gusigasira iterambere n’ibindi amaze kugeza ku baturage.

Muhirwa Ange Patrick avuga ko bimushimishije kuba yemerewe kwinjira mu Muryango FPR Inkotanyi kubera ibyiza umaze kugeza ku gihugu harimo n’amashuri y’ibanze yabafashije kwiga none ubu bakaba biteguye gutanga umusanzu wabo.

Yagize ati: “Ndishimye cyane kuko nemerewe kuba umunyamuryango wa FPR Inkotanyi kuko hari ibyiza uyu Muryango wagejeje ku baturage harimo n’amashuri twigamo kuko mu mateka twumvise ntabwo byashobokaga, higaga bake batoranyijwe kandi ari abana bo mu bayobozi n’abo bafitanye ubucuti.”

Umutoni Bernadette avuga ko yiyemeje keinkira muri FPR Inkotanyi kugira ngo na we azabashe kugira uruhare mu iterambere nk’uko abandi banyamuryango babigiramo uruhare no kwanga ikibi cyasubiza Igihugu ahabi u Rwanda rwanyuzemo.

Yagize ati: “Niga mu mwaka wa Gatanu nifuje kwinjira mu Muryango wa FPR Inkotanyi kugira ngo nanjye nkomeze kugira uruhare mu iterambere ry’Igihugu nk’uko abandi banyamuryango bakomeza gufatanyiriza hamwe bagafasha abafite intege nkeya; kandi bakanigisha abakiri bato kwanga ibitekerezo byasubiza Igihugu mu makuba cyanyuzemo”.

Mupenzi Anne Marie avuga ko yisabiye ntawumushyizeho intege ngo narahire ku ntege agashimira abamufashije kugera ku nzozi ze zo kwinjira mu Muryango FPR Inkotanyi.

Yagize ati: “Njyewe nisabiye n’umutimanama wanjye, nta muntu unshyizemo umugozi ngo mvuge indahiro ku gahato, ariko ndashimira aba bamfashije kugera ku ntego zanjye numvaga nshaka kugeraho zo kwinjizwa mu muryango, kandi nzarinda igihango ngiranye n’Umuryango wa FPR Inkotanyi nijiyemo ku busabe bwanjye.”

Umuyobozi w’Umuryango FPR Inkotanyi mu Murenge wa Nyamabuye, Ruberanziza Jean Paul, avuga ko bishimiye kwakira uru rubyiruko akarwibutsa ko ibikorwa byabo bigomba gushingira mu rugaga rw’urubyiruko rushamikiye ku Muryango FPR Inkotanyi.

Yagize ati:”Twishimiye kwakira abanyamuryango bashya bakiri bato, bityo rero turabasaba ko bakwiye kugira uruhare mu bikorwa bitandukanye bikorerwa mu rugaga rw’urubyiruko rushamikiye ku Muryango FPR Inkotanyi, kandi turabasaba kugira uruhare mu kwigisha abandi kwirinda ibiyobyabwenge n’ibindi bishobora kwangiza inzozi zabo bakabyirinda.”

Anibutsa ko umunyamuryango wa FPR Inkotanyi asabwa gukomeza kubaka ubumwe bw’Abanyarwanda no kubusigasira harwanywa icyabuhungabanya.

Mu Karere kose abarangije urugerero bagera ku 1800, bakaba barikubye gatatu ugereranyije n’indi myaka yatambutse.

Umurenge wa Nyamabuye wakiriye abanyamuryango ba FPR Inkotanyi bashya basaga 370 muri 386 bakoze urugerero gusa harimo abarahiye mbere batongeye kurahira.

  • AKIMANA JEAN DE DIEU
  • Ukuboza 19, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE