Mohammed Salah yatowe nk’umukinnyi w’umwaka muri Premier League

Umunya-Misiri Mohammed Salah ukinira Liverpool yatowe nk’umukinnyi w’umwaka muri Shampiyona y’u Bwongereza mu bihembo bitangwa n’Ishyirahamwe ry’Abakinnyi muri iki gihugu (Professional Footballers’ Association).

Ku mugoroba wo ku wa Kabiri tariki 19 Kanama 2025, ni bwo abakinnyi bahize abandi muri Premier League ya 2024/25 bashyikirijwe ibihembo byabo.

Mohammed Salah wagize umwaka w’imikino udasanzwe, ni we watowe nk’uwahize abandi, aho yatsinze ibitego 29 atanga imipira 18 yavuyemo ibitego, mu mikino 38 yakinnye muri uyu mwaka anafasha Liverpool kwegukana igikombe cya Shampiyona ku nshuro ya 20 mu mateka. 

Salah yahize abarimo Bruno Fernandes wa Manchester United Alexander Isak wa Newcastle United, Alexis Mac Allister wa Liverpool, Cole Palmer wa Chelsea na Declan Rice wa Arsenal.

Nyuma yo kwegukana igihembo, Salah yashimiye bagenzi be bamufashije kwitwara neza. 

Yagize ati: ”Ndumva meze neza cyane, ndakora cyane kandi nishimye kwegukana iki gihembo.”

“[…] Bagenzi banjye baramfashije cyane mu buryo dukina, bampaye imipira myinshi mu byukuri bagenzi banjye baramfashije cyane kugira ngo nshobore kwitwara neza no kugira urwego rwiza.”

Salah yabaye umukinnyi wa mbere mu mateka ya Premier League wegukanye iki gihembo ku nshuro ya gatatu (2017/18, 2021/22 na 2024/25). 

Morgan Rogers ukinira Aston Villa yahembwe nk’umukinnyi mwiza ukiri muto, nyuma yo gutsinda ibitego 8 agatanga imipira 10 yavuyemo ibitego mu mwaka ushize.

Uyu mukinnyi w’imyaka 23 yahigitse Liam Delap wahoze muri Ipswich Town, Dean Huijsen na Milos Kerkezbahoze muri AFC Bournemouth, Lewis-Skelly na Ethan Nwaneri ba Arsenal.

Ikipe y’umwaka yiganjemo abakinnyi ba Liverpool na Arsenal.

Iyi kipe igizwe n’umunyezamu Matz Sels (Nottingham Forest), myugariro ni William Saliba (Arsenal), Virgil van Dijk (Liverpool), Gabriel Magalhães (Arsenal) na Milo Kerkez (AFC Bournemouth).

Abakina hagati ni Ryan Gravenberch (Liverpool), Declan Rice (Arsenal) na Alexis Mac Allister (Liverpool). Ni mu gihe ba rutahizamu igizwe na Mohammed Salah (Liverpool), Alexander Isak (Newcastle United) na Chris Wood ( Nottingham Forest).