MINAGRI yasabye abatubuzi b’imbuto kwirinda kuzitubura gitindi

  • KAMALIZA AGNES
  • Gashyantare 23, 2024
  • Hashize amezi 2
Image

Minisiteri y’Ubuhinzi n’Ubworozi (MINAGRI)  irasaba abatubuzi b’imbuto kwirinda amakosa bagatubura kinyamwuga aho gutubura gitindi, kuko kugeza ubu uyu mwuga hari intambwe umaze gutera ariko hakaba hifuzwa ko byarushaho.

Ni mu gihe MINAGRI ivuga ko kuva u Rwanda rwafata icyemezo cyo guhagarika gutumiza imbuto mu mahanga zigatangira gutuburirwa mu Rwanda zikubye inshuro eshatu ugereranyije n’izatumizwaga.

U Rwanda rukaba rwaratumizaga hanze toni 3000, ariko ubu rutubura toni 9000.

Dr Karangwa Patric, Umuyobozi Mukuru ushinzwe kuvugurura ubuhinzi muri Minisiteri y’Ubuhinzi n’Ubworozi, avuga ko nubwo mu butubuzi bw’imbuto ntabakunze kurangwa n’imituburire idahwitse ariko bijya bibaho ko hari abagira iyo mitekerereze.

Ati: “Bibaho ko hari ufatwa ari mu manyanga udafite ubunyamwuga cyangwa ufite imitekerereze ya gitindi; biroroshye ko yavuga ati reka izi mbuto nzibeshye abantu. Ugaragayeho amanyanga yahagarikwa ariko nubwo bimeze bityo abantu ntibagire ngo abafite amanyanga ni bo benshi kuko umusaruro dufite ni mwinshi ndetse uko imyaka iza ugenda wiyongera.”

Yongeyeho ko kugeza ubu ubutubuzi bw’imbuto bwahariwe Urwego Rwigenzura bityo buri wese aba ijisho rya mugenzi we.

Ati: “Abikorera ntabwo bazategereza ko Leta iza ku muntu urimo gucuruza imbuto agakora amanyanga akohereza izidatunganye na bo ubwabo bashobora kureba umuntu uri kubasebya bakamushyira ku ruhande ntakore amakosa cyane ko ubutubuzi bwahariwe urwego rwigenzura.”

Dr. Karangwa avuga ko ubwizerane no kumenya gukora kinyamwuga bikirimo kubakwa cyan intambwe imaze guterwa itanga icyizere.

Ishyirahamwe ry’Abacuruza n’Abatubura imbuto mu Rwanda (National Seeds Association of Rwanda NSAR) ritanga icyizere ko bari mu ngamba zikarishye zizatuma haboneka imbuto nziza kandi n’umusaruro ukiyongera.

Namuhoranye Innocent, Umuyobozi w’Ishyirahamwe ry’Abacuruza n’abatubura imbuto mu Rwanda (NSAR), ati: “Turi kongera ingamba zatuma umuhinzi abona imbuto nziza tunakora uruhererekane rw’uko abacuruza imbuto bamanuka bakegera abahinzi, bakabereka uburyo bongera umusaruro ari na ko abakora uyu mwuga bahuriza hamwe imbaraga buri wese akaba ijisho rya mugenzi we”.

Umwaka ushize  mu Rwanda habarirwaga abatubuzi b’imbuto basaga 900, aho  abahinzi banini bakoresha imbuto nziza bagera kuri 85.7%, mu gihe abato bagera kuri 35.9%.

Imbuto nziza, y’ubwoko bw’igihingwa bwiza, ishobora gutuma umusaruro wikuba inshuro icumi cyangwa makumyabiri.

Gahunda y’imbaturabukungu mu buhinzi  yerekanye ko umusaruro ushobora kwikuba gatatu cyangwa kane ku mwaka, k’umuhinzi ukorera ku butaka buhujwe, iyo hakoreshejwe inyongera musaruro zikwiriye.

Politiki y’Igihugu y’Ubuhinzi n’ingamba ziyishamikiyeho bitanga umurongo mugari ngenderwaho wo kuvugurura ubuhinzi n’ubworozi bukava mu buhinzi bwa gakondo, bugana mu buhinzi bwongera agaciro bityo umusaruro ukomoka ku buhinzi ukiyongera mu bwinshi no mu bwiza kandi bukagira uruhare rufatika mu iterambere ry’ubukungu bw’igihugu.

  • KAMALIZA AGNES
  • Gashyantare 23, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE