Kugeza amashanyarazi ku baturage 100% muri 2024 ntibigishobotse-MININFRA

  • ZIGAMA THEONESTE
  • Werurwe 5, 2024
  • Hashize ukwezi 1
Image

Minisiteri y’Ibikorwa Remezo (MININFRA) yatangaje ko intego Guverinoma y’u Rwanda yari yihaye yo kugeza umuriro w’amashanyari ku baturage 100% itagishobotse, ikaba yaradindijwe n’ingaruka z’icyorezo cya  COVID-19 n’ingengo y’imari idahagije yasabwaga.

Byagarutsweho kuri uyu wa Kabiri tariki ya 5 Werurwe 2024, na Minisitiri w’Ibikorwa Remezo Dr Gasore Jimmy, ubwo yataganga ibisobanuro mu magambo ku Nteko Rusange y’Umutwe w’Abadepite, byagarutse ku bibazo byagaragaye muri Raporo y’Umugenzuzi Mukuru w’Imari ya Leta ku itunganywa n’ikwirakwizwa ry’amashanyarazi.

Gahunda ya Guverinoma y’imyaka irindwi yo Kwihutisha iterambere (NST1) ya kuva mu mwaka wa 2017 kugeza 2024, iteganya ko amashanyarazi yagombaga kugera ku baturage 100% muri uyu mwaka wa 2024.

Abadepite bagaragarije Minisiteri y’Ibikorwa Remezo ko isesengura ryagaragaje ko hari ibikoresho bidahagije mu Kigo cy’Igihugu cy’Ingufu (REG) n’amashami yacyo bidindiza ikwirakwira ry’ayo mashanyarazi.

Intumwa za Rubanda zabajije imbogamizi zihari zituma ibikoresho byifashishwa mu gukwirakwiza umuriro w’amashanyarazi bitabonekera igihe niba abaturage bazahabwa umuriro w’amashanyarazi 100% muri 2024.

Minisitiri Dr. Gasore yavuze ko kugeza ku baturage umuriro w’amashanyarazi,  bidashoboka ku kigero cya 100% muri 2024.

Mu mbogamizi zatumye iyo ntego itagerwaho, Dr. Gasore yavuze ko harimo kubura ibikoresho bihagije byo kuwukwirakwiza  ndetse n’icyorezo cya COVID-19 cyakomye mu nkokora gahunda z’Isi muri rusange.

 Ati : “Muri rusange rero twagize ikibazo cy’ibikoresho cyane cyane mu myaka ibiri ishije bigaragara ko zimwe mu mpamvu harimo ihindagurika ry’ibiciro ku isoko mpuzamahanga biturutse ku cyorezo cya COVID 19 ndetse n’intambara ya Ukraine.”

Yakomeje agira ati: “Ibi byatumye bamwe muri ba rwiyemezamirimo twari twatumye kutwohereza ibikoresho bananirwa cyangwa se bagatinda kubizana ku gihe”.

Minisitiri Dr. Gasore yavuze ko muri izo mbogamizi harimo n’ikibazo cy’ingengo y’imari ikunze kuba idahagije ugereranyije n’ibiba bikenewe mu gukwirakwiza umuriro mu baturage bose.

MININFRA itangaza ko hafashwe ingamba zo guhangana n’ibyo bibazo bidindiza ikwirakwizwa ry’amashanyarazi ku baturage.

Minisitiri Gasore ati : “Twamaze gusinyana amasezerano na ba rwiyemezamirimo kuri buri bwoko bw’ibikoresho bikenerwa, mu kwirinda imbogamizi z’uko umwe yananirwa kandi nta yandi mahitamo dufite”.

Minisitiri Gasore yavuze ko ba rwiyemezamirimo bamaze kuzana ibikoresho bitandukanye bikenewe. 

Hagati aho ariko Guverinoma y’u Rwanda yanashatse miliyoni 700 z’amadolari y’Amerika mu bafatanyabikorwa barimo Banki y’Isi, Banki Nyafurika Itsura Amajyambere n’abandi, muri gahunda yo gukwirakwiza amashanyarazi no kuvugurura imiyoboro mu gihugu hose.

Ni imishinga Minisitiri Gasore avuga ko iyo gahunda izakomeza ikageza muri 2026 yamaze gukwirakwiza amashanyarazi mu gihugu hose.

Ni mu gihe kandi abafatanyabikorwa ba Leta y’u Rwanda barimo Banki y’Isi, MININFRA itangaza ko batanze miliyoni 400 z’amadolari y’Amerika, 70% yayo akazakoreshwa mu bikorwa byo gukwirakwiza amashanyarazi mu gihugu.

Kugeza ubu mu Rwanda amashanyarazi amaze kugera ku baturage bari ku gipimo cya 75.9% nk’uko imibare yo muri  Mutarama 2024 ibigaragaza.

Ni imibare kandi igaragaza ko ingo zifatira ku muyoboro mugari ziri ku gipimo cya  54%, izifatira ku muriro ukomoka ku mirasire y’izuba  ari  21,9%.

  • ZIGAMA THEONESTE
  • Werurwe 5, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE