Kurya neza na Siporo birinda indwara zirimo kanseri- Dr. Nsanzimana

  • NTAWITONDA JEAN CLAUDE
  • Gashyantare 4, 2024
  • Hashize ibyumweru 3
Image

“Duhinduka ibyo turya”, ni imvugo yamamaye ku Isi yose ikangurira abantu iteka guhitamo ibyo barya bibaha ubuzima bwiza n’ibyishimo, by’umwihariko bakabijyanisha no gukoresha umubiri ukanyeganyenga binyuze muri siporo ihoraho.

Ariko uko imyaka ihita, abantu bagenda bahinduka mu mahitamo, aho ibyiza babibona nk’ibitagezweho, ibibangiriza bakabibona nk’iby’igiciro akenshi bakanabirya bibahenze.

Minisitiri w’Ubuzima Dr. Sabin Nsanzimana, yongeye kwibutsa abaturarwanda guhitamo neza ibyo barya n’ibyo banywa, kandi bagakora siporo nibura isaha imwe ku munsi.

Yabigarutseho kuri iki Cyumweru tariki ya 4 Gashyantare 2024, ubwo Abanyakigali bifatanyaga n’abayobozi mu nzego zitandukanye muri Siporo Rusange (Car Free Day) iba kabiri mu kwezi.

Ni Siporo Rusange yahuriranye n’Umunsi Mpuzamahanga wahariwe gukumira indwara za Kanseri, wizihijwe ku nsanganyamatsiko igira iti: “Isuzumishe kanseri uvurwe [Kanseri] hakiri kare.”

Minisitiri w’Ubuzima Dr. Sabin Nsanzimana, yitabiriye iyo siporo ari kumwe na Minisitiri wa Siporo Aurore Mimosa Munyangaju, Umuyobozi w’Umujyi wa Kigali Dusengiyumva Samuel, n’abandi bayobozi batandukanye.

Nyuma ya Siporo yahuriranye n’igitondo cyuje amafu, Minisitiri Dr. Nsanzimana yashimangiye ko siporo ifasha umubiri mu kwirinda no kurwanya indwara zitandukanye zitandura (NCDs) ndetse no kugira imibereho myiza kandi itekanye.

Yibukije abiganjemo urubyiruko gahunda yo kwirinda kunywa inzoga n’ibindi biyobyabwenge nk’itabi, kuko biri mu byongera ibyago byo kurwara izo ndwara zirimo na kanseri zifatwa nk’umwanzi ukomeye w’abantu muri iki kinyejyana cya 21.

Yagize ati: “Ntimuze kunywa inzoga n’uzisomaho akoze ku munwa ahite atereka arekere aho, ntimuze kunywa itabi, ‘TunyweLess’. Hanyuma Siporo mujye mukora nibura isaha imwe ku munsi, hanyuma isukari n’umunyu mubigabanye cyane kuko isukari nyinshi buriya iganisha kuri diyabeti, umunyu mwinshi uganisha ku ndwara z’umutima, ibinure na byo bifunga imiyoboro itwara amaraso.”

By’umwihariko kuri kanseri, Dr. Nsanzimana yakomeje agaragaza ko u Rwanda rwihaye intego yo kuba igihugu cya mbere kizarandura iyo ndwara mu bihugu bikiri mu nzira y’amajyambere. 

Ati: “Twiyemeje ko mu minsi iri imbere turaza gushyiraho uburyo bwo kuyirandura, u Rwanda tukaba twaba igihugu cya mbere kibigezeho. Iyo gahunda irahari kandi abafatanyabikorwa benshi bari hano, abaganga, abayobozi bose muri hano, mureke tubigire intego.”

Minisitiri Dr. Nsanzimana yibukije ko gukora siporo mu buryo buhoraho no kurya indyo yuzuye bigira uruhare rukomeye mu gukumira indwara nyinshi zitandura zirimo na kanseri zinyuranye.

Ati: “Buriya rero kuri siporo igira uruhare kuri kanseri hafi ya zose. Buriya iyo ukora siporo ugakora n’ibyo navuze haruguru, kanseri zose zibaho ushobora kuzigabanya kuri 40%, ibisigaye bikaba ari ibindi biva mu turemangingo twacu n’ibindi tutaramenya.”

Impuguke zitandukanye mu by’ubuzima zemeza ko kanseri zishobora guterwa n’impamvu zinyuranye nk’uko bigenda no ku zindi ndwara, ariko akenshi ngo ziba ari umusaruro wo kutita ku buzima ubushora mu bintu bibwangiza.

Muri ibyo harimo kunywa inzoga, kugira umubyibuho ukabije, kutita ku kuboneza imirire, kudakora imyitozo ngororamubiri ihoraho, kunywa itabi, guhura n’imirasire y’ikirenga, gukorera ahantu hadatekanye, no kwandura indwara zitandukanye bikarangira zihindutse kanseri.

Ariko nanone hari impamvu zimwe na zimwe zitera kanseri ariko umuntu atagiramo uruhare zamenyekanye, zirimo ubusaza, kugira ibinyabutabire mu mubiri bihindura uko utunyangingo (cells) dukora.

Hari n’abavukana uturemangingo ndangasano (genetics) tubakururira ibyago byo kurwara kanseri, ariko n’abafite abasirikare bake cyangwa bacitse intege baba bafite ibyago byinshi byo kurwara zimwe muri kanseri.

Impuguke mu by’ubuzima zivuga ko hejuru ya kimwe cya gatatu cya kanseri zifata abantu zishobora kwirindwa binyuze mu guhindura imyitwarire n’imirire.

Umunsi Mpuzamahanga wahariwe gukumira indwara za Kanseri wizihizwa ku ya 4 Gashyantare buri mwaka, mu rwego rwo kurushaho kongera ubukangurambaga bugamije kongera ubumenyi bw’ibanze kuri iki kibazo cyugarije Isi.

Ishami ry’Umuryango w’Abibumbye ryita ku Buzima (OMS), rivuga ko ibibazo bya kanseri muri Afurika biteye inkeke, kuko mu mwaka ushize habonetse abarwayi ba kanseri barenga miliyoni 1.1, aho abasaga 700 000 bahitanywe na yo.

Bivugwa ko hejuru ya 50% bya kanseri zibasira abantu bakuze muri Afurika ari iy’ibere, iy’inkondo y’umura, iya Prostate, kanseri y’amara n’umura, ndetse ka kanseri y’umwijima.  

  • NTAWITONDA JEAN CLAUDE
  • Gashyantare 4, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE