Kamonyi: Miliyoni 600 Frw zashowe mu kubaka ikiraro cyasenywe n’ibiza mu 2018

  • AKIMANA JEAN DE DIEU
  • Gashyantare 24, 2024
  • Hashize amezi 2
Image

Abaturage bo mu Murenge wa Kayumbu n’abo mu wa Karama mu Karere ka Kamonyi bongeye kwishimira ko ikiraro cya Kinyaruka cyatangiye kubakwa nyuma yaho gitwawe n’Ibiza mu myaka 6 ishize.

Ubuyobozi bw’Akarere ka Kamonyi bwemeza ko imirimo yo kongera kucyubaka yashowemo miliyoni zisaga 600 z’amafaranga y’u Rwanda, abaturage bakavuga ko kizabaramira bakazahura imidenderanire n’ubuhahirane.

Bamwe muri aba baturage babashije kuganira n’Imvaho Nshya bavuga ko iki kiraro cyari cyarahagaritse ubuhahirane hagati y’iyi Mirenge.

Munyakayanza Appolinaire atuye mu murenge wa Karama avuga ko kwambuka ku banyamaguru byakundaga ariko imodoka kuhanyura byagoraga.

Ati: “Turishimye cyane kuko iki kiraro cyari cyaradushyize mu bwigunge kubera ko hambukaga abanyamaguru gusa naho imodoka byazigoraga cyane”.

Murebwayire Suzane avuga ko kuva iki kiraro cyasenywa n’ibiza mu 2018 imodoka zahacaga zahinduye icyerekezo kuko ntabwo zari kubona uko zambuka zikoreye ibintu biremereye.

Yagize ati: “Iki kiraro cyasenywe n’ibiza byatumye umugezi wa Kayumbu wuzura uragitwara ku buryo imodoka ziremereye zajyaga kuzenguruka zigahindura icyerekezo biradushimishije ko kigiye kuzura tukongera kwisanzura”.

Kamanzi Silidiyo utuye mu M urenge wa Kayumbu avuga ko bashimira ubuyobozi bwumvise amarira y’abari basanzwe bakora ubucuruzi bwambukaga aho, kuko hari harangiritse ariko bizeye ko ikirimo kubakwa kizaba gikomeye kizabafasha kugabanya ibyo batangaga babazanira ibikoresho by’ubwubatsi.

Umuyobozi w’Akarere wungirije ushinzwe iterambere ry’Ubukungu, Uzziel Niyongira avuga ko iki kiraro cyari cyarahagaritse ubuhahirane cyatangiye kubakwa kandi amafaranga kizatwara miliyoni 600 ahari kandi kizaba gikomeye.

Yagize ati: “Kiriya kiraro twabonye ko cyahagaritse ubuhahirane natwe tugishyiraho ingufu kugira ngo cyubakwe gifashe mu kongera koroshya ubuhahirane ndetse kizuzura gitwaye agera kuri miliyoni 600. Ntiwabyuka ikiraro nk’iki ngo gihite cyubakwa ni nayo mpamvu cyatinze gutangira kubakwa urebye n’igihe cyatwariwe n’ibiza”.

Akomeza avuga ko nikimara kuzura abajyaga guca mu zindi nzira za kure bazagikoresha kikagabanya urugendo bakoraga.

Kugeza ubu hari ibiraro 8 bimaze gusanwa kugira ngo byoroshye ubuhahirane hagati y’Imirenge igize aka Karere kandi hari ibiraro 5 byubatswe bishya.

  • AKIMANA JEAN DE DIEU
  • Gashyantare 24, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE