Isiraheli yagabye ibitero simusiga kuri Gaza

  • Imvaho Nshya
  • Ukwakira 28, 2023
  • Hashize amezi 7
Image

Kuva ku mugoroba wo ku wa Gatanu, tariki 27 Ukwakira, ingabo za Isiraheli zagabye ibitero bikaze kuri Gaza, ku buryo kuri uyu wa 28 Ukwakira nta tumanaho muri ako gace.

Ingabo za Isiraheli zatangaje ko zagabye ibitero 150 ku butaka mu majyaruguru y’akarere ka Gaza mu ijoro ryo kuva ku wa Gatanu rishyira kuri uyu wa Gatandatu.

“Ijoro rimwe, indege z’intambara IDF zagabye igitero ku butaka 150 mu nsi yo mu majyaruguru ya Gaza, hari tunel zikoreshwa n’iterabwoba, aho imirwano yo mu kuzimu n’ibindi bikorwa remezo byo munsi y’ubutaka byakomeje. Benshi mu baterabwoba ba Hamas bishwe”.Ibi bikaba byatangajwe nyuma y’ijoro ry’ibitero bikaze bya Isiraheli byibasiye ako karere.

Umunyamabanga Mukuru w’Umuryango w’Abibumbye, Antonio Guterres, agira ati: “Ni imibabaro itigeze kubaho”.

Ishami ry’Umuryango w’Abibumbye ryita ku Buzima (OMS) ntirikiri kuvugana n’abakozi ndetse n’ibigo nderabuzima muri Gaza, nk’uko Tedros Adhanom Ghebreyesus ukuriye OMS yabitangaje ku butumwa bwatangajwe ku rubuga nkoranyambaga X, rwahoze ruzwi ku izina rya Twitter. Ghebreyesus yongeyeho ati: “Umuriro w’amashanyarazi waciwe, ntibyoroshye ko ingobyi z’abarwayi zigera ku bakomeretse”.

 Yongeyeho ati: “Kwimura abarwayi ntibishoboka mu bihe nk’ibi, nta no kubona aho kuba”.

Itangazamakuru na ryo rifite ingorane zo gutanga amakuru avuye i Gaza.

Itangazamakuru rivuga ko ihagarikwa rya interineti n’abayobozi ba Isiraheli rigamije guhisha Isi yose amarorerwa azakorwa kandi muri yo abasivili, cyane cyane abana, bakaba ari bo bazibasirwa. Ibitangazamakuru by’Abarabu abanyamakuru badasanzwe bakomeje gutangaza amakuru ava Gaza bakoresheje itumanaho rya satelite itaziguye, itumanaho rihenze cyane bityo rikaba ryigonderwa n’abakize.

Iki cyiciro gishya cy’ibitero bya Isiraheli mu karere ka Gaza kije nyuma yo kunanirwa imishyikirano yo kurekura abafashwe bugwate zafatiwe i Gaza, nk’uko umunyamakuru w’Ibiro Ntaramakuru by’u Bufaransa AFP, uri i Yeruzalemu, Michel Paul abitangaza.

Muri iki gitondo cyo kuri uyu wa Gatandatu, imiryango y’abo banyagano yagejeje ijambo ku bayoboye imirwano muri Isiraheli maze isaba kutabangamira ababo bakiri mu maboko ya Hamas n’indi miryango i Gaza.

Inteko rusange y’Umuryango w’Abibumbye yemeje icyemezo cyerekeye kurengera abaturage no kubahiriza inshingano z’amategeko n’ubutabazi ku kibazo gikomeje kubera muri Gaza.

Abayobozi b’Abarabu n’ibitangazamakuru bishimiye icyemezo cy’Inteko rusange y’Umuryango w’Abibumbye gisaba ko habaho amahoro muri Gaza. Nubwo bazi ko iki cyemezo bitoroshye ko gikurikizwa.

Hamas irahamagarira Isi kugira icyo ihita ikora kugira ngo ihagarike ibisasu bya Isiraheli.

Inteko rusange y’Umuryango w’Abibumbye yemeje icyemezo kidahwitse, cyakozwe na Yorodani, gisaba ko habaho ubwumvikane bwihuse hagati ya Hamas na Isiraheli.

Umuryango uharanira uburenganzira bw’ikiremwamuntu, Human Rights Watch (HRW) ifite ubwoba ko iki kibazo kizatuma ibyaha bihishwa.

Uti: “Uku kutamenya amakuru bishobora gukingira ikibaba amahano kandi bikagira uruhare mu kudahana ihohoterwa ry’uburenganzira bwa muntu”.

Kuva hatangira intambara hagati ya Isiraheli na Palestine, ku ya 7 Ukwakira 2023 nk’uko raporo iheruka yabitangaje ku ya 27 Ukwakira 2023, mbere yuko igitero gikomeje kuyogoza akarere ka Gaza gifata intera, hamaze kwicwa Abisiraheli 1400 n’Abanyapalestine barenga 7.700.

Kugeza ubu ntiharamenyekana ababa bahitanywe n’icyo gitero gikaze ndetse n’ingano y’ibyangiritse.

NYIRANEZA JUDITH

  • Imvaho Nshya
  • Ukwakira 28, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE