MINISPORTS yakiriye amagare n’ibindi bikoresho bya miliyoni 80 Frw

  • SHEMA IVAN
  • Gashyantare 9, 2024
  • Hashize amezi 3
Image

Binyuze mu mushinga Isonga Program Ikigo Mpuzamahanga cy’Abafaransa gishizwe Iterambere AFD gisanzwe gifitanye imikoranire na Minisiteri ya Siporo MINISPORTS cyayigeneye inkunga y’amagare 45 n’ibindi bikoresho bifite agaciro ka miliyoni 80 z’amafanga y’u Rwanda.

Umuhango wo gutanga aya magare n’ibikoresho byo kwifashisha wabaye kuri uyu wa Gatanu tariki 9 Gashyantare 2024, ku biro bya Ministeri ya Siporo i Remera mu Karere ka Gasabo witabirwa na Ambasaderi w’u Bufaransa mu Rwanda Anfré Antoine.

Muri Gicurasi 2021, ni bwo u Rwanda na AFD byasinyanye amasezerano yo gushyigikira ishyirwa mu bikorwa rya politiki nshya ya siporo mu mashuri no gutera inkunga umushinga Isonga Program.

Ni muri urwo rwego hatanzwe amagare nka bimwe mu bikoresho byari bikenewe ku bana bakina uyu mukino mu bigo 30 byahereweho.

Minisitiri wa Siporo, Munyangaju Aurore Mimosa, yashimye uruhare rw’u Bufaransa binyuze muri AFD mu kuzamura siporo y’u Rwanda ihereye mu mashuri.

Minisitiri wa Siporo, Munyangaju Aurore Mimosa, yashimiye u Bufaransa ku ruhare bugira mu iterambere rya siporo mu Rwanda

Ati: “Uyu munsi turishimira intambwe nziza imaze guterwa hagati y’ubufatanye bwacu. Ntabwo ikituraje ishinga kugeza ubu ari ukwakira amarushanwa akomeye, ahubwo ni ukuyitwaramo neza haba mu gihugu no hanze yacyo, ni iby’agaciro kuri twe.”

Yongeyeho ati: “Iki gikorwa rero kizatuma abana bava mu mashuri bifitemo ubushobozi bwo guhatana no kurwanirira igihugu biciye mu mikino. Nubwo bisa n’ibyatinze ariko ibikoresho by’abasiganwa ku magare byabonetse.”

Semajyambere Fabien umutoza w’amagare mu ishuri Inyemeramihingo ryo mu Karere ka Rubavu yavuze ko ibi bikoresho bigiye kubafasha kuzamura impano nyinshi muri uyu mukino.

Yagize ati: “Twishimiye ibikoresho twahawe kuko twahuraga n’imbogamizi dutoza abana, tukabakoresha imyitozo y’imbaraga, ariko noneho tubonye ibikoresho tugiye kujya twitoreza mu mihanda twigisha abana uko bagomba kuyakoresha, ubu bigiye kutworohera ku batoza ku buryo tuzakora abakinnyi bakomeye b’ejo hazaza’’.

Ikigo gishinzwe Iterambere mu Bufaransa gifitanye umubano na Repubulika y’u Rwanda mu guteza imbere siporo

Ibikoresho byatanzwe 45 birimo imyambaro n’inkweto, udupfukantoki n’ingofero, bifite agaciro ka miliyoni 80 z’amafanga y’u Rwanda.

Kugeza ubu ku bufatanya na AFD, Minisiteri ya Siporo ndetse n’iy’Uburezi, hari guhabwa ubumenyi abana 599 bari mu bigo bitandukanye mu mikino ya Volleyball, Basketball, Handball, Football, gusiganwa ku maguru ndetse no ku magare.

  • SHEMA IVAN
  • Gashyantare 9, 2024
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE