Jeannette Kagame yasabye abayobozi gukoresha  ububasha bafite mu kuzamura abaturage

  • ZIGAMA THEONESTE
  • Ukuboza 1, 2023
  • Hashize amezi 3
Image

Madamu Jeannette Kagame yasabye abayobozi gukoresha imbaraga n’ububasha mu ngeri zitandukanye mu guteza imbere sosiyete. Yagize ati: “Niba hari ibyo mushoboye, nimubikore.”

Ibi yabigarutseho ubwo yagezaga ijambo ku bitabiriye amasengesho (Learders Breakfast Fellowish) yahuje abayobozi bakuru barimo abagize Guverinoma, abikorera n’abahagarariye imiryango itari iya Leta baganira ku buryo inshingano bafite bazikora kandi bakubaha Imana.

Madamu Jeannette Kagame yabwiye abitabiriye iyi nama ko bunze ubumwe mu kwemera, ukwizera n’urukundo kandi ko bakwiye kubikoresha kubaka u Rwanda bahuriza hamwe imbaraga kuko bakomoka ahantu batandukanye, bafite ubunararibonye mu ngeri zitandukanye kandi bakaba no mu buzima butandukanye.

Yagize ati: “Ndizera ko turimo kubwizanya ukuri, ibyo mushoboye mukwiye kubikora. Niba hari inzira ubona hari icyo ushobora wakora gikore. Imibereho myiza y’abandi ni inshingano zacu dufatanyije.”

Mu gushimangira ibyo yavuze Madamu Jeannette Kagame yifashishije umurongo wa Bibiliya, Imigani 3: 27-28 ugira uti: “Abakwiriye kubona ibyiza ntukabibime, niba bigushobokera. Ntukarerege mugenzi wawe uti “Genda uzagaruke ejo mbiguhe.”

Yanasabye abayobozi mu madini n’amatorero gukomeza gutoza abantu kubaha Imana no kugira indangagaciro nzima mu guteza imbere igihugu, anibutsa abayobozi mu nzego zitandukanye gukomeza gutanga serivisi neza hashingiwe ku bubasha bafite.

Pasteri Rick Warren umuvugabutumwa w’Umunyamerika na we witabiriye aya masengesho, ashingiye ku nkuru ya Musa uvugwa muri Bibiliya yasabye abayobozi kwegurira Imana ubushobozi bwose bafite kugira ngo ibukoreshe bakomeza kugira imbaraga mu byo bakora.

Yanagaragaje ko kandi aba bayobozi abo bari bo, ibyo batunze ndetse n’igitinyiro bafite ko “byaha ubuzima benshi ariko cyane cyane babiragije Imana.

Warren kandi yashimye ubutwari bwa Perezida wa Repubulika Paul Kagame kubera ko hashize imyaka isaga 20 bafitanye ubucuti, ndetse ko no mu gihe yari umwe mu mujyanama be yamwemereye gutanga umusanzu mu nzira y’itarambere ry’u Rwanda.

Warren kandi yashimye ubutwari bwa Perezida wa Repubulika Paul Kagame kubera ko hashize imyaka isaga 20 bafitanye ubucuti, ndetse ko no mu gihe yari umwe   mu bajyanama be yamwemereye gutanga umusanzu mu nzira y’iterambere ry’u Rwanda.

Amasengesho yo gusengera Igihugu azwi nka (Learders Breakfast Fellowish) yatangiye  mu 1995 hagamijwe gusengera abayobozi b’Igihugu  ngo bayoborwe n’indangagaciro nzima mu kazi bakora ka buri munsi.

Hari kandi n’amasengesho yiswe National Prayer Breakfast aba buri mwaka, yo gusengera igihugu  ahuriza hamwe abayobozi Bakuru b’Igihugu bakishimira ibyiza igihugu kimaze kugera banazirikana ndetse bakanasengera Igihugu muri gahunda z’iterambere ziba ziteganyijwe mu bihe biri imbere.

  • ZIGAMA THEONESTE
  • Ukuboza 1, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE