Kigali: Ashengurwa n’abanena ‘massage’ akora ngo afite ubumuga bwo kutabona

  • KAYITARE JEAN PAUL
  • Gashyantare 6, 2024
  • Hashize ibyumweru 4
Image

Namahoro Olive ni umukobwa wize akaba anazobereye ibyo gukora ‘massage’, ariko akaba ashengurwa cyane n’uko aho akorera akazi ke ka buri munsi hari bamwe bahagera bakamunena bakimukubita amaso ngo ni uko afite ubumuga bwo kutabona.

Avuga ko kunenwa na bamwe mu bakiliya ari imwe mu ngorane ahura na zo kandi zimugiraho ingaruka ku iterambere ndetse no ku buzima bwo mu mutwe’

Kubaho umuntu adafite ubumenyi bushobora kumutunga birababaza ariko nta gishengura kurusha nko kuba ufite ubumenyi ariko ukabuzwa umugati n’uko abantu batita ku bumenyi buhagije ufite bakakunena bagendeye ku bumuga, ubusembwa cyangwa indi nenge babona ku mubiri wawe.

Namahoro ni impuguke mu gukora massage nyuma y’amasomo yize imyaka itatu yose, ubu akaba akorera akazi mu Mujyi wa Kigali, kandi abamugana bagatinyuka ko abakorera bamushimira ubwitonzi n’ubuhanga ashyira muri ako kazi.

Kubaho umuntu adafite ubumenyi bushobora kumutunga birababaza ariko nta gishengura kurusha nko kuba ufite ubumenyi ariko ukabuzwa umugati n’uko abantu batita ku bumenyi buhagije ufite bakakunena bagendeye ku bumuga, ubusembwa cyangwa indi nenge babona ku mubiri wawe.

Imvaho imusura aho akorera ku Kacyiru mu Karere ka Gasabo, Namahoro yashimangiye ko akunda umwuga yize ariko acibwa intege n’abantu bagana aho atangira serivisi bakanga ko abakorera gusa bakibona ko afite ubumuga bwo kutabona.

Avuga ko amaze imyaka 3 akora akazi ka massage muri Seeing Hands Rwanda, ariko adahwema guhura n’izo ngorane nubwo uyu mwuga ari wo umutunze, ukamufasha kwishyura inzu abamo, akiyambika ndetse agafasha n’umuryango we.

Yagize ati: “Abadafite ubumuga hari igihe baza, basanga bagiye gukorerwa natwe tudafite ubumuga bwo kutabona bagahita bisubirirayo, izo ni zo mbogamizi dukunze guhura na zo”.

Ahamya ko ku giti cye byamubayeho bigatuma abura amafaranga yakamufashije, ati: “Byambayeho, hari umugabo waje aje gukoresha massage noneho ngiye kumwakira abona simbona ahita asubirayo. Byarambabaje kuko nabuze amafaranga kandi ari yo amfasha, nahise mbona ko hari abantu badufata nk’abadashoboye”.

Si Namahoro gusa kuko hari na bagenzi be bakora umwuga umwe  mu Muryango Seeing Hands Rwanda, bemeza ko bagihezwa n’abantu badafite ubumuga.

Mbabazi Josée na we yagize ati: “Harimo ababyumva wamubwira uti njyewe simbona ariko nkora massage akemera ko umukorera”.

Avuga ko hari abandi bagifite imyumvire iri hasi aho bumva ko umuntu utabona atabakorera massage, aho kugaya ko wenda batabonye serivisi bishimiye.

Ati “Byagiye bitubaho turabizi cyane, ariko bitavuze ko harimo n’abandi bajya baza twababwira ko tutabona bakabyakira; abo na bo barahari. Njyewe bimbaho, byarambabaje cyane kuko buriya hari ukuntu ikintu kikubaho ufite nk’ubu bumuga bwo kutabona, iyo umuntu akwibukije ubumuga bwawe ni ikintu kikubabaza mu buzima”.

Habarugira Fredrick na we ufite ubumuga bwo kutabona, avuga ko bidakwiye ko umuntu atangira kugira impungenge za serivisi ari buhabwe n’umuntu ufite ubumuga bwo kutabona ari uko amurebye gusa, cyane ko baba bafite ubuhanga akenshi usanga barusha n’ababona.

Muhawenimana Emelyne Umwe mu bayobozi ba Seeing Hands Rwanda

Ati: “Uwo muntu watangiye kugira impungenge abonye umuntu ugiye kumwakira ari ukuganira gusa, noneho nibamubwira ngo abakozi dufite hano bafite ubumuga bwo kutabona noneho aragira impungenge zirushijeho.

Kwa kugira impungenge ko umuntu utabona nta kintu ashoboy,e bamwe bibatera guhita bitahira badakoresheje massage kubera ko babonye ko bagiye gukorerwa n’umuntu utabona.

Ntamukoreye ngo arebe ko abyishe ahubwo we aramurebye ntiyumva ko icyaje gukoresha bakimukorera neza ahubwo ahita amusomamo ko ntacyo ashoboye”.

Muhawenimana Emelyne, umwe mu bayobozi b’Umuryango Seeing Hands Rwanda’ ufasha abantu bafite ubumuga bwo kutabona kumenya umwuga wa massage no kumenya ibijyanye n’ikoranabuhanga, yahamirije Imvaho Nshya ko umuntu ufite ubumuga bwo kutabona, na we akora massage neza.

Ku rundi ruhande, yahishuye ko hari abantu bafite ubumuga bagikorerwa ihezwa, ibyo ngo babibonera mu bakiriya bakira.

Umuryango Seeing Hands Rwanda (bisobanura Ibiganza bireba) usaba inzego za Leta n’imiryango yita ku bafite ubumuga kongera imbaraga mu bukangurambaga bugamije kwereka Abanyarwanda ko n’abafite ubumuga bashoboye.

Sr Mukamazera Francine, Umubikira mu Muryango w’Ababikira b’Inshuti z’Abakene uhagarariye ishyirwa mu bikorwa rya za gahunda y’iterambere ridaheza rishingiye ku muryango (CBR), na we aherutse kubwira Imvaho Nshya ko abantu bafite ubumuga bahezwa.

Yagize ati: “Abafite ubumuga barahezwa nubwo atari bose, birimo kugenda bitera intambwe ariko hari aho bigaragara ko bahezwa”.

Ihuriro nyarwanda ry’imiryango y’abantu bafite ubumuga mu Rwanda (NUDOR), na ryo riherutse guhuza ijwi n’Abasenateri bagaragaza ko ihezwa ritangirira mu muryango.

Muri Gicurasi 2023, bagaragaje ko n’ubashije kwigobotora ihezwa akagera ku ishuri usanga amashuri na yo amwanga, bityo agatinya kumwitaho dore ko abenshi mu bana bafite ubumuga baba baturuka mu miryango ikennye.

Guverinoma y’u Rwanda ikomeje gushyira Politiki itagira n’umwe iheza mu rugendo rwo guharanira iterambere rirambye, by’umwihariko impuguke mu buzima zikaba zishimangira ko kugira ubumuga bitavuze kubura ubushobozi bwose.

Bamwe mu bafite ubumuga bwo kutabona bize kandi bakaba barazobereye ibyo gukora massage
  • KAYITARE JEAN PAUL
  • Gashyantare 6, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE