Leta igiye kubakira ishuri ryihariye abana bafite ubumuga i Musanze

  • NGABOYABAHIZI PROTAIS
  • Gashyantare 7, 2024
  • Hashize amezi 4
Image

Bitarenze mu mwaka wa 2025, mu Karere ka Musanze hazaba huzuye ishuri ryigisha abana bafite ubumuga bwihariye badatasha kwiga mu yandi mashuri asanzwe.

Abo bana barimo abafite ubumuga bwo mu mutwe buterwa no kudindira k’ubwonko bwabo nk’ikibazo bavukanye cyangwa bagize nyuma yo kuvuka.

Ni mu mu gihe ababyeyi b’abo bana bavuga ko bagorwa n’uburezi bwabo kuko bishyurira amafaranga yo kubitaho mu bigenga.

Ubuyobozi bw’Akarere ka Musanze bwahishuye ko ku bufatanye bwa Minisiteri y’Uburezi n’abafatanyabikorwa batandukanye, iryo shuri rizaba ruzuye bitarenze mu mwaka wa 2025.

Umuyobozi w’Akarere ka Musanze Nsengimana Claudien, yahamirije Imvaho Nshya ko abo bana badashobora kwigana n’abandi kubera ubumuga bafite na bo bakeneye guhabwa uburezi bwihariye bujyanye n’ubushobozi bwabo ari nay o mpamvu harimo gushakishwa uko iryo shuri ryakubakwa.

Yagize ati: “Ni byo koko ikibazo cy’abana bafite ubumuga bwihariye buri wese abona ko bikwiye ko bahabwa uburezi, by’umwihariko bakaba bafite amashuri yabo  n’abarezi babyize. Ubu rero icyo turimo gukora ni uko dufashijwe na MINEDUC ndetse n’abaterankunga duteganya kubaka ishuri muri Musanze ryita kuri bariya bana, bitarenze umwaka wa 2025 bazaba bafite ikigo cy’amashuri cyabo n’abarezi babitaho.”

Ababyeyi b’abana bafite ubumuga bakeneye kwitabwaho by’umwihariko bavuga ko bitaborohera kubitaho mu gihe nta n’ubumenyi baba babifitiye, n’aho baboneye ishuri ryigenga ugasanga kubabonera ibyo bakenera bitaborohera.

Ayo makuru yatangajwe mu gihe na bo bifuza ko Leta yabubakira ishuri ryita ku bana babo by’umwihariko, cyane ko bamwe bahitamo kurekera abana bafite ubumuga mu ngo zabo, ibintu bivirano bamwe guhura n’ingorane zirimo n’ibyago byo kubura ubuzima kubera kutitabwaho uko bikwiriye.

Nyirasafari Peruth  wo mu Murenge wa Musanze, Akarere ka Musanze, yagize ati: “Ikibazo cyo kutagira amashuri yita ku bana bafite ubumuga ni ikibazo gikomeye cyane, kuko kwita ku mwana ufite ubumuga bisaba amafaranga nkanjye utishoboye ntashobora kwigondera. Amahirwe nagize ni uko hano hafi hari ikigo bita INEZA-Kabaya Organization Musanze, ni ho dusiga abana bacu ariko na bwo usanga avuga ko agorwa no kubitaho kuko nta mafaranga tumuha.”

Makuta Katshuki Antoinette, Umuyobozi akaba ari na we washinze INEZA -kABAYA Organization

Uwingabire Alice wo mu Murenge wa Shingiro we avuga ko ngo kubera kutagira ibigo yarereramo umana we w’umuhungu ufite imyaka 5 yahisemo kumurekera mu rugo.

Yagize ati: “Ibigo by’abihayimana ni byo usanga bifite mu nshingano kwita kuri aba bana bafite ubumuga, kandi ibyo bagusaba ntiwabivamo kandi birumvikana kuko aba bana kubitaho bisaba umuhate, umwanya, ibikoresho n’ibiribwa. Njye nabonye bingoye mpitamo kumurekera mu rugo Imana izakora ibyayo, ariko byana byiza baduhaye amashuri yita kuri aba bana by’umwihariko.”

Bamwe mu bagerageje gushinga ibigo by’amashuri yita kuri abo bana kubera ubwitange, bavuga ko na bo batorohewe n’uko babikora bakemeza ko hakiri inzira ndende.

Makuta Katshuki Antoinette washinze Umuryango Ineza Kabaya Organization, yagize ati: “Haracyari ikibazo gikomeye kuko ntabwo turabona uburyo aba bana bitabwaho na Leta by’umwihariko nta mashuri bihariye ahari. Nta barimu bahuguwe by’umwihariko ngo bazite kuri aba bana, ahubwo icyo nabonye ni uko iyo bigana n’abandi badafite ubumuga n’abo rimwe na rimwe babannyega, umwarimu na we rero kwita kuri uwo mwana umwe ufite ubumuga mu ishuri ntabwo byashoboka.”

Kuba iki kibazo kikiri agateranzamba mu bijyanye no kwita kuri aba bana kandi bakeneye ubufasha bishimangirwa na Nduwayesu Elie Umuyobozi wa Deaf People Training Center Nyange.

Yagize ati: “Byaba byiza duhawe ubufasha yenda bakaduha nk’ibikoresho harimo intebe kuko natwe turimo gufasha abana b’igihugu cyane ko twe n’ibyo dukora tuba twitanga. Rwose n’iyo baduhembera abarimu cyane ko  mbona na bo bahejwe.

Nk’umwana utumva iyo abana n’abantu batazi amarenga atazi no kwandika urumva yabaho ate muri iyi si koko? Ubuyobozi nibudufashe bushyiremo ingufu aba bana na bo bige nk’abandi Banyarwanda.”

Mu Karere ka Musanze kugeza ubu habarurwa ibigo bigera kuri bine by’abagiraneza byita kuribariya bana bafite ubumuga bunyuranye.

Umubyeyi ufite umwana ufite ubumuga, wemeza ko bigorana kwita kuri abo bana
  • NGABOYABAHIZI PROTAIS
  • Gashyantare 7, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE