Kanseri ni indwara idafite igisubizo kirambye ariko yakwirindwa- Dr Nsanzimana

  • NYIRANEZA JUDITH
  • Gashyantare 4, 2024
  • Hashize amezi 4
Image

U Rwanda rwifatanyije n’Isi kwizihiza umunsi Mpuzamahanga wo kurwanya kanseri kuko ari ikibazo cyugarije Isi, kuko nta gisubizo kirambye ifite, gusa ikaba ishobora kwirindwa.

Ni umunsi wizihijwe kuri iki Cyumweru tariki ya 4 Gashyantare, ahazirikanwa ububi bw’indwara ya kanseri wahuriranye n’umunsi wa siporo rusange, aho mu mujyi wa Kigali yitabiriwe na Minisitiri w’Ubuzima Dr Nsanzimana Sabin, Minisitiri wa Siporo Munyangaju Aurore Mimosa, Meya w’Umujyi wa Kigali Dusengiyumva Samuel n’abandi bantu batandukanye.

Insanganyamatsiko y’uyu munsi igira iti ‘Tuzibe   icyuho mu kwita ku buvuzi ndetse no gutanga serivise ku barwaye kanseri’.

Mu butumwa bwatanzwe na Minisitiri w’Ubuzima Dr Nsanzimana Sabin yibukije abantu ko kanseri ari indwara ihitana benshi ku Isi, itarabona umuti ariko kandi abantu banashobora kwirinda.

Yagize ati: “Ni Umunsi Mpuzamahanga wo kurwanya kanseri, wo kuzirikana ububi bw’iyi ndwara kuko ni yo ndwara idafite igisubizo kirambye ku Isi inatwara abantu benshi.”

Minisitiri w’Ubuzima yakomeje asobanura ko nubwo bimeze gutyo, ariko hari icyakorwa abantu bakirinda kanseri.

Ati: “Hari icyakorwa ngo tuyirwanye bifitanye isano n’uko twirinda izindi ndwara zitandura cyane cyane gukora imyitozo ngororamubiri bifasha umubiri kurwanya indwara nyinshi harimo kanseri , tukaba twazigabanyya ndetse zimwe na zimwe tukaba twazikuraho bitewe n’uko  umubiri uba ukora neza.”

Minisitiri kandi yavuze ko kanseri, indwara z’umutima, n’indwara ya diyabete iyo uziteranyije uko ari eshatu ari zo zica abantu benshi mu Rwanda, akaba ari yo mpamvu abantu bagomba kuzihagurukira.

Yibukije ko abantu bagomba kugira siporo umuco, kunoza imirire, kwisuzumisha hakiri kare, kugira imyitwarire inoze birinda inzoga, itabi,…

Dr Maniragaba Theoneste ushinzwe ishami ryo kuvura kanseri zose mu Kigo cy’Igihugu gishinzwe ubuzima RBC yavuze ko kwipimisha no gukora siporo ari ingenzi mu kwirinda indwara zitandura harimo na kanseri.

Yagarutse ku bintu bine by’ingenzi byafasha guhangana n’indwara ya kanseri.

Ati: “Ibintu 4 by’ingenzi harimo kwisuzumisha, kongera imbaraga mu bukangurambaga, kwigisha abantu benshi bakisuzumisha hakiri kare. Gukomeza gushyira imbaraga mu kwigisha abaganga ndetse no gukora ubushakashatsi kugira ngo ingamba zifatwa zibe zihamye no gufasha abantu kubona ubuvuzi mu buryo buboroheye.

Nk’uko gahunda y’Umuryango w’Abibumbye imeze, u Rwanda rwaba mu bihugu bya mbere mu guhashya  rwaciye indwara ya kanseri  y’inkondo y’umura mu 2030 binyuze muri gahunda yo gukangurira abantu kwipimisha hakiri kare, kwipimisha ku bangavu b’imyaka 12 ndetse no kuvura abagaragayeho uburwayi mu gihe uburwayi butaragera kure, naho abo bwageze kure bashobora gufashwa kubaho ariko butabazahaje.

Umwe mu bitabiriye siporo, Uwase  yavuze ko yakiriye neza ubutumwa kuko ubusanzwe yakoraga siporo ari nko gushyushya umubiri gusa ariko ko ubwo amenye ko igira uruhare mu kurwanya kanseri agioye kongera igihe yakoreraga siporo.

Yagize ati: “Nakoraga siporo ntazi ngo bimaze iki, nkumva ari ugushyushya umubiri gusa. Ariko kuri ubu Minisitiri w’Ubuzima atubwiye ko birinda 40% by;indwara zose mu mubiri. Ngiye kongera igihe nakoraga siporo, nibura nyikore nka kabiri mu cyumweru”.

Ubutumwa biunyongereye imbaraga menye ko bifasha mu kurinda kwirinda kanseri kandi ngiye kujya mbikora nk’ibintu twahuguriwe kandi twiyemeje nk’inshingano zanjye za buri munsi.

Nyuma ya siporo rusange kandi hanabaye igikorwa cyo gupima abantu ku bushake indwara zitandura.

  • NYIRANEZA JUDITH
  • Gashyantare 4, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE