Menya ibyanya byahariwe inganda mu Rwanda n’aho kubyubaka bigeze

  • ZIGAMA THEONESTE
  • Gashyantare 21, 2024
  • Hashize amezi 2
Image

Minisiteri y’Ubucuruzi n’Inganda (MINICOM) yagaragaje ishusho y’uko ibyanya byahariwe inganda birimo kubakwa ndetse ishimangira ko yifuza ko mu myaka itanu  iri imbere byose bizaba bimaze kuzura.

Prof. Ngabitsinze Jean Chrysostome  wa MINICOM yabitangaje kuri uyu wa Kabiri tariki ya 20 Gashyantare 2024, ubwo yatangaga ibisobanuro mu magambo ku bibazo byagaragaye mu gihe Abadepite basuraga ibikorwa by’inganda nto n’iziciriritse no ku bibazo byagaragaye muri raporo y’Ubugenzuzi Bukuru bw’imari ya Leta, kuri gahunda yo guteza imbere ibyanya byahariwe inganda.

Prof. Ngabitsinze mu kugaragaza iyo shusho y’uko ibyanya byubatse, yavuze ko icyanya gisurwa cyane iri icya Kigali (Special Economic Zone).

Ati: “Ubu icyanya gisurwa n’abantu benshi kuko harimo ibikorwa remezo bitandukanye harimo inganda zitandukanye.”

Icyanya cyahariwe inganda cya Kigali ni cyo cyanya cyonyine cyuzuye neza aho kirimo inganda zigera ku 155, n’ishoramari rya miliyari 2 z’amadolari y’Amerika n’ukuvuga asaga tiriya 2 z’amafaranga y’u Rwanda.

MINICOM yatangaje ko mu Rwanda hari ibyanya 7 by’inganda,  ari byo icyanya cy’inganda cya Rwamagana, icya Rubavu, icya Nyagatare, icya Huye n’icya Muhanga). Ibyanya byihariye   byihariye ni  2  ari byo Icyanya cy’Inganda cya  Kigali n’icya Bugesera).

Muri rusange ibyo ni ibyanya byashyizweho na Guverinoma y’u Rwanda mu rwego rwo kwihutisha iterambere, aho byatangiye kubakwa mu mwaka wa 2016 ariko mu mwaka wa 2017 hajyamo andi mavugurura muri gahunda ya Guverinoma yo kwihutisha iterambere (NST1), no kugira ngo  bizabashe gutanga umusaruro kurushaho.

N’ubwo icyanya cyahariwe ingnda cya Kigali (Kigali Special Economic Zone) ari cyo kimaze kuzura, Minisitiri w’Ubucuruzi n’Inganda Prof. Ngabitsinze Jean Chyrysostome yagaragarije Inteko Ishinga Amategeko, Umutwe w’Abadepite, ishusho y’uko imyubakire y’ibindi bisigaye aho igeze.

Icyanya cy’inganda cya Bugesera

Icyanya cy’Inganda cya Bugesera ni icyanya gifite hegitari zisaga 330. Muri icyo cyanya hari inganda 11 zifite ishoramari ry’asaga miliyoni 95 z’amadolari, ni ukuvuga asaga miliyari 120 z’amafaranga y’u Rwanda.

Mu kwimura abaturage ku nyungu rusange bahabwa ingurane ikwiye, MINICOM ivuga ko hasigaye kwishyura hegitari zigera kuri 48 kubera ko zari zahawe abaturage ngo babe bazibyaza umusaruro.

Ni icyanya kandi MINICOM ihamyaka ko ibikorwa remezo by’ibanze byamaze kugeramo ndetse n’igishushanyo cy’ibanze cyamaze gukorwa. Kuri ubu harimo kubakwamo inganda nshya ebyiri.

Icyanya cy’inganda cya Rwamagana

Ni icyanya gifite ubuso bwa hegitari 80, harimo ishoramari rya miliyari 59,5 z’amadolari y’Amerika, ni ukuvuga miliyari zisaga 75z’amafaranga y’u Rwanda.

Kirimo inganda 11 zamaze kuzura n’izindi 15 zirimo kubakwa.

Kwimura abaturage byarakozwe hasigaye kubaka ibikorwa remezo birimo imihanda n’ibindi, bikaba biteganyijwe kubakwa mu gihe cya vuba.

Ni icyanya gicungwa na Guverinoma y’u Rwanda binyuze muri Minisiteri y’Ubucuruzi n’Inganda (MINICOM).

Icyanya cy’inganda cya Huye

Icyanya cy’Inganda cya Huye gifite  hegitari 50 n’ishoramari rya miliyoni 7 z’amadoalari y’Amerika, ni ukuvuga amafaranga y’u Rwanda asaga miliyari 8.

Harimo inganda eshatu zikora n’izindi eshatu zirimo kubakwa, abaturage barimuwe n’inyigo zarakozwe kugira ngo kirusheho kwagurwa no gutezwa imbere.

Icyanya cy’inganda cya Musanze

Icyanya cy’inganda cya Musanze gifite hegitari 167, hamaze kujyamo uruganda rumwe  rukora sima rwa Prime Ciment, hakaba hari n’abandi bashoramari basabye kuhubaka inganda.

Ahubatse urwo ruganda, Minisiteri y’Ubucuruzi n’inganda ivuga ko abaturage bamaze kwimurwa kandi n’inyigo yo kubaka izindi ngamba yarakozwe hakaba hakiri imbogamizi z’ibikorwa remezo bitarubakwa.

Icyanya cy’inganda cya Muhanga

Icyanya cy’inganda cya Muhanga cyubatse ku buso bwa hegitari 63, harimo inganda zigera kuri enye n’urwa gatanu rugiye kubakwa.

Ni icyanya gifite ishoramari rya   miliyoni zirenga 100 z’amadolari y’Amerika ni ukuvuga miliyari zirenze 120 z’amafaranga y’u Rwanda  y’inganda enye gusa  zimaze kuzura neza.

Hari imbogamizi zo kwimura abaturage kuko hari amafaranga arenga miliyari ebyiri y’amafaranga y’u Rwanda, zatanzwe ku bimuwe ariko hari n’andi mafaranga yo kwimura abasigaye ataraboneka yose.

Minisitiri Prof. Ngabitsinze yabwiye Abadipite ko harimo gukorwa ibishoboka byose ngo haboneka ingurane y’aba baturage ndetse aho bimuwe hashyirwe ibikorwa remezo kuko bikenewe mu gihe inyigo yaho yamaze gukorwa.

Icyanya cy’inganda cya Rubavu

Icyanya cy’inganda cya Rubavu cyemejwe n’Inama Njyanama y’Akarere ka Rubuvu kikaba ari gishyashya kuko cyemejwe tariki ya 30 Kamena 2023.

Ni icyanya gifite ubuso bwa hegitari 50, gusa nta nganda zirajyamo  kuko MINICON ivuga ko nyuma yo kwemezwa n’Akarere kandikiye Minisiteri y’Ibidukikije na yo imenyesha MINICOM ubu haracyakorwa inyigo y’uburyo inganda zajyamo.

Icyanya cy’inganda cya Nyagatare

Icyanya cy’inganda cya Nyagatare ni icyanya gishya, MINICOM ivuga ko hari gahunda yo kwagura icyo cyanya gisanzwe gifite hegitari 50, aho habayeho ibiganiro hagati ya MINICOM n’Akarere kugira ngo ubuso bwongerwe dore ko kucyagura byemezwa n’Inama Njyanama y’Akarere hakabona gukorwa inyigo yacyo.

Hari icyanya cy’inganda cya Nyabihu, Minisiteri ivuga imyubakire cyayo yasubitswe kugira ngo barangize kubaka icyanya cya Musanze, icyakora Minisitiri Prof. Ngabitsinze agahamya ko mu kucyubaka (icya Nyabihu)  bazakigenera ibijyanye no gutunganya umusaruro w’ubuhinzi n’ubworozi.

Mu gutangaza ibyanya byari mu gahunda yo kugira buri Karere kagira ubukungu ariko kandi icyanya gisurwa cyane n’icya Kigali. MINICOM ihamya ko mu myaka itanu iri imbere ibyo byanya byose bizaba byamaze kuzura neza bifite ibikenewe byose.

  • ZIGAMA THEONESTE
  • Gashyantare 21, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE