Leta yiyemeje kurwanya igwingira ry’abana ihereye mu rubyiruko

  • ZIGAMA THEONESTE
  • Mutarama 18, 2024
  • Hashize amezi 4
Image

Minisiteri y’Ubuzima (MINISANTE) yatangije uburyo bushya bwo kurwanya igwingira hakire kare binyuze mu gushishikariza urubyiruko kwihatira kurya indyo yuzuye hakiri kare, kugira ngo bazabyare abana bashyitse mu gihe bashinze ingo ndetse no kuzavamo abantu bafite ubuzima bwiza bazagirira igihugu akamaro.

Muri iyo gahunda nshya abana  bitabwaho ni abafite imyaka 6 kugeza kuri 11, mu gihe ingimbi n’abangavu ari abafite kuva ku myaka 12 kugeza kuri 19.

Minisitiri w’Ubuzima, Dr Nsanzimana Sabin asobanura ko mu gutegura iyi gahunda kwari ukugira ngo barwanye igwingira hakira kare.

Ati: “Kurwanya igwingira akenshi ntabwo ubikora umwana yavutse. Ubikora umugore atwite ariko ibyiza cyane ni ukubikora utegura ababyeyi b’ejo. Ni yo mpamvu abana b’abangavu buriya n’ingimbi na bo birabareba.

Twashyizeho gahunda ivuguruye y’ibyo bagomba kwitaho kuri bo, uburyo bagomba gukurikiranwa, yaba ababyeyi cyangwa kwa muganga, izabafasha na mbere y’uko batwita, na mbere y’uko bashinga urugo na mbere y’uko babyara.”

Yongeyeho ko na wa mugore wahawe inyongeramirire ikomatanyije, iyo bihurije hamwe ni byo bitanga musaruro wo kurwanya igwingira.

Dr Nsanzimana abigereranya nko kubiba imbuto mu murima witeguye gusarura, akavuga ko usanga hari abantu babyara abana badashyitse kubera ko batitaweho hakiri kare.

Minisitiri kandi yavuze ko urubyiruko rukwiye kwitabwaho mu muryango kugira ngo bazavemo ababyeyi beza b’ahazaza.

Ati: “Umuryango ukuntu uteye, urubyiruko ntabwo ukwiye kurufata hanze y’umuryango ni na yo mpamvu tuvuga ko umwana akwiye kuvuka atagwingiye, azabe urubyiruko azabe umubyeyi ejo, ejubundi azagirire igihugu akamaro.”

Yakomeje agira ati: “Urubyiruko rero icyo twabibutsa,  icya mbere ni ukwiyitaho ubwabo mu myitwarire, hari ukwiyitaho ku mubiri, ubwo harimo n’imirire buriya hari ibyo urubyiruko rufata muri iki gihe byangiza ubuzima bwabo kandi ari ibyo banyoye cyangwa bariye. Njyewe ku giti cyanjye nabashishikariza kwirinda ibisindisha n’ibiyobyabwenge.”

Mu mirongo migari y’iyo gahunda ivuguruye yo kwita ku mirire y’abana abangavu n’ingimbi (Kuva ku myaka 6 kugera kuri 19) igamije gushyira mu bikorwa ingamba zigamije kwita ku mibereho n’imirire y’abana, abangavu n’ingimbi mu Rwanda.

Ni gahunda yashyizweho hashingiwe ku mabwiriza y’Ishami ry’Umuryango w’Abibumbye ryita ku Buzima OMS no kureba imiterere y’u Rwanda n’icyo rwifuza kugeraho.

MINISANTE isobanura ko kwita kuri abo bana, abangavu n’ingimbi ari ukubera ko ikigero cy’imyaka baba bagezemo ari cyo gikinera cyane indyo yuzuye ikeneye ibyubaka umubiri ibirinda indwara n’ibitera imbaraga.

Minisiteri kandi ihamya ko urubyiruko n’abana bari muri icyo kigero umubiri wabo uba ukeneye intungamibiri cyane kurusha iz’umuntu ukuze.

Ni umwanya mwiza kandi abashinzwe gutanga indyo yuzuye bashobora gukosora ibibazo byabaye byashobora guteza igwingira mu myaka yabanje.

Ni gahunda usibye gufasha abangavu kuzavamo abagore bazabyara abana bashyitse bafite ubuzima bwiza kandi izanafasha abana kugira ubuzima bwiza no gutsinda mu ishuri bazavemo abantu bagirara igihugu akamaro mu gihe kizaza.

Minisitiri w’Ubuzima Dr Nsanzimana Sabin yakanguriye urubyiruko kurya indyo yuzuye
  • ZIGAMA THEONESTE
  • Mutarama 18, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE