Mu itumba 2024 hateganyije imvura idasanzwe –Meteo Rwanda

  • ZIGAMA THEONESTE
  • Gashyantare 23, 2024
  • Hashize amezi 2
Image

Ikigo cy’u Rwanda gishinzwe Ubumenyi bw’Ikirere (Meteo Rwanda) cyatangaje ko igihe cy’Itumba 2024, cyiganjemo imvura iri ku gipimo cyo  hejuru y’isanzwe igwa gisaba inzego za Leta , iz’abikorera n’Abanyarwanda bose, kwitwararika mu guhangana n’iyo mvura idasanzwe.

Meteo Rwanda yabigarutseho kuri uyu wa Gatanu tariki ya 23 Gashyantare 2024, ivuga ko ubusanzwe imvura y’Itumba isanzwe iba iri hagati ya milimetero 200-700 mu gihugu hose bikaba biteganyijwe ko iy’uyu mwaka izarenga ibyo bipimo.

Meteo Rwanda yatangaje ko imvura iteganyijwe muri iki gihe izaba ituruka mu nyanja ngari, cyane cyane iya Pasifika, ahari ubushyuhe bukiri hejuru  kugeza  mu gihembwe cy’Itumba rya 2024.

Ibyo ngo bizatuma hagwa imvura idasanzwe mu Rwanda no bihugu by’Akarere ruherereyemo.

Imvura iri hagati ya milimetero 300 na 400, iteganyijwe henshi mu Turere twa Nyagatare na Gatsibo no mu Majyaruguru y’Akarere ka Kayonza.

Imvura iri hagati ya milimetero 400 na 500, iteganyijwe mu Karere ka Kirehe, mu bice byinshi by’Akarere ka Kayonza, igice gito cy’uburengerazuba bw’Uturere twa Nyagatare na Gatsibo, mu burasirazuba n’Amajyaruguru y’akarere ka Rwamagana, amajyepfo n’uburengerazuba bw’Akarere ka Ngoma, ibice byinshi by’Akarere ka  Bugesera n’Amajyepfo y’Iburasirazuba bw’Akarere ka Gicumbi.

Imvura iri hagati ya milimetero 500 na 600 iteganyijwe mu Mujyi wa Kigali, Amajyepfo y’Akarere ka Rwamagana, amajyaruguru y’Akarere ka Ngoma, uburengerazuba bw’Akarere ka Bugesera, ibice byinshi by’Uturere twa Kamonyi, Gisagara, Ruhango, Nyanza, amajyepfo y’Uturere twa Muhanga na Ngororero ndetse n’uburasirazuba bw’Uturere twa Huye na Nyaruguru.

Imvura iri hagati ya milimetero 600 na 700 iteganyijwe mu Karere ka Rutsiro, Amajyepfo y’Uturere twa Rubavu na Gakenke, ibice byinshi by’Uturere twa Rulindo na Gicumbi, uburengerazuba bw’Uturere twa Huye, Nyamasheke, Rusizi na Nyanza, amajyaruguru y’iburasirazuba bw’Akarere ka Nyamagabe, ibice byo hagati mu Karere ka Muhanga n’amajyaruguru y’Akarere ka Ngororero.

Imvura iri hagati ya milimetero 700 na 800 iteganyijwe mu Burasirazuba bw’Uturere twa Rusizi na Nyamasheke, amajyepfo y’Akarere ka Karongi, uburengerazuba bw’Uturere twa Nyamagabe na Nyaruguru, mu Turere twa Musanze na Nyabihu, amajyaruguru n’uburengerazuba bw’Uturere twa Gakenke na Burera, Amajyaruguru y’Iburasirazuba bw’Akarere ka Rubavu no mu bice byo ku Ndiza muri Muhanga.

Imvura yakomeje muri Mutarama na Gashyantare ari cyo gihe cy’Urugaryi, Meteo igahamya ko izakomeza mu gihe cy’Itumba.

Biteganyijwe ko imvura y’Itumba izacika mu cyumweru cya gatatu cya Gicurasi 2024, mu Karere ka Kirehe, mu burasirazuba n’amajyepfo y’Akarere ka Ngoma, mu gice gito cy’Akarere ka Bugesera no mu gice gito cy’Akerere ka Gisagara.

Ni imvura kandi izacika mu cyumweru cya kane cya Gicurasi 2024, henshi mu Ntara y’Amajyepfo, Umujyi wa Kigali no mu bice by’Akarere ka Rwamagana, Bugesera, Ngoma na Kayonza.

Meteo Rwanda kandi itangaza ko imvura y’Itumba izacika mu bice bisigaye by’igihugu mu cyumweru cya mbere cya Kamena 2024.

Umuyobozi wa Meteo Rwanda Gahigi Aimable, yatangaje ko bitewe n’imvura nyinshi yaguye mu Muhindo (Nzeri-Ukuboza) wa 2023, igakomeza no mu Rugaryi (Mutarama-Gashyantare) 2024, yatumye ubutaka busoma mu bice byinshi by’Igihugu.

Yavuze ko kandi ashingiye ku mvura iteganyijwe mu Itumba 2024, na yo izaba iri hejuru gato y’impuzandengo y’igihe kirekire y’imvura iboneka mu Itumba yatanze ubutumwa bwo kwirinda ingaruka.

Yagize ati: “Ikigo cy’u Rwanda gishinzwe Ubumenyi bw’Ikirere (Meteo Rwanda) ku bufatanye na Minisiteri y’Ibidukikije, Minisiteri ishinzwe Ibikorwa by’Ubutabazi (MINEMA), Ikigo cy’u Rwanda gishinzwe Iterambere ry’Ubuhinzi n’Ubworozi (RAB), barasaba inzego zose za Leta, Imiryango idaharanira inyungu, imishinga itandukanye ikorera mu Rwanda, ibigo by’abikorera ku giti cyabo ndetse n’abaturarwanda bose muri rusange ko bakwiriye gushingira kuri iri teganyagihe bagafata ingamba zijyanye no gukumira ingaruka zituruka ku mvura nyinshi, iteganyijwe mu Itumba rya 2024.”

Mu ngamba Gahigi yagaragaje zo kwirinda imvura idasanzwe y’Itumba 2024, harimo kwihutisha ibikorwa by’isarura no gufata neza umusaruro, kwita ku bikorwa byo kurwanya isuri, kwita ku bikorwa remezo cyane cyane gusibura imigende n’imiyoboro y’amazi, gufata amazi no kuyayobora ahabugenewe.

Abaturage nanone kandi bashishikarizwa guhinga ku gihe hakurikijwe ingengabihe itangwa n’abashinzwe ibikorwa by’iyamamazabuhinzi, gufata ingamba zo kurwanya indwara n’ibyonnyi biterwa n’imvura nyinshi, kwitwararika ahakorerwa imirimo y’ubucukuzi bw’amabuye y’agaciro na kariyeri, kuzirika ibisenge, kubahiriza amabwiriza yo kwirinda gukubitwa n’inkuba.

Abatuye ahashyira ubuzima bwabo mu kaga  nko munsi y’imikingo, ahantu hahanamye, no mu nzu zangiritse bigaragara ko zamaze kwinjirwamo n’ amazi, barasabwa kwimuka hakiri kare.

Meteo Rwanda yavuze ko iri teganyagihe rikomeza gukoreshwa ryunganirwa n’irindi risanzwe mu gihe cy’Ukwezi, iminsi  10, iminsi 7, iminsi itanu, iminsi itatu, iteganyagihe riburira ndetse n’iteganyagihe ritangwa buri munsi.

Meteo Rwanda ivuga ko imvura idasanzwe mu gihe cy’Itumba yaherukaga kubaho mu Rwanda mu myaka ya 2010 na 2016.

  • ZIGAMA THEONESTE
  • Gashyantare 23, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE